Sara na Nzapa so amû liberté na zo

“Ndoye ti Nzapa ayeke so: e bata acommandement ti lo; me acommandement ti lo ayeke ye so ane pëpe.”​—1 JEAN 5:3.

MO YEKE KIRI TËNË TONGANA NYEN?

Tongana nyen la Satan ayeke gi ti sara ti tene azo abâ andia ti Nzapa tongana mbeni nengo ye?

Ngbanga ti nyen a lingbi e soro akamarade ti e nzoni?

Nyen la ayeke mû maboko na e ti ngbâ be-ta-zo na Nzapa so amû liberté na zo?

1. Jéhovah abâ liberté tongana nyen? Liberté wa la lo mû na Adam na Ève?

GI JÉHOVAH oko la ayeke na liberté so katikati ni ayeke dä ape. Me lo yeke sara ye lakue na ni na lege ni nga lo gi pëpe ti kanga lege na liberté ti azo na lege so lo fa na ala akete kete ye kue so a lingbi ala sara. Nde na so, lo mû na ala liberté ti mû adesizion ala wani nga ti kaï anzara ti ala kue so ayeke na lege ni. Na tapande, gi ye oko la Nzapa ake lani na Adam na Ève ti sara. Lo tene na ala ti te pëpe “lê ti keke ti hinga nzoni na ti hinga sioni”. (Gen. 2:17). Tongaso ala lingbi lani ti sara ye so Nzapa aye nga ti ngbâ ti duti na kota liberté.

2. Nyen la asara si Adam na Ève aga ngbâa ti siokpari?

² Ngbanga ti nyen Nzapa amû liberté mingi na babâ na mama ti e? Ndali ti so lo créé ala na image ti lo nga lo mû na ala yingo-ti-hinga. Lo ku na mbage ti ala ti sara ye so ayeke na lege ni ndali ti so ala ye lo tongana Wasarango ala (Gen. 1:27; aRom. 2:15). Mawa ni ayeke so Adam na Ève akiri singila pëpe na Wasarango ala ndali ti liberté so lo mû na ala. Ala soro ala wani ye so ayeke nzoni na ye so ayeke sioni. Ala pensé so na sarango tongaso ala yeke wara liberté mingi, andâ desizion ti ala so asara si ala na amolenge ti ala aga ngbâa ti siokpari na pasi nga kuâ aga na pekoni.​—aRom. 5:12.

3, 4. Bibe wa Satan aye ti tene e duti na ni na ndo ti aye so Nzapa ahunda na e ti sara?

³ So Satan awara lege ti handa azo use so alingbi kue nga na gbâ ti a-ange ti ke droit ti Nzapa ti komande, lo lingbi nga ti handa e. Akode ti lo achangé ape. Lo ye si e pensé so aye so Nzapa ahunda na e ti sara ayeke ngangu mingi. Satan aye si e pensé so tongana e sara na Nzapa, e yeke duti na ngia na yâ ti gigi ti e ape (1 Jean 5:3). Azo ti dunia so apensé tongaso, na tongana e duti mingi na ala, e lingbi ti komanse ti pensé tongana ala. Mbeni ita-wali so ayeke fadeso na ngu 24 atene so asioni kamarade asara ngangu mingi lani na ndo ti ni. Lo yeke lani na mbeto ti tene bango ndo ti lo aduti nde na ti amba ti lo amaseka. Ye so asara si lo sara lango-sioni. Peut-être mo nga kue mo bâ so amba ti mo ayeke sara ngangu mingi na ndo ti mo.

⁴ Mawa ni ayeke so, même ambeni zo na yâ ti congrégation alingbi ti pusu zo ti sara ye ti sioni. Mbeni ita-koli so ade maseka atene so ambeni kamarade ti lo na yâ ti congrégation ayeke bâ tere na azo so ayeke aTémoin ape ti gi ti sara mariage na ala. So lo mû ngoi mingi ti duti na ala asara si lo sara ye tongana ala. Lo tene: ‘Songo ti mbi na Jéhovah awoko. Bungbi anzere na mbi pëpe nga a yeke ngangu ti tene mbi fa tënë. A yeke na ngoi ni so la mbi bâ so a lingbi mbi zia lege ti dutingo na ala, na mbi sara ni!’ Mo hinga so akamarade ti mo alingbi ti sara ngangu mingi na ndo ti mo? Zia e bâ tapande so ayeke na yâ ti Bible so alingbi ti mû maboko na e laso.​—aRom. 15:4.

