Sara kusala ti mo ti wafango nzoni tënë nzoni

1. Ngbanga ti nyen a iri Jéhovah kozo kota Wafango nzoni tënë?

JÉHOVAH NZAPA la ayeke kozo kota Wafango nzoni tënë. Hio na peko ti kengo yanga ti kozo babâ na mama ti e, Jéhovah afa mbeni nzoni tënë atene a yeke futi ande ngbo ni, Satan Zabolo (Gen. 3:15). Na yâ ti angu ngbangbo mingi, Jéhovah apusu akoli be-ta-zo, na lege ti yingo ti lo, ti sû anzene nzene tënë na ndo ti lege so lo yeke zi ande zonga so a bi na ndo ti iri ti lo, lege so lo yeke leke ande akpale so Satan aga na ni nga tongana nyen la azo ayeke kiri ti wara aye ti nzoni so Adam na Ève agirisa ni lani.

2. (a) Aye wa a-ange asara na yâ ti kua ti fango nzoni tënë? (b) Na lege wa Jésus ayeke mbeni nzoni tapande teti awafango nzoni tënë?

² A-ange nga kue ayeke awafango nzoni tënë. Ala wani ayeke fa nzoni tënë nga ala yeke mû maboko na azo ti fa ni (Luc 1:19; 2:10; Kus. 8:26, 27, 35; Apoc. 14:6). Ka ti Michel Archange? Na ngoi so lo yeke lani na sese na a hinga lo na iri ti Jésus, lo fa na azo tongana nyen ti sara kua ti wafango nzoni tënë. Jésus amû lani fini ti lo kue ti fa nzoni tënë.​—Luc 4:16-21.

3. (a)  Nzoni tënë wa la e yeke fa? (b) Ahundango ndo wa e awafango nzoni tënë e yeke gi ti gbu li dä?

³ Jésus amû yanga na adisciple ti lo ti duti awafango nzoni tënë (Mat. 28:19, 20; Kus. 1:8). Bazengele Paul awa Timothée mba ti lo wakua, lo tene: “Sara kusala ti wafango nzoni tënë, sara kusala ti mo ni kue.” (2 Tim. 4:5). Nzoni tënë wa la e adisciple ti Jésus e yeke fa? E yeke fa na azo so Jéhovah, Babâ ti e ti yayu, andoye e (Jean 3:16; 1 Pi. 5:7). Mbeni kpengba lege so Jéhovah Nzapa afa ndoye ti lo na mbage ti e ayeke Royaume ti lo. Ni la, e yeke na ngia ti fa na azo so azo kue so awoko tere ti ala na gbe ti Royaume, amä yanga ti Nzapa nga asara ye so ayeke mbilimbili alingbi ti duti na nzoni songo ti kamarade na lo (Ps. 15:1, 2). Ye so Jéhovah aleke na bê ti lo ti sara ayeke ti zi apasi kue. Lo yeke zi nga vundu so zo ayeke wara tongana lo dabe ti lo na apasi so asi na lo ândö. So tâ nzoni tënë! (És. 65:17). Teti so e yeke awafango nzoni tënë, zia e gbu li na ndo ti akiringo tënë na akota hundango ndo use so: Ngbanga ti nyen a yeke kota ye ti tene azo amä nzoni tënë laso? E lingbi ti sara nyen ti sara kusala ti e ti awafango nzoni tënë nzoni?

NDANI SO AZO AYEKE NA BEZOIN TI MÄ NZONI TËNË

4. Atënë wa so ayeke tâ tënë pëpe ngoi na ngoi a yeke tene na azo na ndo ti Nzapa?

⁴ Tara ti bâ so a tene na mo a tene babâ ti mo ake mo na tanga ti azo ti sewa ti mo kue. Azo so atene ala hinga babâ ti mo atene so lo yeke bi bê ti lo na zo pëpe, lo yeke fa atënë ti bê ti lo na zo pëpe nga lo yeke sioni. Ambeni alingbi même ti gue na mo ti pensé so a yeke nga kota ye pëpe ti tene mo gi ti kiri ti lë songo na babâ ti mo ndali ti so lo kui awe. A tene mara ti atënë so na azo mingi na ndo ti Nzapa. A fa na ala so Nzapa ayeke mbeni zo so zo ahinga li ti lo na lo pëpe, mbeni zo so zo alingbi ti hinga lo pëpe wala so lo yeke sioni. Na tapande, ambeni kota zo ti abungbi ti vorongo nzapa atene so Nzapa ayeke punir asioni zo na yâ ti enfer teti lakue lakue. Ambeni zo atene so Nzapa la ayeke sara si azo abâ pasi na lege ti aye tongana angu so asuku amû ndo wala asese so ayengi. Atâa so anzoni zo nga na asioni zo ayeke kui na yâ ti akpale so, azo atene so a yeke punition ti Nzapa la.

