Leke tere ti mo!

“Ala leke tere ti ala, ngbanga ti so a yeke na mbeni ngbonga so ala bi bê ti ala na ni pëpe si Molenge ti zo ayeke ga.”​—MAT. 24:44.

1, 2. (a) Aye wa so Bible afa tënë ni kozo awe na lege ti prophétie a lingbi ti haka ni na ye ti sioni so mbeni zen asara? (b) Nyen la a lingbi e sara ti sö kuâ na ngoi so Christ aga ti futi azo ti sioni?

MBENI koli so azo mingi ahinga lo ayeke na azen so lo yeke fa ka ye na ala ti sara ambeni ye ti zia ngia na bê ti azo. Teti angu mingi, lo na anyama ni amä tere nzoni. Lo tene: “Na ngoi so mbeni nyama amû bê ti lo kue na mo, a yeke mo bâ mo tene mbeni matabisi so ayeke pendere mingi na yâ ti dunia la a mû ni na mo.” Me na lango 3 ti octobre 2003, ndali ti mbeni raison so zo ahinga ni pëpe, mbeni zen ni so nzoroko ti lo ayeke vuru na so ane kilo 172 ate lo. Ye so nyama so asara so ayeke mbeni ye so zo aku tere ti lo na ni pëpe nga zo ti fango ye na anyama ni aleke tere ti lo pëpe ndali ti mara ti ye tongaso.

² A yeke nzoni ti bâ so Bible afa kozoni awe tënë ti bira so mbeni “nyama ti ngonda” ayeke ga na ni nga so a lingbi e leke tere ti e. (Diko Apocalypse 17:15-18.) Nyama ti ngonda so ayeke ga na bira ni na tere ti zo wa? Gi gbagburu tongaso azo ti dunia ti Satan so ayeke londo ti ke tere na popo ti ala wani. Bengba nyama ti ngonda ni ayeke fä ti Bendo ti Gigi nga “adidi bale-oko” ni ayeke fä ti azo ti poroso. Ala yeke londo na tere ti wali-ndumba ni, Babylone, Ngangu gbata so ayeke abungbi ti vorongo nzapa kue ti wataka. Ala yeke futi lo. Ye so ayeke si ande lawa? E hinga lango ni wala ngbonga ni pëpe (Mat. 24:36). E hinga so a yeke si ande na mbeni ngbonga so e ku tere ti e na ni pëpe nga ngoi so angbâ ti tene bira so alondo ayeke mingi pëpe (Mat. 24:44; 1 aCor. 7:29). Ni la, a yeke kota ye ti tene e leke tere ti e tongaso si, na ngoi so bira ni ayeke to nda ni nga tongana Christ aga ti futi azo ti sioni, lo zi e! (Luc 21:28). Ti leke tere ti e, e lingbi ti manda ye na ndo ti awakua be-ta-zo ti Nzapa so aleke tere ti ala lani na ala bâ na lê ti ala gango tâ tënë ti azendo ti Nzapa. E yeke bâ na nene ni aye so asi na yâ ti fini ti azo so?

Leke tere ti mo tongana Noé

3. Aye wa asara si a yeke lani kete ye pëpe na Noé ti sara na Nzapa na bê ti lo kue?

³ Atâa aye ti sioni so amû ndo lani na ngoi ti Noé, lo leke tere ti lo ti bâ gango tâ tënë ti zendo ti Nzapa. Tara ti bâ kpale so Noé ayeke lani na yâ ni. A-ange so ake yanga amû tere ti zo na ala ga na sese ge ala bungbi na apendere wali. Ye so asara si ala dü amolenge so ayeke nde, “awalombe” so amû kota ngangu ti ala ti sara sioni na azo (Gen. 6:4). Gbu li na ndo ti aye ti ngangu so amaï lani mingi ndali ti aye ti sioni so amolenge ti a-ange so asara na ando kue so ala gue dä. Ye ti pekoni ayeke so sioni amû lani ndo kue nga bibe ti azo na sarango ye ti ala aga gi sioni. Jéhovah so ayeke Gbia ti dunia kue afa mbeni ngoi so lo yeke futi azo ti sioni.​—Diko Genèse 6:3, 5, 11, 12.a

4, 5. Na lege wa aye ti ngoi ti e ayeke tongana ti ngoi ti Noé?