LO HANDA ALA NA BÊ TI ALA AYE LO

5, 6. Ngbanga ti nyen Absalom ahanda azo? Lo si na ye so lo ye ti si dä so?

⁵ Na yâ ti Bible a yeke wara gbâ ti tapande ti azo so sioni sarango ye ti ala asara ngangu na ndo ti amba ti ala. Mbeni oko ni ayeke ti Absalom, molenge ti Gbia David. Absalom ayeke lani mbeni koli so ayeke pendere mingi. Legeoko tongana Satan, lo zia si mbeni sioni nzara amaï na yâ ti bê ti lo. Lo ye ti mû mbata ti gbia ti babâ ti lo, atâa so lo yeke na droit ti duti gbia ape.a Ti gi ti wara ye so lo ye, Absalom asara si azo ni apensé so lo la lo ye ti mû maboko na ala me gbia ni ape. Tâ gi tongana ti Zabolo na yaka ti Éden, Absalom asara si azo ni apensé so lo bi bê ti lo na ala me na oko ngoi ni lo tene mbeni kota mvene na ndo ti babâ ti lo wani.​—2 Sam. 15:1-5.

⁶ Absalom asi na ye so lo ye ti si dä so? Lo wara ambeni ye so lo ye so, ndali ti so Bible atene: “Absalom ahanda azo ti Israël si bê ti ala kue aye lo.” (2 Sam. 15:6). Absalom ahanda azo mingi, me na nda ni lo tï. Baba ti Absalom asara si lo nga na azo saki mingi so lo handa ala awara kuâ.​—2 Sam. 18:7, 14-17.

7. Nyen la e lingbi ti manda na yâ ti mbaï ti Absalom nyen? (Bâ foto so ayeke na lembeti 14.)

⁷ Nyen la asara si a yeke ngangu lani na Absalom pëpe ti handa azo ti Israël? Peut-être ala ye lani aye so Absalom amû zendo ni na ala. Wala peut-être pendere ti lo asara ngangu na ndo ti ala. Atâa raison ni ayeke so wa, e yeke na kite pëpe so azo ti Israël ayeke lani be-ta-zo pëpe na Jéhovah nga na gbia so lo soro lo. Laso, Satan angbâ ti sara kua na azo so ayeke tongana Absalom ti handa awakua ti Jéhovah. Ala lingbi ti tene: ‘Aye so Jéhovah ahunda na e ti sara ayeke ngangu mingi.’ Ala lingbi nga ti tene: ‘Bâ azo kue so avoro Jéhovah ape, ala kue ayeke na ngia mingi.’ Mo yeke mä yâ ti asioni mvene so na mo yeke ngbâ be-ta-zo na Nzapa? Mo yeke hinga so gi “ndia so alingbi kue” ti Jéhovah, ndia ti Christ la alingbi ti sara si mo wara tâ liberté? (Jacq. 1:25). Tongana mo hinga ni, fa so mo ye ndia so, nga sara ye na liberté ti mo na lege so anzere na Nzapa.​—Diko 1 Pierre 2:16.

8. Atapande wa afa so tongana zo asara ye ague nde na aye so Jéhovah ahunda na e lo yeke wara ngia ape?

⁸ Satan aye mingi ti handa amaseka. Mbeni ita-koli so fadeso ayeke na ngu 30 tongaso atene so na ngoi so ade lo wara lani ngu 20 ape, lo bâ pëpe so aye so Jéhovah ahunda na lo ayeke ti bata lo nga lo bâ so lo yeke na liberté pëpe. Ye so asara si lo sara lango-sioni. Me ye so asara pëpe si lo yeke na ngia. Lo bâ so tënë ayeke na li ti lo na vundu asara lo teti angu mingi. Mbeni ita-wali so asara lango-sioni na ngoi so lo de maseka atene so na pekoni lo yeke na ngia ape nga lo ne ape. Lo tene so même laso atâa so ngu 19 ahon na pekoni awe, ni ngbâ ti pensé na ni na asara ni nzoni ape. Mbeni ita-wali ni nde atene: “Ti bâ so tambela ti mbi amû vundu mingi na azo so mbi ye ala, a sara mbi nzoni oko pëpe na lege ti bibe, na lege ti yingo nga mbi yeke na vundu mingi. A yeke sioni mingi ti duti na fini sân ti nzere na lê ti Jéhovah.” Satan aye pëpe si mo pensé na ndo ti akpale so ayeke ga na peko ti siokpari so mo sara.

