Jéhovah amû ye mingi na zo nga lo sara ye alingbi na dutingo ti zo oko oko
“[Jéhovah] asara nzoni na azo kue, na nzobe ti Lo ayeke na ndo kusala ti Lo kue.”—PS. 145:9.
1, 2. Azo so ayeke na songo na Jéhovah ayeke na pasa wa?
MBENI ita-wali so iri ti lo Monika atene: “E sara mariage aga nduru ti sara ngu 35 awe. Mbi na koli ti mbi e hinga tere nzoni mingi. Me atâa angu so kue, e ngbâ ti manda ambeni ye so ade e hinga ni na ndo ti mba pëpe.” Azo mingi atene mara ti tënë so awe na ndo ti koli wala wali ti ala wala na ndo ti akamarade ti ala.
2 E ye ka ti hinga ye mingi na ndo ti azo so e ndoye ala. Ye oko, songo ti e na Jéhovah la ayeke kota mingi ahon tanga ti asongo kue. E yeke hinga ande ye kue na ndo ti Jéhovah pëpe (aRom. 11:33). Na ngoi so e yeke ngbâ na fini lakue lakue, e yeke wara pasa ti kiri ti hinga asarango ye ti Jéhovah nzoni mingi nga a yeke mû na e ngia mingi.—Zo-ti. 3:11.
3. Aye wa e yeke bâ na yâ ti article so?
3 Article so ahon amû maboko na e ti kiri ti bâ na nene ni mingi ambeni sarango ye ti Jéhovah use. E manda so lo ye si azo aga nduru na lo nga lo yeke sara kangbi na popo ti azo pëpe. Na yâ ti article so, e yeke bâ tongana nyen Jéhovah amû ye mingi na zo nga lo sara ye alingbi na dutingo ti zo oko oko. Ye so ayeke mû maboko na e ti hinga nzoni mingi so “[Jéhovah] asara nzoni na azo kue, na nzobe ti Lo ayeke na ndo kusala ti Lo kue.”—Ps. 145:9.
JÉHOVAH AMÛ YE MINGI NA ZO
4. Tongana nyen zo ayeke fa so lo mû ye mingi na zo?
4 Tongana nyen la zo ayeke fa so lo mû ye mingi na zo? Tënë ti Jésus so ayeke na Kusala 20:35 amû maboko na e ti wara kiringo tënë ni. Versê ni atene: “Ngia ayeke mingi tongana zo amû ye na zo ahon ti wara ye na maboko ti zo.” Tongaso, zo so amû ye mingi na zo ayeke mbeni zo so ayeke na ngia ti mû ngoi ti lo, ngangu ti lo nga na amosoro ti lo ti mû maboko na azo. Biani, kota ye ni ayeke pëpe wungo ti aye so lo mû na zo, me ye so apusu lo ti mû ye ni. (Diko 2 aCorinthien 9:7.) Mbeni zo so amû ye mingi na zo ahon Jéhovah, “Nzapa so ayeke na ngia,” ayeke pëpe.—1 Tim. 1:11.
5. Na lege wa Jéhovah afa so lo mû ye mingi na zo?
5 Na lege wa Jéhovah afa so lo mû ye mingi na zo? Bible atene: “[Jéhovah] asara nzoni na azo kue”. Lo mû na azo kue aye so ala yeke na bezoin ni, même ala so avoro lo pëpe. Lo “sara si lâ ti lo asu na ndo ti azo ti sioni nga na azo ti nzoni. Na lo sara si ngu-nzapa apika na ndo ti azo ti mbilimbili nga na azo ti mbilimbili pëpe.” (Mat. 5:45). A yeke ndali ni la na ngoi so Paul ayeke sara tënë na ambeni zo so ayeke aChrétien pëpe, lo tene so Jéhovah asara ‘anzoni ye na ala na mungo na ala ngu-nzapa so alondo na nduzu, angoi so alê ti kobe ayeke lë dä mingi nga na akobe mingi mingi na lo sara si ngia asi bê ti ala.’ (Kus. 14:17). Biani, Jéhovah amû ye mingi na azo kue.—Luc 6:35.