⁴ Jésus afa na lege ti prophétie so aye ti ngoi ti e ayeke duti tongana ti ngoi ti Noé (Mat. 24:37). Na tapande, e bâ nga so asioni yingo ayeke yôro tere ti ala na yâ ti aye so azo ayeke sara (Apoc. 12:7-9, 12). Asioni yingo so amû lani tere ti zo na ngoi ti Noé. Atâa so a kanga lege na ala ti mû tere ti zo na ngoi ti e, ala yeke sara kue ti sara ngangu na ndo ti amaseka nga na akota zo. Sân ti tene azo ahinga, a-ange so so aye tënë ti bungbingo koli na wali so ayeke na lege ni pëpe ayeke buba yâ ti li ti azo na pusungo ala ti sara lango-sioni nga na ambeni ye ti sioni. A-ange so ayeke na ngia ti bâ azo na sarango aye so.​—aÉph. 6:11, 12.

⁵ Mbeti ti Nzapa afa Zabolo tongana mbeni “wafango zo” nga a tene so lo yeke na “ngangu ti ga na kuâ”. (Jean 8:44; aHéb. 2:14). Ye so aye pëpe ti tënë so Nzapa amû lege na lo ti fâ zo kue so bê ti lo aye ti fâ. Ye oko, sioni yingo so ayeke pusu azo ti sara ye so asara si ala bâ pasi nga ala kui. Lo yeke sara nga ngangu na ndo ti bibe nga na bê ti azo ti ke amba ti ala nga ti duti na nzara ti fâ amba ti ala. Na tapande, na kodoro ti Amerika, na popo ti amolenge 142 so a dü ala, oko ayeke tï ande na maboko ti mbeni zo ti fango zo. Na bango aye ti ngangu so azo ayeke sara na amba ti ala laso, mo pensé so Jéhovah akanga lê na ndo ni na lo yeke sara ye pëpe, atâa so lo sara ye lani na ngoi ti Noé?

6, 7. Tongana nyen la Noé na sewa ti lo afa so ala yeke na mabe nga ala kpe mbeto ti Nzapa?

⁶ Ngoi kete na pekoni, Nzapa afa na Noé desizion so lo mû ti futi aye kue so ayeke na fini na ndo ti sese na lege ti mbeni kota ngu (Gen. 6:13, 17). Jéhovah amû yanga na Noé ti leke mbeni arche so ayeke tongana mbeni kota sanduku. Noé na azo ti sewa ti lo ato nda ti leke arche ni. Nyen la amû lani maboko na ala ti mä yanga na ti leke tere ti ala ndali ti fango ngbanga ti Nzapa so ayeke ga?

⁷ Kpengba mabe nga na kpengo mbeto ti Nzapa apusu Noé nga na sewa ti lo ti sara ye tâ gi tongana ti so Nzapa ahunda na ala (Gen. 6:22; aHéb. 11:7). Noé so ayeke mokonzi ti sewa angbâ lakue nduru na Jéhovah nga lo bi tere ti lo pëpe na yâ ti asioni sarango ye ti azo so angoro lo (Gen. 6:9). Lo hinga so a lingbi azo ti sewa ti lo akpe ti mû peko ti sarango ye ti ngangu nga na bibe ti kengo yanga ti azo so angoro ala. A yeke lani kota ye ti tene ala kpe ti bi tere ti ala kue na yâ ti akusala ti ala ti lâ oko oko. Nzapa amû na ala mbeni kua ti sarango ni, nga a yeke kota ye ti tene fini ti azo ti yâ ti sewa ni kue aluti gi na ndo ni.​—Diko Genèse 6:14, 18.

Noé na sewa ti lo aleke tere ti ala

8. Nyen la afa so azo ti sewa ti Noé agbu tënë ti Nzapa ngangu?

⁸ Mbaï ti Bible asara tënë mingi na ndo ti Noé babâ ti sewa ni, me wali ti lo, amolenge ti lo nga na awali ti ala nga kue ayeke lani azo so avoro Jéhovah. Prophète Ezéchiel afa so tënë so ayeke tâ tënë. Lo tene so tongana Noé ayeke lani na fini na ngoi ti lo Ezéchiel, a yeke pëpe mbilimbili ti lo Noé ni la ayeke sara si amolenge ti lo asö kuâ. Ala kono lani awe na a yeke na ala ti soro ti mä yanga wala ti ke yanga. Ni la, ala wani afa lani so ala ndoye Jéhovah nga na alege ti lo (Ezéch. 14:19, 20). Azo ti sewa ti Noé ayeda na fango lege ti lo, ala duti na oko mabe so lo yeke na ni nga ala zia pëpe si azo akanga lege na ala ti sara kua so Nzapa amû na ala ti sara.