5, 6. Na lege wa tënë ti évolution nga na afango ye ti wataka asara ngangu mingi na ndo ti azo?

⁵ Ambeni zo atene so Nzapa ayeke dä ape nga e ga na lege ti anyama. Azo so amû mbage ti tënë ti évolution atene so fini abâ gigi gi tongaso na bê ti lo wani nga so Wasarango ye ayeke dä ape. Ambeni atene so teti so azo aga na lege ti nyama, a yeke ye ti dongo bê pëpe tongana azo asara ye tongana anyama. Ala tene so tongana azo so ayeke ngangu akomande na ngangu na ndo ti ala so awoko, a yeke na lege ni, ndia ti gigi ni ayeke tongaso. A yeke ye ti dongo bê pëpe tongana azo mingi apensé so aye ti kirikiri ayeke duti dä lakue. Tongaso, azo so amä na bê na tënë ti évolution ayeke na tâ beku pëpe teti gigi ti kekereke.

⁶ Biani, tënë ti évolution nga na afango ye ti wataka asara si azo ayeke na yâ ti mawa na alango ti nda ni so (aRom. 1:28-31; 2 Tim. 3:1-5). Afango ye so ayeke pëpe nzoni tënë. Me, tongana ti so bazengele Paul afa, a sara si “hingango ndo ti [azo] ayeke na yâ ti bingo, nga ala gue yongoro na fini so alondo na Nzapa”. (aÉph. 4:17-19) Tënë ti évolution na afango ye ti wataka akanga nga lege na azo ti yeda na nzoni tënë so alondo na Nzapa.​—Diko aÉphésien 2:11-13.

7, 8. Oko ye so azo alingbi ti sara ti hinga nzoni tënë ayeke nyen?

⁷ Tongana azo aye ti lë songo na Nzapa, kozoni kue a lingbi ala hinga so Jéhovah ayeke dä nga so ala yeke na anzoni raison ti lë songo na lo. E lingbi ti mû maboko na ala ti hinga aye so tongana e wa ala ti gbu li na ndo ti aye so Nzapa acréé. Tongana azo agi na nzoni bibe ti hinga ye na ndo ti aye so Nzapa acréé, ala yeke hinga so Nzapa ayeke na ndara nga lo yeke na ngangu (aRom. 1:19, 20). E lingbi ti sara kua na brochure La vie a-t-elle été créée? nga na brochure Cinq questions à se poser sur l’origine de la vie ti mû maboko na ala ti bâ so gbâ ti aye so Kota Wasarango ye asara ayeke ye ti dongo bê. Me ambeni hundango ndo ayeke dä so zo so amanda ye gi na ndo ti création alingbi ti kiri tënë na ni pëpe. Na tapande, ngbanga ti nyen Nzapa azia lege na pasi? Nyen la Nzapa aleke ti sara teti sese? Nzapa ayeke bi bê ti lo na mbi la?

⁸ A yeke gi na lege ti mandango Bible la azo alingbi ti hinga nzoni tënë na ndo ti Nzapa nga na ye so lo leke na bê ti lo ti sara. E yeke na kota pasa ti mû maboko na azo ti wara akiringo tënë na ahundango ndo ti ala. Ti ndu bê ti azo so ayeke mä e, a lingbi e gi gi pëpe ti fa na ala atâ tënë, me e ga na ala ti ye peko ti aye so ala manda (2 Tim. 3:14). E lingbi ti ga mbeni zo so ahinga nzoni mingi tongana nyen ti ga na azo ti ye peko ti mbeni ye tongana e mû tapande ti Jésus. Nyen la amû maboko na lo ti ga na azo ti ye peko ti aye? Mbeni ye so amû maboko na lo ayeke so lo yeke sara kua nzoni na ahundango ndo. E lingbi ti sara nyen ti mû tapande ti lo?

