ATËNË SO AZO AHUNDA
Azo wa la ayeke “amolenge ti Nzapa” so a sara tënë ti ala na Genèse 6:2, 4 so ayeke na fini kozo na kota ngu so apika na ngoi ti Noé?
E yeke na anzoni raison ti tene so tënë so aye ti sara tënë ti amolenge ti Nzapa so ayeke a-ange. Aye wa la afa ni?
Kozo versê ni atene: “Amolenge ti Nzapa abâ so amolenge-wali ti azo ayeke pendere. Ala kamata awali na popo ti azo tongana bê ti ala aye.”—Gen. 6:2.
Na yâ ti mbage ti Mbeti ti Nzapa so a sû na Hébreu, a yeke wara tënë “amolenge ti Nzapa” na Genèse 6:2, 4; Job 1:6; 2:1; 38:7 nga na Psaume 89:7. Aversê so afa nyen na ndo ti “amolenge ti Nzapa”?
“Amolenge ti Nzapa” so a sara tënë ti ala na Job 1:6 ayeke biani acréature ti yingo so abungbi na gbele Nzapa. A yeke wara na popo ti ala Satan, so “[a]londo na lê ti sese”. (Job 1:7; 2:1, 2). Job 38:4-7 asara nga tënë ti “amolenge ti Nzapa” so “adekongo na ngia” na ngoi so Nzapa “azia tênë ti mbundu”, wala kozo tênë ti gere ti sese. A yeke biani a-ange ndali ti so ade a sara azo pëpe. “Amolenge ti Nzapa” so a sara tënë ti ala na Psaume 89:7 ayeke acréature ti yingo so ayeke na yayu na tere ti Nzapa, me pëpe azo.
“Amolenge ti Nzapa” so a sara tënë ti ala na Genèse 6:2, 4 ayeke azo wa? Ti gue oko na aversê so e londo ti sara tënë dä, a yeke na lege ni ti tene so versê so asara tënë ti amolenge ti Nzapa so ayeke ayingo so aga lani na ndo ti sese.
A yeke ngangu na ambeni zo ti yeda so a-ange alingbi ti sara nzara ti bungbi koli na wali. Atënë ti Jésus so ayeke na Matthieu 22:30 afa so na yayu azo ayeke sara mariage pëpe nga ala yeke bungbi koli na wali pëpe. Me, na mbeni ngoi a-ange amû tere ti zo, ala te même ye nga ala nyon ye legeoko na azo (Gen. 18:1-8; 19:1-3). Ni la, a yeke na lege ni ti tene so tongana a-ange amû tere ti zo, ala lingbi ti bungbi na awali.
E yeke na araison so ayeke na yâ ti Bible so apusu e ti yeda so a-ange abungbi na awali. Jude 6, 7 ahaka siokpari ti azo ti Sodome, so ague na peko ti anzara ti mitele so ague nde na ye so Nzapa aleke, na siokpari ti “a-ange so abata lani kozo ndo ti ala pëpe, me so ala dö tâ ndo ti duti ti ala ni ala zia”. Mbeni ye so a-ange so nga na azo ti Sodome asara ayeke so ala “sara lani lango-sioni ahon ndo ni na ala gue na peko ti anzara ti mitele so ague nde na ye so Nzapa aleke.” Mara ti tënë ni so ayeke na 1 Pierre 3:19, 20 afa so a-ange so ake lani yanga na “ngoi ti Noé”. (2 Pi. 2:4, 5). Biani, a lingbi ti haka sarango ye ti tere ti a-ange so ake yanga na ngoi ti Noé so na siokpari ti azo ti Sodome na Gomorrhe.
Tënë so ayeke na lege ni tongana e hinga so “amolenge ti Nzapa” so Genèse 6:2, 4 asara tënë ti ala ayeke a-ange so amû lani tere ti zo na ala sara lango-sioni na awali.
Bible atene Jésus ‘atö mbela na ayingo so ayeke na da ti kanga.’ (1 Pi. 3:19). Tënë so aye ti tene nyen?
Bazengele Pierre atene ayingo so la “ake yanga ândö na ngoi so Nzapa angbâ lani ti kanga bê ti ku na ngoi ti Noé”. (1 Pi. 3:20). A yeke polele so Pierre ayeke sara lani tënë ti acréature ti yingo so amû peko ti Satan na yâ ti kengo yanga ti lo. Jude asara tënë ti a-ange so “abata lani kozo ndo ti ala pëpe, me so ala dö tâ ndo ti duti ti ala ni ala zia”, lo tene so Nzapa “[a]kanga ala na akamba so angbâ lakue lakue na lo bata ala na yâ ti bingo so avuko pitipiti ti ku na ngbanga ti kota lango ni.”—Jude 6.
Na lege wa acréature ti yingo ake yanga na ngoi ti Noé? Kozo na kota ngu so apika lani, asioni yingo so amû tere ti zo, mbeni ye so Nzapa aleke ni ndali ti ala pëpe (Gen. 6:2, 4). Na ndo ni, a-ange so abungbi na awali, ye so ague nde na ye so Nzapa aleke. Nzapa asara pëpe acréature ti yingo ti bungbi na awali (Gen. 5:2). A yeke futi ande asioni ange so ake yanga so na ngoi so Nzapa adiko. Me ti laso, tongana ti so Jude afa, ala yeke na yâ ti “bingo so avuko pitipiti”, so ti tene, ala yeke na kanga na lege ti yingo.
Lawa la Jésus atö mbela na “ayingo so ayeke na da ti kanga” so? Lo sara ni tongana nyen? Pierre atene so ye so asi na pekoni so “a kiri na [Jésus] na fini na yâ ti yingo.” (1 Pi. 3:18, 19). Bâ so Pierre atene Jésus ‘atö mbela’. Lege so Pierre atene na tënë ni afa so a tö mbela ni kozo ti tene lo sû kozo lettre ti lo. Na bango ni, a yeke na peko ti zingongo ti Jésus na kuâ la lo gue lo tö mbela na asioni yingo ti fa na ala so ala lingbi biani na ngbanga so a fâ na ndo ti ala. A yeke pëpe mbeni tënë so amû na ala mbeni nzoni beku teti gigi ti kekereke. A yeke tënë ti dengo ngbanga (Jonas 1:1, 2). Na pekoni so Jésus afa so lo yeke be-ta-zo na Nzapa nga lo gbu ngangu juska na kuâ na a zingo lo, lo yeke na droit ti fa tënë ti fango ngbanga so. So Jésus angbâ be-ta-zo nga lo gbu ngangu afa so Zabolo ayeke na ngangu na ndo ti lo pëpe.—Jean 14:30; 16:8-11.
Na yâ ti ngoi so ayeke ga, Jésus ayeke kanga ande Satan na asioni yingo so na lo yeke bi ala na yâ ti kota dû so alï mingi (Luc 8:30, 31; Apoc. 20:1-3). Me juska ti si na ngoi ni so, ayingo so ake yanga so ayeke na yâ ti bingo na lege ti yingo so avuko pitipiti, nga a yeke futi ande ala biani.—Apoc. 20:7-10.