6, 7. (a) Azo wa la Jéhovah ayeke ka na ngia ti mû na ala ye so ala yeke na bezoin ni? (b) Tapande wa afa so Jéhovah ayeke bâ lege ti abezoin ti awakua be-ta-zo ti lo?
6 Jéhovah ayeke ka na ngia mingi ti mû na awakua be-ta-zo ti lo aye so ala yeke na bezoin ni. Gbia David atene: “Mbi yeke pendere giriri, na fadeso mbi yeke mbakoro; me mbi bâ Nzapa azia zo ti mbilimbili lâ oko pëpe, wala ahale ti lo ahunda kobe pëpe na lege ti yongo ye.” (Ps. 37:25). A-Chrétien be-ta-zo mingi abâ na yâ ti fini ti ala wani tongana nyen Jéhovah abâ lege ti ala. Zia e bâ mbeni tapande ni.
7 Na yâ ti ambeni ngu so ahon, Nancy, mbeni wakua ti ngoi kue, atingbi na mbeni kpale. Lo tene: “Mbi yeke lani na bezoin ti dollar 66 ti futa na da so mbi loué ni, na lango ti futango ni ayeke na ndade ni. Mbi hinga tongana nyen ti wara nginza ni ape. Mbi sambela na ndo ti tënë ni, na pekoni mbi gue na kua so mbi yeke sara na yâ ti mbeni restaurant. Mbi yeke wara ka kete nginza na maboko ti azo so aga avo kobe ate. Mbi ku tere ti mbi pëpe ti wara gbâ ti nginza na lakui ni so ndali ti so a yeke mbeni lango ti yâ ti yenga na azo ayeke ga ka mingi ape. Me mo ye ti bâ, gbâ ti azo aga ate kobe na yâ ti restaurant ni na bï ni so. Na ngoi so mbi hunzi kua nga mbi bungbi akete nginza so mbi wara, a si dollar 66.” Nancy ahinga biani so Jéhovah la amû lani maboko na lo ti wara tâ ye so lo yeke na bezoin ni.—Mat. 6:33.
8. Matabisi ti Jéhovah so ahon atanga ni kue so afa so lo mû ye mingi na azo ayeke so wa?
8 Zo kue alingbi ti bâ nzoni na lege ti matabisi ti Jéhovah so ahon atanga ni kue. A yeke matabisi wa? A yeke ngere so Molenge ti lo afuta ti zi na azo. Jésus atene: “Nzapa andoye tâ azo ti dunia so mingi si lo mû gi oko Molenge ti lo ndali ti ala, si zo kue so amä na bê na lo, a lingbi ti futi lo pëpe, me lo wara fini ti lakue lakue.” (Jean 3:16). Jéhovah amû matabisi so ahon atanga ni kue na azo kue so ayeda na ni. Azo so amä na bê na Jésus ayeke wara ande fini ti lakue lakue! (Jean 10:10). Sandaga ti Jésus ayeke kota fä so ahon atanga ni kue so afa so Jéhovah amû ye mingi na azo.
MÛ TAPANDE TI JÉHOVAH SO AMÛ YE MINGI NA ZO
9. E lingbi ti sara nyen ti mû tapande ti Jéhovah so amû ye mingi na azo?
9 E lingbi ti sara tongana nyen ti mû tapande ti Jéhovah so amû ye mingi na zo? Jéhovah “amû aye kue mingi mingi na e si e wara ngia dä”; ni la a yeke nzoni e “duti nduru ti kangbi ye” na azo ti sara si ala duti na ngia (1 Tim. 6:17-19). E yeke na ngia ti mû nginza ti e ti vo ye na azo so e ye ala nga ti mû maboko na azo so ye amanke ala. (Diko Deutéronome 15:7.) Nyen la alingbi ti mû maboko na e ti dabe ti e so a lingbi e duti azo so amû ye mingi na azo? Ambeni ita amû desizion ti tene lakue tongana ala wara mbeni matabisi, ala yeke gi nga mbeni lege ti mû matabisi na mbeni zo. Na yâ ti congrégation a yeke wara gbâ ti aita so ayeke na bibe ti mungo ye na zo.