9. (a) Ahundango ndo wa alingbi ti mû maboko na e ti hinga bango ndo ti e na ndo ti Jéhovah, andia ti lo nga na afango ye ti lo? (b) Ngbanga ti nyen a yeke nzoni ti hinga Nzapa nzoni?

⁹ Atapande so afa so aye so zo ayeke wara tongana lo ke yanga ti Nzapa ayeke sioni mingi. A yeke ye ti vundu mingi so ye so asi na amaseka mingi, nga même na akangba, so ayeke na yâ ti tâ tënë (aGal. 6:7, 8). Tongaso hunda tere ti mo: ‘Mbi hinga aye so Satan ayeke sara na kua ti handa na mbi? Mbi bâ so Jéhovah la ayeke nzoni Kamarade ti mbi, lo so lo yeke tene na mbi lakue tâ tënë na lo ye ye so ayeke tâ nzoni mingi ndali ti mbi? Mbi hinga biani na bê ti mbi so lo lingbi lâ oko pëpe ti gbanzi na mbi mbeni ye so ayeke biani nzoni na so alingbi ti sara si mbi yeke na ngia?’ (Diko Ésaïe 48:17, 18.) Mo yeke kiri tënë en na ahundango tënë so gi tongana mo hinga Jéhovah nzoni. A lingbi mo hinga lo nzoni na mo yeda so andia nga na afango ye so ayeke na yâ ti Bible afa so lo ndoye mo, me pëpe so lo ye ti kanga lege na liberté ti mo.​—Ps. 25:14.

SAMBELA TI WARA BÊ TI NDARA NGA NA TI MANGO YANGA

10. Ngbanga ti nyen a yeke nzoni e mû tapande ti maseka Gbia Salomon?

¹⁰ Na ngoi so Salomon angbâ lani maseka, lo sara tere ti lo kete lo sambela Jéhovah lo tene: “Mbi yeke tongana kete molenge, mbi hinga lege ti sigigi na ti kiri na gbele azo pëpe.” Na pekoni lo sambela ti wara bê ti ndara nga na ti mango yanga (1 aGbia 3:7-9, 12). Jéhovah amä sambela so lo sara na bê ti lo kue, na lo lingbi nga ti sara tongaso na mo, atâa mo yeke maseka wala kangba. Jéhovah ayeke mû na mo ndara pëpe na lege ti miracle. Me lo lingbi ti sara si mo wara ndara tongana mo manda Bible, Mbeti ti lo, nzoni, mo sambela ti wara yingo vulu na mo sara ye alingbi na wango nga na fango lege so mo yeke wara na yâ ti congrégation ti aChrétien (Jacq. 1:5). Biani, Jéhovah ayeke sara si même awakua ti lo so ayeke amaseka awara ndara ahon azo kue so amä yanga ti lo pëpe, même “awandara nga na azo so ahinga ndo” na yâ ti dunia so.​—Luc 10:21; diko Psaume 119:98-100.

11-13. (a) Akpengba ye wa e lingbi ti manda na lege ti Psaume 26:4, aProverbe 13:20 nga na 1 aCorinthien 15:33? (b) Mo yeke sara ye alingbi na akpengba ye so tongana nyen na yâ ti fini ti mo?

¹¹ Zia e bâ ambeni versê ti Bible so ayeke mû maboko na e ti bâ so a yeke kota ye ti manda Bible nga ti gbu li na ndo ti ye so e yeke diko tongaso so si e hinga Nzapa nzoni. Aversê ni oko oko kue afa mbeni kpengba ye so alingbi afa lege na e na ndo ti tënë ti sorongo akamarade. Psaume 26:4 atene: “Mbi duti pëpe na azo ti handa, na mbi tambela pëpe na awandendia.” A-Proverbe 13:20 atene: “Zo so atambela na awandara, fade lo ga wandara, me zo so aga ndeko ti awabuba, fade lo wara vundu dä.” Nga, 1 aCorinthien 15:33 atene: “Ti sara songo na asioni zo ayeke buba anzoni sarango ye ti zo.”

