Azo ahunda atene . . .

Ndali ti nyen Nzapa ahunda lani na Abraham ti mû molenge ti lo na sandaga?

▪ Tongana ti so mbeti ti Genèse afa, Jéhovah Nzapa ahunda lani na Abraham ti mû molenge ti lo Isaac na sandaga (Genèse 22:2). Ambeni zo so adiko mbaï so, li ti ala akpe kue. Na tapande, mbeni wafango-mbeti so iri ti lo Carol atene: “Lani na kete ti mbi tongana a diko na mbi mbaï so kpâ, ngonzo agbu mbi na tere ti Nzapa. Nzapa ti nyen la ahunda ti tene a sara mara ti ye tongaso so?” A yeke na lege ni ti sara ngonzo, me zia si e girisa aye use so pëpe.

Kozoni, bâ ye so Jéhovah asara ni pëpe. Lo mû lege na Abraham ti gue ngbii ti fâ molenge ti lo ni pëpe, même tongana Abraham aga lani nduru ti sara ni. Lo hunda nga na mbeni zo nde ti sara mara ti ye tongaso encore ape. Jéhovah aye si awakua ti lo kue, même amolenge, angbâ na fini a ninga na yâ ti ngia.

Use ni, Bible afa so, so Jéhovah ahunda na Abraham ti mû Isaac na sandaga, ndani ayeke dä. Nzapa ahinga so angu mingi na pekoni ande, lo yeke tokua Jésus, Molenge ti lo wani,a ti ga ti kui ndali ti e (Matthieu 20:28). Lo ye gi lani ti fa na e so kuâ ti Molenge ti lo ni ayeke sara ande lo nzoni oko pëpe. Na lege ti sandaga ti Isaac, lo fa ye so sandaga ti Jésus ayeke sara ande. Tongana nyen la?

Mä tënë so Jéhovah atene na Abraham, lo tene: “Mo kamata molenge ti mo, molenge ti mo ngengele oko, lo so mo ndoye lo, même Isaac; . . . mo mû lo kâ tongana offrande so a-zo-na-wa.” (Genèse 22:2). Mo bâ ge, Jéhovah atene tënë ti Isaac atene, “lo so mo ndoye lo”. Jéhovah ahinga lani so Abraham aye tënë ti Isaac mingi. A yeke nga tongaso ti Jéhovah na Molenge ti lo, Jésus. Ndani la si fani use lo tene tënë so na ndo ti Jésus, lo tene, “Molenge ti mbi so mbi ndoye lo mingi.”​—Marc 1:11; 9:7.

Bâ nga so, na yanga ti Hébreu so a sû na atënë ni so, lani tongana Jéhovah ahunda na Abraham ti mû Isaac na sandaga, lo hunda ni na tenengo “pardon”. Mbeni zo so ahinga ye na ndo ti Bible atene so tenengo pardon aye ti fa so “SEIGNEUR ahinga so kete ye la ni hunda na Abraham ti sara so pëpe.” Hundango Abraham ti mû Isaac na sandaga adoit ti zia vundu na bê ti lo, Abraham ni, mingi. Ti Jéhovah nga a yeke tongaso. Vundu adoit ti hon ndo ti lo lani mingi na ngoi so lo bâ Molenge ti lo so lo ye lo mingi ayeke bâ pasi na akui. Kite ayeke pëpe so lâ oko Jéhovah asara vundu ngangu tongaso ape, na mbeni ye nde ti kiri ti zia vundu na bê ti lo mingi tongaso ayeke duti dä pëpe.

Biani, même tongana e gi li ti e peut-être gbä na ye so Jéhovah ahunda lani na Abraham ti sara, a yeke nzoni e girisa pëpe so Jéhovah azia si Abraham ague ngbii afâ molenge ti lo ni pëpe. Lo ye si mara ti mawa so ababâ ayeke sara ndali ti kuâ ti amolenge ti ala asara Abraham pëpe, ni la lo bata Isaac na fini. Me ti Jéhovah, “lo zi Molenge ti lo na yâ ti kpale pëpe, me lo zia lo na lê ni ndali ti e kue”. (aRomain 8:32). Ndali ti nyen Jéhovah ayeda ti tene mara ti ngangu ye tongaso asi na lo? Lo sara tongaso si “e lingbi ti wara fini”. (1 Jean 4:9). Biani, ye so afa so Nzapa aye e mingi. E nga kue e ye ti fa so e ye lo, ni la ape?b

[Kete tënë na gbe ni]