10. Mbeni nzoni lege ti tene e mû ye mingi na azo ayeke so wa?
10 Mbeni nzoni lege ti tene e mû ye mingi na azo ayeke ti mû ngoi ti e nga na ngangu ti e ti mû maboko na azo nga ti kpengba ala (aGal. 6:10). Mo yeke mû ngoi ti mo nga na ngangu ti mo ti kpengba azo? Hunda tere ti mo: ‘Mbi yeke fa so mbi yeke nduru ti mä azo? Tongana mbeni zo ahunda mbi ti mû maboko na lo ti sara mbeni ye wala ti gue tokua na lo, mbi yeke nduru ti mû maboko na lo? Lawa si ti ndangba ni mbi gonda mbeni zo ti sewa ti mbi wala mbeni zo na yâ ti congrégation?’ Tongana e “mû ye lakue na azo,” e yeke bâ so songo ti e na Jéhovah nga na akamarade ti e akpengba mingi.—Luc 6:38; aProv. 19:17.
11. Na ambeni lege wa e lingbi ti mû ye mingi na Jéhovah?
11 E lingbi nga ti mû ye mingi na Jéhovah. Bible awa e ti gonda Jéhovah na mungo na lo ‘anzoni ye’ ti e (aProv. 3:9). ‘Anzoni ye’ ni so andu ngoi ti e, ngangu ti e nga na amosoro ti e so e lingbi ti mû ni ti sara na kua ti lo. Même akete molenge alingbi ti manda ti duti azo so amû ye mingi na Jéhovah. Jason, mbeni babâ ti sewa, atene: “Tongana sewa ti e aye ti mû offrande na Da ti Royaume, e yeke mû nginza ni na amolenge ti e ti zia ni na yâ ti boîte ti offrande.” Ala ye ni mingi ndali ti so, na ngoi so ala yeke sara ni, ala yeke ‘mû mbeni ye na Jéhovah.’” Tongana na ngoi so amolenge angbâ kete ala bâ so mungo ye na Jéhovah aga na ala ngia, ala yeke ngbâ ti mû ye mingi na lo na ngoi so ala kono.—aProv. 22:6.
JÉHOVAH ASARA YE ALINGBI NA DUTINGO TI ZO OKO OKO
12. Tongana nyen zo ayeke fa so lo sara ye alingbi na dutingo ti zo oko oko?
12 Mbeni oko ti apendere sarango ye ti Jéhovah ayeke so lo yeke sara ye alingbi na dutingo ti zo oko oko. Tongana nyen zo ayeke fa so lo sara ye alingbi na dutingo ti zo oko oko? (Tite 3:1, 2). Zo so ayeke sara ye alingbi na dutingo ti zo oko oko ayeke zo so ayeke luti lakue nganganga pëpe na ndo ti tënë so a sara na mbeti wala tënë ti yanga ti lo ason songo pëpe. Me lo yeke sara ngangu ti sara ye na azo na nzoni bê nga alingbi na dutingo ti ala. Lo yeke nduru ti mä azo, nga tongana a hunda ti sara ni, lo yeke yeda na ye so ala ye, nga ye so lo fa na ala ti sara, lo yeke gbian ni ti lingbi na dutingo ti ala.
13, 14. (a) Na lege wa Jéhovah afa so lo yeke sara ye alingbi na dutingo ti zo oko oko? (b) So Jéhovah asara ye alingbi na dutingo ti Lot afa nyen na e?
13 Na lege wa Jéhovah afa so lo yeke sara ye alingbi na dutingo ti zo oko oko? Na nzoni bê lo yeke bi bê ti lo na atënë ti bê ti awakua ti lo, nga mingi ni lo yeke gbian yâ ti ye ti lingbi na aye so ala hunda. Na tapande, bâ tongana nyen Jéhovah asara ye na Lot zo ti mbilimbili. Na ngoi so Jéhovah amû desizion ti futi gbata ti Sodome na ti Gomorrhe, lo mû yanga polele na Lot ti kpe ti gue na ndo ti ahoto. Ye oko, ndali ti mbeni raison, Lot avoro yanga na Jéhovah ti mû lege na lo ti kpe ti gue na mbeni ndo nde. Gbu li kete: Lot ahunda na Jéhovah ti changé yâ ti aye so Jéhovah ahunda na lo ti sara!—Diko Genèse 19:17-20.