¹² Akpengba ye wa e lingbi ti manda na lege ti aversê so? (1) Jéhovah aye e soro akamarade ti e nzoni. Lo ye ti bata e si e sara pëpe mbeni ye so alingbi ti sara sioni na e nga ti buba songo ti e na lo. (2) Azo so e yeke sara kamarade na ala alingbi ti sara si e sara ye ti nzoni wala ye ti sioni: a yeke ye so ayeke si ka. Lege so a sû na atënë ti yâ ti aversê so afa so Jéhovah ayeke gi ti ndu bê ti e. Tongana nyen? Bâ so a sû aversê ni pëpe tongana mbeni ndia. A tene pëpe: “A lingbi mo sara pëpe . . . ” Me a sû aversê ni tongana mbeni tâ tënë. A yeke mo bâ mo tene Jéhovah ayeke tene na e atene: ‘Bâ tâ ye so ayeke si ka la. Nyen la mo yeke sara? Nyen la ayeke na yâ ti bê ti mo?’

¹³ Ndali ti so a sû aversê so ota kue tongana mbeni tâ tënë, aversê so angbâ lakue tâ tënë nga a lingbi ti sara na kua na yâ ti aye mingi. Na tapande, hunda tere ti mo na mara ti ahundango ndo so: Na yâ ti aye wa mbi lingbi ti kpe ti sara kamarade na azo so “ayeke honde tâ sarango ye ti ala”? Na yâ ti aye wa mbi yeke wara tere na mara ti azo tongaso? (aProv. 3:32; 6:12). Azo wa la ayeke “awandara” so Jéhovah aye si mbi sara kamarade na ala? Azo wa la ayeke “awabuba” so lo ye si mbi sara kamarade na ala pëpe? (Ps. 111:10; 112:1; aProv. 1:7). “Anzoni sarango ye” wa mbi yeke buba ni tongana mbi soro asioni kamarade? Asioni kamarade ayeke gi na yâ ti dunia? (2 Pi. 2:1-3). Mo yeke kiri tënë tongana nyen na ahundango ndo so?

14. Mo lingbi ti sara nyen ti tene Vorongo Nzapa na sewa ti mo aga nzoni ahon ti kozo?

¹⁴ Tongana ti so e sara na aversê ota so, mo lingbi ti sara nga na ambeni versê ti Bible so mo diko ti hinga bibe ti Nzapa na ndo ti aye so ayeke kota mingi so andu mo nga na sewa ti mo.b Ababâ na amama ala sara lisoro na ndo ti aye so na ngoi ti Vorongo Nzapa na sewa. Na ngoi so mo yeke sara ni, girisa pëpe so ye so mo yeke gi ayeke ti mû maboko na zo oko oko na yâ ti sewa ni ti hinga so andia ti Nzapa nga na afango lege ti lo afa so lo ndoye e (Ps. 119:72). Mara ti mandango ye tongaso ayeke mû maboko na azo kue ti sewa ni ti kpengba songo ti ala na Jéhovah nga na popo ti ala.

15. Mo yeke hinga tongana nyen so mo yeke biani na bê ti ndara nga na ti mango yanga?

¹⁵ Mo yeke hinga tongana nyen so mo yeke biani na bê ti ndara nga na ti mango yanga? Mbeni lege ni ayeke ti haka pensé ti mo na ti awakua be-ta-zo ti Nzapa ti ândö, azo tongana Gbia David, so atene: ‘Mbi ye ti sara ye so bê ti Mo aye, O Nzapa ti mbi, Ndia ti Mo ayeke na yâ bê ti mbi.’ (Ps. 40:9). Nga, zo ti sungo Psaume 119 atene: ‘O, mbi ndoye Ndia ti Mo mingi! Na mbi bi bê ti mbi dä lakue.’ (Ps. 119:97). A lingbi mo sara ngangu ti duti na mara ti ndoye so. Mo yeke maï mara ti ndoye so tongana mo manda Bible nzoni, mo sambela nga mo gbu li na ndo ti ye so mo diko. A yeke maï nga tongana mo bâ na yâ ti fini ti mo so sarango ye alingbi na aye so Jéhovah ahunda na mo ayeke ga na mo aye ti nzoni.​—Ps. 34:9.