9. Laso azo wa la e lingbi ti tene so ala yeke na mara ti mabe ti Noé?

⁹ Laso e yeke na ngia ti bâ na yâ ti sewa ti e ti aita kue na ya ti dunia ababâ ti sewa so ayeke sara ngangu ti mû tapande ti Noé! Ala bâ so kusala ti ala ayeke gi pëpe ti mû na azo ti sewa ti ala kobe, bongo, da nga ti bâ lege ti ekole ti ala. A lingbi ala mû nga na azo ti sewa ti ala aye so ala yeke na bezoin ni na lege ti yingo. Na sarango tongaso ala fa so ala leke tere ti ala awe ndali ti ye so Jéhovah aga nduru ti sara.

10, 11. (a) Na ngoi so Noé na sewa ti lo ayeke na yâ ti arche, bê ti ala yeke tongana nyen? (b) Tënë wa a yeke nzoni e hunda tere ti e na ni?

¹⁰ Peut-être Noé, wali ti lo, amolenge ti lo nga na awali ti ala asara kua ti lekengo arche so teti ngu 50 tongaso. Na ngoi so ala yeke leke arche ni, peut-être ala lï na yâ ni fani mingi. Ala leke ni si ngu alingbi ti lï na yâ ni pëpe, ala bata gbâ ti kobe nga ala lï na anyama na yâ ni. Tara ti bâ ye ni na yâ ti li ti mo. Kota lango so ala yeke ku ni kungo so asi awe. Na lango 17 ti use nze ti ngu 2370 kozo ti Christ, ala lï na yâ ti arche ni. Jéhovah akanga yanga-da ni, na ngu ato nda ti pika. A yeke lani pëpe gi mbeni senge ngu so ayeke pika ka. A zi yanga ti gbâ ti angu so ayeke na lê ti nduzu na mbeni kota ngu-nzapa apika ngangu na ndo ti arche ni (Gen. 7:11, 16). Azo so ayeke na gigi ayeke kui me ala so ayeke na yâ ti arche ayeke sö fini ti ala. Bê ti azo ti sewa ti Noé ayeke tongana nyen? Biani, ala kiri singila ngangu na Nzapa. Kite ayeke pëpe so na yâ ti bê ti ala, ala tene: ‘Ah, merci so e mä yanga ti Nzapa nga e leke tere ti e!’ (Gen. 6:9). Tara ti bâ so mo sö kuâ na Harmaguédon, bê ti mo ayeke pusu mo ti kiri mara ti singila tongaso?

¹¹ Ye oko alingbi pëpe ti kanga lege na Lo ti Ngangu Ahon Kue ti futi dunia ti Satan tongana ti so lo mû zendo ni. Hunda tere ti mo: ‘Mbi hinga na bê ti mbi kue so mbeni zendo ti Nzapa oko ayeke tï na ngu pëpe nga so lo yeke sara si azendo ni kue aga tâ tënë na ngoi so lo diko?’ Tongana a yeke tongaso, leke tere ti mo na batango na li “lâ ti Jéhovah” so ayeke pusu nduru nduru.​—2 Pi. 3:12.

Moïse aleke tere ti lo

12. Aye wa alingbi lani ti sara si lê ti Moïse angbâ pëpe na ndo ti aye ti yingo?

¹² Zia e bâ mbeni tapande ni nde. Na bango ndo ti zo, dutingo ti Moïse ayeke lani nzoni mingi na kodoro ti Égypte. Teti so molenge ti Pharaon ti wali la abata Moïse tongana molenge ti lo, azo ane peut-être lo mingi, lo yeke te gi anzoni kobe, lo yü gi anzoni bongo nga lo duti na gbâ ti apendere ye ti ngangu ngere. Lo manda aye mingi. (Diko Kusala 7:20-22.) Peut-être lo lingbi lani ti wara aye ti héritier mingi na peko ti mama so abata lo.

