MO HINGA?

A-Juif ti ândö ayeke leke lani kuâ ti ala tongana nyen ti tene a lu ni?

A-Juif ayeke lu lani akuâ ti ala hio mingi, mingi ni gi na oko lango so zo ni akui. A yeke ndali ti araison use si ala yeke lu akuâ ti ala lani hio. Kozo raison ni ayeke so ndowa ayeke lani mingi na mbage kâ na kuâ aninga ti buba pëpe. Use raison ni ayeke so ti azo ti ngoi ni kâ, tongana a lu kuâ ti mbeni zo hio pëpe teti ambeni lango ayeke ga na kamene na ndo ti kuâ ni nga na ndo ti asewa ti lo.

A-Évangile nga na mbeti ti Kusala asara tënë ti azo osio tongaso so a lu kuâ ti ala gi na oko lango so ala kui na ni (Matthieu 27:57-60; Kusala 5:5-10; 7:60–8:2). Angu ngbangbo mingi kozoni, Rachel wali ti Jacob so lo ye lo mingi akui na ngoi so lo na Jacob na asewa ni kue ayeke gue na mbeni yongoro tambela. Ahon ti tene Jacob akiri na kuâ ni na ndo so ala yeke lu akuâ ti afami ti ala dä, Jacob alu lo na yâ ti mbeni dû ti kuâ “na lege ti . . . Bethléhem.”​—Genèse 35:19, 20, 27-29.

Na yâ ti Bible, ambaï so andu tënë ti lungo akuâ afa so aJuif ayeke sara kua mingi ti leke akuâ nzoni kozoni si ala lu ni. Asewa nga na akamarade ayeke sukula kuâ ni, ala kpaka épice nga na mafuta na tere ti kuâ ni na ala rulê ni na abongo (Jean 19:39, 40; Kusala 9:36-41). Avoizin nga na ambeni zo ayeke ga ti toto kuâ ni nga ti dë bê ti asewa ni.​—Marc 5:38, 39.

A lu lani Jésus gi tongana ti so aJuif ayeke lu ka na akuâ ti ala?

A-Juif mingi ayeke lu lani akuâ na yâ ti adû ti tênë nga na adû ti kuâ so a zi ni na yâ ti atênë so akpengba mingi pëpe si ayeke na ando nde nde na kodoro ti Israël. Ala sara ni gi tongana ti so akota wakua ti Nzapa ayeke sara ni ândö. A lu lani Abraham, Sara, Isaac, Jacob nga na ambeni na yâ ti adû ti tênë so ayeke na Macpéla nduru na Hébron.​—Genèse 23:19; 25:8, 9; 49:29-31; 50:13.

A lu lani Jésus na yâ ti mbeni dû ti kuâ so a zi ni na yâ ti mbeni kota tênë (Marc 15:46). Mingi ti mara ti adû ti kuâ tongaso mbeni kete lege ti lingo na yâ ni ayeke dä. Na yâ ni, a yeke wara gbâ ti ambeni dû ni, wala ambeni ndo so akpa armoire, so a koro ni na yâ ti kota dû ti tênë ni ti tene a zia kuâ ti asewa ni dä. Na peko ti so kuâ ni afun kue awe, a yeke ro abio ti kuâ ni ti zia na yâ ti mbeni boîte so a sara ni na tênë, a yeke tongaso si a yeke lu akuâ na ngoi ti Jésus. So ala ro abio ni awe, tongana mbeni zo akui ande place ayeke dä ti tene a gue a lu lo dä.

Ndia ti Moïse ake na aJuif ti leke kuâ ti lungo ni na lango ti Sabbat. Teti so Jésus akui ngbonga ota kozoni si lango ti Sabbat akomanse, Joseph zo ti Arimathée nga na ambeni zo so alu lo awara lege pëpe ti leke kuâ ti lo ni kue (Luc 23:50-56). Ndani la, ambeni kamarade ti Jésus ague lani na yanga ti dû ti kuâ ti lo na peko ti Sabbat ni ti tene ala hunzi lekengo kuâ ti lo ni.​—Marc 16:1; Luc 24:1.