“Mbi wara tâ liberté ni awe”

GIGI TI MBI ÂNDÖ:

A dü mbi na gbata ti Moundsville so ayeke na yanga ti ngu ti Ohio na mbage ti do ti Virginie ti Banga, na Amerika. A dü e amolenge osio, koli ota na wali oko. Mbi yeke use molenge ni. Yanga-da ti e ayeke dë ka ape. Babâ na mama ayeke anzoni zo, ala sara kua ngangu nga ala ye amba ti ala zo. Ye ti e ayeke nga dä lani mingi ape, me lakue e yeke wara ye so e yeke na bezoin ni. Babâ na mama ti mbi ayeke aTémoin ti Jéhovah, na ala sara kue ti ndûru na yâ ti bê ti e andia ti Nzapa na kete ti e.

Me tongana mbi kono, bê ti mbi akomanse ti pusu mbi yongoro na aye so a fa na mbi na kete ti mbi. Mbi hunda tere ti mbi, mbi tene tâ batango ndia ti Bible la ayeke sara si zo aduti na ngia? wala ye ni ayeke tongana nyen? Na ndani mbi tene so tongana mo zo mo yeke na liberté ti sara ye kue so bê ti mo aye, ni la si ayeke ga na ngia. Kete na pekoni, mbi zia lege ti guengo na abungbi. Aita ti mbi use amû peko ti mbi. Babâ na mama asara kue ti mû maboko na e, me gbä.

Mbi pensé lani ti kete ape so liberté so mbi ye ni so ayeke sara si mbi yeke ga ngbâa ti aye mingi. Mbeni lâ, tongana mbi londo na ekole mbi yeke kiri na yanga-da, mbeni kamarade ti mbi ayôro manga na mbi. Mbi mû ni mbi nyon. A komanse na lango ni so, mbi yeda na aye mingi ti sioni ni. Hio na pekoni, mbi yeke nyon mbangi, mbi yeke nyon sämba ahon ndo ni, na nga mbi yeke sara lango-sioni. Tongana angu ayeke hon, mbi nyon angangu mbangi na mbi ga ngbâa ti mingi ti ambangi ni so. Mbi tï tâ na yâ ni ngangu, a sara si ti wara ambangi ni ti nyon, mbi yeke kä nga ambeni.

Me lakue bê ti mbi atene na mbi atene ye so mbi yeke sara so ayeke nzoni oko ape, me mbi ngbâ gi ti sara ye ni so. Ti mbi, mbi tene mbi buba ti mbi awe. Atâa so mbi na akamarade ti mbi e yeke gue ka na amatanga nga ti mä aconcert, mbi bâ ka so mbi yeke gi mbi oko, na vundu ayeke sara ka mbi nga. A si ka so mbi yeke pensé na anzoni sarango ye ti babâ na mama ti mbi, si mbi hunda tere ti mbi, mbi tene a sara tongana nyen si mbi hon tâ yongoro tongaso so?

LEGE SO BIBLE ACHANGÉ FINI TI MBI:

Atâa so mbi pensé so mbi buba ti mbi awe, ambeni zo abâ ti ala aye ni nde. Na ngu 2000, babâ na mama ti mbi atisa mbi na mbeni kota bungbi ti district ti aTémoin ti Jéhovah. Na bê ti mbi, mbi ye ape, me kamême mbi gue. Mbi ye ti bâ, aita ti mbi ni use so amû peko ti mbi so, ala nga kue ague.

Na kota bungbi ni kâ, mbi dabe ti mbi so a sara ngu oko awe mbi ga lani na oko ndo ni so ti mä bia ti ambeni zo. Me ye so mbi bâ na kota bungbi ti aTémoin ni ayeke tâ nde mingi na aye so mbi bâ lani na ngoi ti concert ni so. Lani, asaleté asi yâ ti ndo ni, nga guru ti manga amû ndo ni kue. Mingi ti azo so ague ti mango concert ni ayeke sara ka ti amba ti ala ape, nga atënë ti yâ ti abia ni asara zo nzoni ape. Me na aTémoin ge, mbi wara gi anzoni zo, azo so ayeke biani na ngia. Ala yamba mbi nzoni, atâa a sara ngu mingi awe si e bâ tere ape. Ndo ni ayeke propre, nga atënë so a fa ge adë bê ti zo. Na bango anzoni ye so fango ye ti Bible asara na ndo ti zo, mbi tene tâ nyen la asara mbi si mbi ke ni so?​—Ésaïe 48:17, 18.

Tâ gi na peko ti kota bungbi ni, mbi leke na bê ti mbi ti kiri na aTémoin ti Jéhovah. Aita ti mbi nga asara tongaso. Ye so ala bâ kâ na kota bungbi ni apika nga bê ti ala mingi. Li ti e ota kue e yeda ti tene a manda Bible na e.

Versê so andu bê ti mbi mingi ayeke versê ti Jacques 4:8, so atene: “Ala ga nduru na Nzapa, na fade lo yeke ga nduru na ala.” Mbi manda so tongana mbi ye ti ga nduru na Nzapa, a lingbi mbi changé fini ti mbi. Ambeni ye so a lingbi mbi zia lege ni ayeke nyongo manga nga na mbangi. A lingbi mbi zia nga lege ti nyongo sämba ahon ndo ni.​—2 aCorinthien 7:1.

Mbi fâ yâ ti kamarade na angbene kamarade ti mbi, na mbi sara kamarade na azo so ayeke voro Jéhovah. Ita ancien so ayeke manda Bible na mbi amû maboko na mbi mingi. Lo yeke manke ka ti iri mbi na téléphone ape, nga tongana lo gue na mbeni ndo si lo hon na yanga-da ti mbi, lo yeke luti ka ti bâ mbi. Ye so asara si mbi na lo e ye tere mingi.

Na ngu 2001, mbi wara batême mbi ga Témoin ti Jéhovah. Aita ti mbi use so nga kue awara batême na oko ngu ni so. So ngia si babâ, mama na ngambe ti mbi ti koli so angbâ be-ta-zo na Jéhovah aduti na ni ti bâ so sewa ni kue abungbi oko fadeso ti voro Jéhovah!

NZONI YE SO MBI WARA NA PEKONI:

Mbi pensé ti mbi lani mbi tene andia ti Bible akanga lege na zo mingi, me fadeso mbi bâ ni tongana ye so ayeke bata zo, na mbeni ye ti lingbi na ni ayeke dä ape. Bible amû ngangu na mbi ti zia lege ti nyongo mbangi na ti kango ni, na mbi ga mbeni nzoni zo ti kodoro.

Tere ti mbi anzere ti duti oko ti azo so ayeke voro Jéhovah na ndo ti sese mobimba. Biani, azo so aye tere na popo ti ala, nga kangbi ayeke na yâ ti vorongo ti ala ape (Jean 13:34, 35). Mbeni ye ti nzoni ni nga so mbi wara so ayeke wali ti mbi Adrianne, so mbi ye lo mingi. Mbi na lo e yeke na ngia mingi ti voro Jéhovah, Lo so asara dunia kue.

Ahon ti gi gi aye ti sese so, mbi mû bê ti mbi kue na kua ti Nzapa, mbi yeke fa na azo ye so ala nga kue alingbi ti sara ti wara anzoni ye so Bible afa. Mbeni kua ti mû ngia na mbi ahon so ayeke dä ape. Biani, a yeke na kite ape si mbi tene so Bible achangé fini ti mbi. Mbi wara tâ liberté ni awe.