14 Mbeni zo alingbi ti fâ ngbanga hio na ndo ti Lot atene mabe ti lo awoko wala lo ke yanga. Jéhovah alingbi ti bata Lot na fini na ndo kue. Tongaso, Lot ayeke pëpe na raison ti sara mbeto. Me, Mbeto agbu lani Lot, na Jéhovah ayeke nduru ti yeda na ye so Lot ahunda. Jéhovah amû lege na Lot ti kpe ti gue na yâ ti gbata so lo ye fade ti futi ni so. (Diko Genèse 19:21, 22.) A yeke polele so Jéhovah aluti nganganga pëpe nga lo son songo pëpe. Lo yeke sara ye lakue alingbi na dutingo ti zo oko oko.
15, 16. Na lege wa Ndia so Jéhovah amû na azo ti Israël afa so lo yeke sara ye alingbi na dutingo ti zo oko oko? (Bâ foto so ayeke na tongo nda ti article ni.)
15 Ndia so Jéhovah amû na azo ti Israël afa nga so lo yeke sara ye alingbi na dutingo ti zo oko oko. Tongana mbeni zo ti Israël ayeke wayere na lo lingbi pëpe ti mû mbeni kete ngasangbaga wala ngasa na sandaga, lo lingbi ti mû akolokoto use wala apigeon use. Ka tongana yere ti zo ni asara si lo lingbi même pëpe ti mû apigeon use? Jéhovah amû lege na lo ti mû mbeni fuku, wala farine. Me Jéhovah aye pëpe ti tene a duti gi mbeni senge fuku tongaso. Ndia afa so a lingbi a duti “fuku ti nzoni mingi”, wala pendere farine, mara ti so azo ti Israël ayeke sara ka na mapa ti mû na agene so a ne ala mingi (Gen. 18:6). Na lege wa tapande so afa so Jéhovah asara ye alingbi na dutingo ti zo oko oko?—Diko Lévitique 5:7, 11.
16 Tara ti bâ so mo yeke mbeni zo ti Israël nga yere ti mo ni ahon ndo ni. Na ngoi so mo ga na mbeni kete farine ti mû na sandaga na ndo ti tabernacle, mo bâ akota wamosoro ti Israël so aga na anyama ti ala ti mû na sandaga. Kamene alingbi ti sara mo ndali ti kete sandaga ti mo ni. Me na pekoni mo dabe ti mo so, na lê ti Jéhovah, sandaga ti mo ayeke kota mingi. Ngbanga ti nyen? Raison ni ayeke so, Jéhovah ahunda ti tene farine ni aduti mbeni nzoni farine. A yeke mo bâ mo tene Jéhovah atene na mo atene: ‘Mbi hinga so mo lingbi pëpe ti mû sandaga tongana ti so ambeni zo ayeke mû, me mbi hinga nga so mo yeke mû na mbi ye so alingbi na ngangu ti mo.’ Tapande so afa biani so Jéhovah ayeke sara ye alingbi na dutingo ti zo oko oko. Lo yeke hunda ye na awakua ti lo ahon ngangu ti ala pëpe.—Ps. 103:14.
17. Ti tene Jéhovah ayeda na aye so e sara ti voro na lo, a lingbi e sara ni tongana nyen?
17 Bê ti e adë ti hinga so Jéhovah ayeke sara ye alingbi na dutingo ti zo oko oko nga so lo yeda na aye so e sara ti voro na lo tongana e sara ni na âme ti e kue (aCol. 3:23). Constance, mbeni ita-wali mbakoro ti kodoro ti Italie, atene: “Mbi ye ka mingi ti sara lisoro na azo na ndo ti Wasarango ye. Ni la asara si mbi ngbâ ti fa tënë nga ti manda Bible na azo. Na ambeni ngoi vundu ayeke sara mbi ndali ti so seni ti mbi amû lege na mbi pëpe ti sara aye mingi. Me mbi hinga so Jéhovah ahinga akatikati ti mbi, lo ye mbi nga lo bâ na nene ni ye so mbi sara alingbi na ngangu ti mbi.”
