Azo ahunda atene . . .

Fini ti lakue lakue na yâ ti Paradis ayeke fun sen pëpe?

▪ Bible amû na e beku so e lingbi ti duti na fini lakue lakue na yâ ti Paradis na ndo ti sese (Psaume 37:29; Luc 23:43). Ti duti na fini lakue lakue na yâ ti mbeni ndo so aye kue ayeke gi nzoni ayeke fun sen pëpe?

Hundango tënë so ayeke nzoni mingi. Azo ti gingo nda ti ye afa so mbeni zo so gigi ti lo anzere na lo pëpe ayeke to nda ti gi bê ti lo mingi, lo yeke gi na vundu nga lo yeke nduru ti sara mbeni ye so alingbi ti ga na kpale na lo. Azo so abâ so ala yeke na mbeni nzoni ye ti sara na yâ ti gigi ti ala pëpe wala so anzere na ala pëpe ti sara lakue gi oko ye alingbi ti bâ so fini anzere na ala mbeni pëpe. Azo so ayeke duti na yâ ti Paradis ayeke duti na mbeni nzoni ye ti sara na yâ ti gigi ti ala pëpe? Aye so ala yeke sara lâ oko oko ayeke gue ngbii ti fun sen?

Kozoni, hinga so Jéhovah Nzapa, lo so Bible alondo na lo, la amû fini ti lakue lakue so (Jean 3:16; 2 Timothée 3:16). Kota ye so a hinga na Nzapa ayeke ndoye (1 Jean 4:8). Jéhovah andoye e mingi nga lo mû na e anzoni ye kue so e yeke na ni laso.​—Jacques 1:17.

Wasarango e ahinga so ti tene e duti na ngia, a lingbi e duti na mbeni nzoni ye ti sara na yâ ti fini ti e (Psaume 139:14-16; Zo-ti-fa-tene 3:12). Na yâ ti Paradis, gigi ayeke duti ande pendere mingi. Kua so azo ayeke sara ande ayeke ga na ye ti nzoni na ala nga na azo so ala ye ala (Ésaïe 65:22-24). Tongana mo yeke na mbeni nzoni kua, mbeni kua so ayeke ngangu, so a lingbi mo sara ni na yâ ti ngoi kue, fini ayeke fun sen na hon ti mo?

Hinga nga so a yeke pëpe azo kue la Jéhovah ayeke mû lege na ala ti duti na fini na yâ ti Paradis. Lo yeke mû matabisi ti fini ti lakue lakue gi na azo so amû tapande ti Molenge ti lo, Jésus (Jean 17:3). Na ngoi so Jésus ayeke lani na sese, lo yeke na ngia ti sara ye so bê ti Babâ ti lo aye. Na lege ti tënë ti yanga ti lo nga na sarango ye ti lo, Jésus afa na adisciple ti lo so zo ayeke wara ngia so aninga na lege ti mungo ye na zo me pëpe na lege ti warango ye na maboko ti zo (Kusala 20:35). Na yâ ti Paradis so a kiri a leke ni, azo kue ayeke sara ye alingbi na acommandement use so ayeke kota ahon atanga ni kue so ahunda ti ndoye Nzapa nga ti ndoye mba ti mo (Matthieu 22:36-40). Bâ so mo yeke na popo ti anzoni zo so aye mo nga so andoye kusala ti ala! Mo pensé so tere ti mo ayeke nzere pëpe na popo ti mara ti azo tongaso?

Fini na yâ ti Paradis andu nga ye wa? Lâ oko oko, e yeke manda mbeni fini ye na ndo ti Wasarango e. Azo ti gingo nda ti ye awara lege ti hinga aye mingi na ndo ti aye so Jéhovah asara (aRomain 1:20). Juska laso, e hinga ye gi kete na ndo ti aye so Jéhovah asara. A sara angu saki mingi awe so Job so ayeke lani be-ta-zo akiri agbu li ti lo nzoni na ndo ti hingango ye ti lo na ndo ti aye so Nzapa asara, na lo tene mbeni tënë so angbâ tâ tënë. Lo tene: “So ayeke gi kete yanga ti kusala ti Lo; na e mä gi kete tënë ti Lo. Me zo wa alingbi hinga nda ti ngangu ti Lo so atoto tongana bekpa?”​—Job 26:14.

Atâa e duti na fini aninga ngu oke, e yeke hinga lâ oko pëpe aye kue na ndo ti Jéhovah Nzapa nga na aye so lo sara. Bible atene so Nzapa azia na yâ ti bê ti e nzara ti ngbâ na fini teti lakue lakue. Me a tene nga so e ‘lingbi hinga pëpe nda ti kusala so Nzapa asara, a komanse na lâ ti kozoni juska na lâ ti nda ni.’ (Zo-ti-fa-tene 3:10, 11). Mo pensé so tere ti mo ayeke nzere pëpe ti manda afini ye na ndo ti Wasarango mo?

Même laso, azo so amû tere ti ala kue ti sara akusala so ayeke ga na aye ti nzoni na azo nga so amû gloire na Nzapa abâ lâ oko pëpe so kusala ti ala ni afun sen. E lingbi ti hinga na bê ti e kue so tongana e bi tere ti e kue na yâ ti mara ti kusala tongaso, tere ti e ayeke nzere lakue, même tongana e ngbâ na fini lakue lakue.

[Lingui ti foto na lembeti 14]

Sese: Image Science and Analysis Laboratory, NASA-Johnson Space Center; Galaxie: The Hubble Heritage Team (AURA/STScI/NASA)