13. Na lege wa lê ti Moïse angbâ gi na ndo ti azendo ti Nzapa?

¹³ Na bango ni, aye so babâ na mama ti Moïse afa na lo na ngoi so lo dë kete amû lege na lo ti hinga so ayanda so azo ti Égypte ayeke voro ni ayeke gi asenge senge ye (Ex. 32:8). Aye so a leke teti fango mbeti na Égypte nga na apendere mosoro ti yâ ti da ti gbia ni apusu lani Moïse pëpe ti dö tâ vorongo ti zia. Peut-être lo gbu li ti lo mingi na ndo ti azendo so Nzapa amû na akotara ti lo na lo ye mingi ti leke tere ti lo ti sara ye so bê ti Nzapa aye. Na ndo ni, Moïse atene na amolenge ti Israël lo tene: “L’Éternel . . . Nzapa ti Abraham, Nzapa ti Isaac, na Nzapa ti Jacob, ato mbi na i.”​—Diko Exode 3:15-17.

14. Na lege wa a lingbi Moïse asara ye lani na mabe nga na mbeto pëpe?

¹⁴ Nde na ayanda kue so aduti fä ti anzapa ti kodoro ti Égypte so ayeke na fini pëpe, Moïse ahinga so Jéhovah so ayeke tâ Nzapa ayeke dä biani. Lo sara ye na yâ ti fini ti lo mo bâ mo tene lo yeke bâ “Lo so lê abâ Lo pëpe.” Moïse amä na bê so Nzapa ayeke zi azo ti lo, me lo hinga pëpe lawa la lo yeke sara ni (aHéb. 11:24, 25, 27). Ye so lo sara ti gbu koko ti mbeni zo ti Israël so ayeke ngbâa so mbeni zo ayeke sara sioni na lo afa so lo ye mingi ti bâ aHébreu asigigi na gbe ti ngbâa (Ex. 2:11, 12). Ye oko, ngoi so Jéhovah adiko ade ti si pëpe. Ni la, a lingbi Moïse akpe lo gue na mbeni yongoro ndo ti bata tere ti lo. Kite ayeke pëpe so a yeke lani ngangu mingi na lo ti zia gbâ ti aye ti nzoni so lo yeke na ni na yâ ti yangbo ti gbia ti Égypte ti gue ti duti na yando. Me, Moïse aleke tere ti lo na ziango si lê ti lo angbâ gi na ndo ti aye kue so Jéhovah afa ni na lo. Ni la, na pekoni so lo sara ngu 40 na sese ti Madian, Nzapa amû lo ti zi aita ti lo na gbe ti ngbâa. Moïse amä yanga ti Nzapa, lo kiri na Égypte. Ngoi alingbi awe ti tene Moïse asara kusala so Nzapa amû na lo ti sara nga ti sara ni tâ gi tongana ti so Nzapa ahunda na lo (Ex. 3:2, 7, 8, 10). Na ngoi so Moïse so ayeke na “tâ be-ti-molenge ahon azo kue” akiri na Égypte, a lingbi lo duti na mabe nga lo sara ye na mbeto pëpe si lo gue na gbele Pharaon (Nom. 12:3). Lo gue gi fani oko pëpe, me fani mingi na ngoi so aye ti ngangu ato nda ti si. Me lo hinga pëpe fani oke la a lingbi lo gue na gbele Pharaon.

15. Atâa aye ti vundu so Moïse awara, nyen la apusu lo ti ngbâ ti gi alege ti gonda Babâ ti lo ti yayu?

¹⁵ Na yâ ti angu 40 so aga na pekoni, Moïse atingbi na aye so amû vundu na lo. Me lo gi alege ti gonda Jéhovah nga ti wa amba ti lo azo ti Israël na bê ti lo kue ti sara tongaso (Deut. 31:1-8). Lo sara tongaso ngbanga ti nyen? Ngbanga ti so lo ndoye iri ti Jéhovah nga na komandema ti lo ahon iri ti lo Moïse ni (Ex. 32:10-13; Nom. 14:11-16). E nga kue, atâa aye ti vundu so e wara, a lingbi e ngbâ lakue ti mû mbage ti komandema ti Nzapa na hingango na bê ti e kue so sarango ye ti lo ayeke lakue na lege ti ndara, mbilimbili nga a yeke nzoni mingi (És. 55:8-11; Jér. 10:23). Mo bâ ni tongaso?

Zia lê ti mo angbâ na zingo ni!

16, 17. Ngbanga ti nyen tënë so ayeke na Marc 13:35-37 ayeke kota mingi na lê ti mo?