ANZONI WAFANGO TËNË ASARA KUA NZONI NA AHUNDANGO NDO

9. Nyen la a lingbi e sara tongana e ye ti mû maboko na azo na lege ti yingo?

⁹ Ngbanga ti nyen a yeke nzoni e sara kua na ahundango ndo, tongana ti Jésus, na ngoi so e yeke fa tënë? Gbu li na ndo ti tapande so: Mbeni docteur atene na mo so lo yeke na mbeni nzoni tënë ndali ti mo. Lo tene so tongana lo sara mbeni ngangu opéré na mo, mo yeke wara sava. Mo lingbi ti mä na bê na lo. Ka tongana lo tene na mo tënë ni so kozo ti tene lo hunda atënë na mo na ndo ti seni ti mo? Peut-être a yeke duti ngangu na mo ti duti na confiance na lo. Atâa akode ti docteur ni ayeke tongana nyen, ti tene lo mû maboko na mo nzoni, a lingbi lo hunda mo na ndo ti ye so ayeke son mo nga lo dengi mê nzoni lo mä mo kozo awe si. Legeoko nga, tongana e ye ti mû maboko na azo ti yeda na nzoni tënë ti Royaume, a lingbi e hinga ti sara kua nzoni na ahundango ndo. E lingbi ti mû maboko na ala gi tongana e hinga dutingo ti ala na lege ti yingo nzoni awe si.

10, 11. Tongana e mû tapande ti fango ye ti Jésus, aye wa e lingbi ti sara?

¹⁰ Jésus ahinga so ahundango ndo so a soro ni nzoni ayeke mû maboko na mbeni wafango ye ti hinga zo so lo yeke fa ye na lo nga ayeke mû lege na wamandango ye ni ti gbu li nga ti fa bango ndo ti lo. Na tapande, na ngoi so Jésus aye ti fa ye na adisciple ti lo na ndo ti sarango tere kete, lo hunda kozoni na ala mbeni tënë so apusu ala ti sara tënë (Marc 9:33). Mbeni lâ Jésus ahunda tënë na Pierre, lo fa na Pierre akiringo tënë use, na pekoni lo hunda na Pierre ti fa nzoni kiringo tënë ni. Ye so amû maboko na Pierre ti hinga mbeni kpengba ye (Mat. 17:24-26). Na mbeni ngoi nde, tongana Jésus aye ti hinga ye so ayeke na yâ ti bê ti adisciple ti lo, lo hunda na ala mbeni molongo ti atënë so apusu ala ti fa bango ndo ti ala. (Diko Matthieu 16:13-17.) Jésus afa gi pëpe na azo ye so a lingbi ala sara. Na sarango kua na ahundango ndo, lo ndu bê ti azo nga lo pusu ala ti sara ye alingbi na nzoni tënë.

¹¹ Tongana e mû tapande ti Jésus na e sara kua nzoni na ahundango ndo, e yeke sara aye ota. E yeke hinga tongana nyen ti mû maboko na azo nzoni, e yeke hon ndo ti aye so alingbi ti kanga lege na e ti sara lisoro na azo nga e yeke fa na azo so asara tere ti ala kete tongana nyen ti bâ nzoni na lege ti ye so ala manda. Zia e bâ atapande ota so afa tongana nyen e lingbi ti sara kua nzoni na ahundango ndo.

12-14. Mo lingbi ti sara nyen ti mû maboko na molenge ti mo ti sara mbeto pëpe ti fa nzoni tënë? Fa mbeni tapande.

¹² Kozo tapande ni: Tongana mo yeke babâ wala mama, nyen la mo yeke sara tongana molenge ti mo so aga maseka awe atene na mo so lo yeke na mbeto ti fa atënë ti mabe ti lo na ndo ti tënë ti création na ambeni mba ti lo ti klase? Kite ayeke pëpe so mo yeke ye ti mû maboko na lo ti sara mbeto pëpe ti fa nzoni tënë. Tongaso, ahon ti suku na lo wala ti gi hio ti fa na lo ye so lo lingbi ti sara, ngbanga ti nyen mo mû pëpe tapande ti Jésus na mo hunda na lo ambeni hundango ndo ti hinga bango ndo ti lo? Mo lingbi ti sara tongana nyen ti sara ni?