MÛ TAPANDE TI JÉHOVAH
18. Mbeni lege so ababâ na amama alingbi ti mû tapande ti Jéhovah ayeke so wa?
18 E lingbi ti sara nyen ti sara ye tongana Jéhovah so asara ye alingbi na dutingo ti zo oko oko? Kiri mo gbu li na ndo ti lege so Jéhovah asara ye na Lot. Jéhovah la ayeke na komandema; ye oko, na nzoni bê lo dengi mê lo mä Lot na ngoi so Lot ayeke fa atënë ti bê ti lo, nga lo yeda na ye so Lot ahunda. Tongana mo yeke babâ wala mama, mo lingbi ti mû tapande ti Jéhovah? Mo lingbi ti dengi mê ti mä tënë so amolenge ti mo aye ti tene na mo, nga tongana a hunda ti sara ni, ti yeda na aye so ala ye? Na ndo ti tënë so, Tour ti Ba Ndo ti lango oko ti septembre, ngu 2007, afa so ambeni babâ na mama ayeke gi ti hinga abibe ti amolenge ti ala na ngoi so ala ye ti lu andia na yâ ti sewa ni. Na tapande, babâ na mama alingbi ti fa mbeni ngbonga ti tene amolenge akiri na yanga-da na lakui. Biani, babâ na mama ayeke na komandema ti sara ni, me ala lingbi ti sara lisoro na amolenge ti ala na ndo ni kozo ti fa mbilimbili ngbonga ni. Na yâ ti ambeni ye, babâ na mama alingbi ti gbian yâ ti ngbonga ni tongana aye ni ague nde pëpe na aye so Bible afa. Tongana ababâ na amama asara lisoro na amolenge ti ala kozo ti lu andia, amolenge ni ayeke hinga andia ni nzoni nga ala yeke duti nduru ti sara ye alingbi na ni.
19. Na lege wa a-ancien ayeke sara ngangu ti mû tapande ti Jéhovah so asara ye alingbi na dutingo ti zo oko oko?
19 A-ancien ayeke sara ngangu ti mû tapande ti Jéhovah so asara ye alingbi na dutingo ti zo oko oko na lege so ala yeke bâ dutingo ti aita oko oko. Dabe ti mo so même asandaga ti azo ti Israël so ayeke awayere, Jéhovah abâ ni na nene ni. Legeoko nga, ambeni ita alingbi ti fa tënë mingi pëpe, peut-être ndali ti kpale ti seni wala ndali ti so ala ga mbakoro. Ka tongana bê ti ala anze ndali ti so ala lingbi pëpe ti sara aye mingi? A-ancien alingbi ti mû maboko na ala ti hinga so Jéhovah aye ala ndali ti so ala yeke sara na lo na ngangu ti ala kue.—Marc 12:41-44.
20. Ti sara ye alingbi na dutingo ti mo zo na yâ ti kua ti Nzapa aye ti tene nyen?
20 Tâ tënë, ti sara ye alingbi na dutingo ti mo zo aye pëpe ti tene so mo sara kua ti Nzapa gi kete kete, gi ndali ti so mo ye ti sara ngangu pëpe (Mat. 16:22). E ye pëpe ti sara kua gi kete kete tongana lege ayeke dä ti sara ni mingi. Me, a lingbi e “sara ngangu kue” ti mû maboko na aye ti Royaume (Luc 13:24). Tongaso, a lingbi e sara ye na lege ni. E yeke sara kua ti Nzapa na ngangu ti e kue nga, na oko ngoi ni, e girisa pëpe so Jéhovah ayeke hunda ye lâ oko ahon ngangu ti e pëpe. Tongana e sara ni, e yeke na kite pëpe so a nzere na lo. A nzere na e mingi ti sara na Nzapa so ayeke sara ye alingbi na dutingo ti zo oko oko! Na yâ ti article ti peko, e yeke sara tënë na ndo ti ambeni pendere sarango ye ti tere ti Jéhovah use.—Ps. 73:28.