¹⁶ “Ala sara hange, zia lê ti ala angbâ na zingo ni, teti ala hinga pëpe lawa si lango so a fa ni awe ayeke si.” (Marc 13:33). Jésus amû gbotongo mê so na ngoi so lo yeke sara lisoro na ndo ti ye so ayeke duti fä ti hunzingo ti aye ti sioni ti fadeso. Bâ atënë ti nda ni ti kota prophétie ti Jésus so so Marc asû na mbeti: “Ala lango pëpe, ngbanga ti so ala hinga pëpe ngbonga ni so wa ti da ni ayeke ga na ni, wala na lakui, wala na bê ti bï, wala na toto ti kondo wala na yanga ti ndapre, tongaso si na ngoi so lo si gi hio tongaso, lo wara ala na lango pëpe. Me tënë so mbi tene na ala so, mbi tene ni na azo kue: Ala lango pëpe.”​—Marc 13:35-37.

¹⁷ Wango ti Jésus so apusu zo ti gbu li ti lo. Lo yeke sara tënë ti angbonga ti bï so a kangbi yâ ni na ambage osio. Ndangba mbage ni ayeke ka ngoi so a yeke ngangu ti tene lê ti zo angbâ na zingo ni, teti so ndangba mbage ni so ato nda ni na ngbonga ota ti ndapre ti si na ngoi so lâ ayeke sigigi. Azo ti sarango bira abâ so ngoi so la ayeke nzoni mingi ti londo na bira na tere ti awato ti ala, na ngoi so ala “lango”. Legeoko nga laso, na ngoi so azo mingi asara nzara ti tënë ti Royaume pëpe, a lingbi e tiri ngangu si lê ti e angbâ na zingo ni. E yeke na kite so a lingbi e ‘zia lê ti e angbâ na zingo ni’ nga e “sara hange” teti nda ni nga na zingo e so a fa tënë ni kozoni awe?

18. Kota pasa wa e aTémoin ti Jéhovah e yeke na ni?

¹⁸ Koli so e sara tënë ti lo fade na tongo nda ni na so ayeke fa ye na anyama angbâ na fini na peko ti ye ti sioni so zen so asara na lo. Na lege ti prophétie, Bible afa polele so bungbi ti vorongo nzapa ti wataka nga na tanga ti aye ti sioni ti ngoi so ayeke sö ande kuâ pëpe na ngoi ti futingo so ayeke ga (Apoc. 18:4-8). Zia si awakua ti Nzapa kue, maseka wala kangba, asara ye kue so ala lingbi ti sara ti leke tere ti ala ndali ti lâ ti Jéhovah tongana ti so Noé na sewa ti lo asara lani. E yeke na yâ ti mbeni dunia so ane Nzapa pëpe, so na yâ ni a yeke wara awafango ye ti abungbi ti vorongo nzapa ti wataka nga na azo so atene Nzapa ayeke dä me lo yeke bi bê ti lo na e pëpe. A yeke wara nga na yâ ni azo so atene Nzapa ayeke dä pëpe. Ala yeke he Nzapa na lege ti atënë ti ala. Me, e yeke zia pëpe si aye so asara ngangu na ndo ti e. Zia e bâ na nene ni atapande so e londo ti bâ nga e mû alege so azi na e ti mû mbage ti Jéhovah nga ti gonda lo tongana “Nzapa ti anzapa”. Biani “Lo yeke kota Nzapa, Lo yeke ngangu, Lo yeke Nzapa so amû mbeto mingi”.​—Deut. 10:17.

[Kete tënë na gbe ni]

Mo dabe ti mo na ni?

• Ngbanga ti nyen a lingbi Noé azia aye so sewa ti lo ayeke na bezoin ni na lege ti yingo na kozo ndo?

• Na lege wa ngoi ti e akpa tere mingi na ngoi ti Noé?

• Atâa aye ti vundu so Moïse awara, ngbanga ti nyen lo zia lê ti lo lakue gi na ndo ti azendo ti Jéhovah?

• Aprophétie ti Bible wa apusu mo ti lango pëpe na lege ti yingo?

[Foto na lembeti 25]

Noé na sewa ti lo azia lê ti ala gi na ndo ti kusala ti Jéhovah

[Foto na lembeti 26]

Azendo ti Jéhovah so ayeke ga lakue tâ tënë amû maboko na Moïse ti lango pëpe