¹³ Na pekoni so mo na lo adiko ambeni mbage ti brochure Cinq questions à se poser sur l’origine de la vie, mo lingbi ti hunda lo ti fa ambeni tënë so lo bâ so alingbi ti pusu zo ti gbu li ti lo. Wa lo ti fa araison so aga na lo ti yeda so Wasarango ye ayeke dä nga ndani so lo ye ti sara ye so bê ti Nzapa aye (aRom. 12:2). Fa na molenge ti mo ni so araison ti lo alingbi ti duti nde na ti mo.

¹⁴ Fa na molenge ti mo so na ngoi so lo yeke fa ye na mbeni mba ti lo ti klase, lo lingbi ti sara ye tongana ti so mo na lo asara so. Molenge ti mo alingbi ti kiri ti bâ ambeni tâ tënë nga ti hunda ambeni tënë so ayeke pusu zo ti fa atënë ti bê ti lo. Na tapande, lo lingbi ti hunda na mba ti lo ti klase ni ti diko encadré ti lembeti 21 ti brochure Origine de la vie. Na pekoni, lo lingbi ti hunda mba ti lo ni, lo tene: “A yeke tâ tënë so ngangu so ADN ayeke na ni ti bata na asango, laso mbeni ordinateur ayeke na ni pëpe?” Peut-être mba ti lo ni ayeke tene EN. Na pekoni lo lingbi ti hunda na mba ti lo ni: “Tongana mbeni wakode ti lekengo ordinateur ayeke pëpe na kode ti leke ordinateur ti bata asango tongana ti ADN, tongana nyen la mbeni ye so ayeke na hingango ndo pëpe alingbi ti sara ye so gi lo oko tongaso?” Mo na molenge ti mo alingbi ti sara adémonstration tongaso lakue ti mû maboko na lo ti sara mbeto pëpe na ngoi so lo yeke sara lisoro na azo na ndo ti atënë ti mabe ti lo. Tongana mo fa na lo ti sara kua nzoni na ahundango ndo, mo yeke mû maboko na lo ti ga nzoni wafango nzoni tënë.

15. Tongana nyen la e lingbi ti sara kua na ahundango ndo ti mû maboko na mbeni zo so atene Nzapa ayeke dä ape?

¹⁵ Use tapande ni: Na fango tënë, e yeke wara azo so atene Nzapa ayeke dä ape. Na tapande, mbeni zo alingbi ti tene so ti lo Nzapa ayeke dä ape. Ahon ti zia si tënë so akanga lege na e ti sara lisoro na lo, na mbeni lege so ane zo e lingbi ti hunda lo e tene: ‘Depuis ngu oke la mo mä na bê so Nzapa ayeke dä ape so? Nyen la apusu mo ti duti na mara ti bango ndo so?’ Na pekoni so e mä akiringo tënë ti lo nga e gonda lo ndali ti so tënë so agbu bê ti lo, e lingbi ti hunda lo wala lo bâ so a yeke sioni ti diko mbeni mbeti so afa so aye kue so ayeke na fini abâ gigi gi tongaso pëpe, me a sara ni sarango. Tongana lo yeke na nzoni bibe, lo lingbi ti tene so a yeke na lege ni pëpe ti ke ti diko mbeni mbeti tongaso. E lingbi ti mû na lo brochure La vie a-t-elle été créée? Wala brochure Cinq questions à se poser sur l’origine de la vie. Tongana e sara ye na ndara nga e hunda tënë na nzoni bê, e lingbi ti sara si nzoni tënë andu bê ti zo ni.

16. Ngbanga ti nyen a lingbi e zia pëpe si mbeni wamandango ye adiko gi dikongo akiringo tënë so ayeke na yâ ti mbeti so lo yeke manda?