SARA KUE TI BATA LIBERTÉ TI MO TI CHRÉTIEN

16. Tongana e ye ti sö benda na yâ ti tiri ti e ti bata liberté ti e, nyen la a lingbi e hinga?

¹⁶ Na yâ ti mbaï ti azo, akodoro atiri asioni bira ti wara liberté. A yeke nzoni mo tiri ngangu ti bata liberté ti mo ti Chrétien. A yeke nzoni mo hinga so awato ti mo ayeke gi pëpe Satan, dunia so nga na abibe ti dunia so ayeke sara sioni na zo. Mo yeke tiri nga na awokongo ti mo wani nga na bê ti mo so alingbi ti handa mo (Jér. 17:9; aÉph. 2:3). Me na lege ti mungo maboko ti Jéhovah mo lingbi ti sö benda. Na ngoi kue so mo sara ye so ayeke na lege ni, aye ti nzoni use aga na pekoni. Kozo ni ayeke so, mo yeke zia ngia na bê ti Jéhovah (aProv. 27:11). Use ni, na angoi kue so mo bâ aye ti nzoni so mo wara na sarango ye alingbi na “ndia so alingbi kue, ndia ti liberté”, mo yeke kiri ti sara ngangu mingi ti ngbâ na ndo ti “lege so” ague na fini ti lakue lakue. Nga, na yâ ti ngoi so ayeke ga, mo yeke wara kota liberté so Jéhovah atene lo yeke mû na azo kue so angbâ be-ta-zo na lo.​—Jacq. 1:25; Mat. 7:13, 14.

17. Tongana e sara afaute, ngbanga ti nyen a yeke nzoni e sara vundu ahon ndo ni ape? Jéhovah ayeke mû maboko na e tongana nyen na ngoi so e sara mbeni faute?

¹⁷ A yeke tâ tënë so ngoi na ngoi e kue e yeke sara afaute (Zo-ti. 7:20). Me tongana e sara faute, a yeke nzoni e tene pëpe so ye ti nzoni ayeke na yâ ti e ape wala e sara vundu ahon ndo ni ape. Tongana mo sara faute, sara ye so a lingbi mo sara ti zia lege ni, même tongana a hunda ti tene mo hunda na a-ancien ti mû maboko na mo. Jacques atene so ‘sambela so ala sara na mabe ayeke sara si zo ti kobela awara sava, na Jéhovah ayeke mû lo na nduzu. Nga, tongana lo sara asiokpari, fade a yeke pardone lo ndali ni.’ (Jacq. 5:15). Girisa ape so Nzapa ayeke sara nzoni bê nga lo ye ti tene mo duti na yâ ti congrégation ndali ti so lo bâ mbeni ye ti nzoni na yâ ti mo. (Diko Psaume 103:8, 9.) Tongaso, Jéhovah ayeke mû maboko na mo lakue na ngoi so mo yeke gi ti sara na lo na bê ti mo kue.​—1 Chron. 28:9.

18. Nyen la a lingbi e sara ti tene Jéhovah abata e?

¹⁸ Na bï so na ndade ni Jésus akui, lo sambela na abazengele ti lo 11 so ayeke be-ta-zo nga lo hunda na Babâ ti lo ti bata ala. Lo tene tënë so, so zo alingbi ti girisa ni pëpe: “Bâ ndo na ndo ti ala ngbanga ti Zo ti sioni.” (Jean 17:15). Jésus abi bê ti lo pëpe gi na ndo ti abazengele ti lo, me lo yeke bi bê ti lo na ndo ti azo kue so ayeke mû peko ti lo. Tongaso, e lingbi ti hinga biani so Jéhovah ayeke kiri tënë na sambela ti Jésus so na lege so lo yeke bâ ndo na ndo ti e na yâ ti angoi ti ngangu so. “[Jéhovah a]yeke Vala teti azo so atambela na be-biani . . . Lo bata lege ti azo ti lo ti nzobe.” (aProv. 2:7, 8). Ti sara ye alingbi na aye so Jéhovah ahunda ayeke lakue kete ye pëpe. Me gi azo so amä yanga ti Jéhovah la ayeke wara ande fini ti lakue lakue nga na tâ liberté (aRom. 8:21). Zia mbeni zo ahanda mo ape.

[Akete tënë na gbe ni]

[Foto na lembeti 14]

Tongana nyen la e lingbi ti hinga azo so laso ayeke sara ye tongana Absalom nga ti kpe ala?