¹⁶ Ota tapande ni: Na ngoi so e yeke manda Bible na mbeni zo, nyen la alingbi ti si tongana e zia zo ni adiko gi dikongo akiringo tënë so ayeke na yâ ti mbeti ni? A lingbi ti kanga lege na lo ti gue na li ni na lege ti yingo. Ndali ti nyen? Ndali ti so mbeni wamandango ye so ayeke diko gi dikongo akiringo tënë sân ti gbu li na ndo ni ayeke tongana mbeni keke so gunda ni alï pëpe. A lingbi ti duti ngangu na mara ti wamandango ye tongaso ti ngbâ na yâ ti tâ tënë na ngoi so azo akanga lege na lo (Mat. 13:20, 21). Ti mû maboko na zo so e yeke manda Bible na lo, a lingbi e hunda na lo ti fa tënë ti bê ti lo na ndo ti ye so lo yeke manda so. Gi ti bâ wala lo yeda na aye so lo manda so. A yeke kota ye mingi ti hunda na lo ti fa ndani so lo yeda na mbeni ye wala lo ke ye ni. Na pekoni, mû maboko na lo ti gbu li na ndo ti aye so Bible afa ti tene na nda ni lo wani lo mû anzoni desizion (aHéb. 5:14). Tongana e sara kua nzoni na ahundango ndo, azo so e yeke fa ye na ala ayeke wara kpengba mabe nga ala yeke wara lege ti dö sese na azo so asara ngangu na ala wala ahanda ala (aCol. 2:6-8). Mbeni ye nde wa la e lingbi ti sara ti sara kua ti e ti wafango nzoni tënë nzoni?

ANZONI WAFANGO TËNË AYEKE MÛ MABOKO NA MBA

17, 18. Tongana e na mbeni ita e yeke fa tënë, e lingbi ti sara tongana nyen ti sara kua maboko na maboko?

¹⁷ Jésus atokua lani adisciple ti lo use use ti fa tënë (Marc 6:7; Luc 10:1). Bazengele Paul nga asara tënë ti “amba ti [lo] wakua” so “atiri na tere ti [lo] ndali ti nzoni tënë ni”. (aPhil. 4:3). Ti gue oko na atapande so ayeke na yâ ti Bible so, na ngu 1953, awafango tënë ti Royaume ato nda ti mbeni kapa ti mungo maboko na amba ti ala na fango tënë.

¹⁸ Na ngoi so mo na mbeni ita ayeke fa tënë, mo lingbi ti sara tongana nyen ti sara kua maboko na maboko na lo? (Diko 1 aCorinthien 3:6-9.) Bâ na yâ ti Bible ti mo aversê so mba ti mo ayeke sara kua na ni. Dengi mê mo mä mba ti mo ni nga na zo so lo yeke fa tënë na lo na ngoi so ala yeke sara tënë. Dengi mê nzoni na lisoro ni si tongana zo ni asigigi na mbeni tënë ti kanga lege, mo lingbi ti mû maboko na mba ti mo ni tongana a hunda ti sara ni (Zo-ti. 4:12). Ye oko, sara hange: Kpe ti fâ tënë na yanga ti mba ti mo na ngoi so lo yeke sara kua na mbeni nzoni kode ti fango ye. Ti fâ tënë hio hio na yanga ti mba ti mo alingbi ti sara si bê ti lo anze nga li ti zo so lo yeke fa tënë na lo aga kirikiri. Na ambeni ngoi, a yeke peut-être nzoni ti tene mo tene ambeni tënë. Me tongana mo ye ti tene mbeni tënë, sara gi tënë nduru. Na pekoni, zia lege na mba ti mo ni ti sara tanga ti lisoro ni.

19. Nyen la a yeke nzoni e dabe ti e na ni? Ngbanga ti nyen?

¹⁹ Na lege wa mo na mba ti mo alingbi ti mû maboko na mba na ngoi so ala londo na mbeni da ti gue na mbeni? Ngbanga ti nyen ala mû pëpe ngoi so ti sara lisoro na ndo ti aye so ala lingbi ti sara si fango tënë ti ala aga nzoni ahon ti kozo? Ala sara hange si atënë so ala yeke tene na ndo ti azo ti territoire ni aduti pëpe atënë so asara si bê ti zo anze. Ala luti pëpe na ndo ti awoko ti amba ti ala awafango nzoni tënë (aProv. 18:24). A yeke nzoni e dabe ti e so e yeke ata ti sese. Jéhovah asara kota nzoni bê na e na lege so lo mû na e mosoro so ayeke kua ti fango nzoni tënë. (Diko 2 aCorinthien 4:1, 7.) Tongaso, zia e kue e fa so e bâ mosoro so na nene ni na lege so e yeke sara kue ti ga anzoni wafango nzoni tënë.