“So apendere foto!”

Fani oke la mo tene tënë so na ambeni zo na ngoi so mo zi yâ ti mbeni fini numero ti Tour ti Ba Ndo? A leke apendere foto nga na adessin so nzoni ti mû maboko na e ti gbu li nga ti tene a ndu bê ti e si e manda ye dä. A lingbi ti mû maboko na e mbilimbili na ngoi so e yeke leke Tour ti Ba Ndo ni nga e yeke kiri tënë na ngoi ti mandango ni.

Na tapande, gbu li na ndo ti ndani so a soro afoto so a zia na tongo nda ti a-article oko oko kue. Foto ni aye ti fa nyen? Na lege wa a gue oko na kota li ti tënë ti article ni wala na versê so ayeke mama-tene ti article ni? Bâ tongana nyen la tanga ti afoto ni oko oko kue ague oko na ye so a sara tënë ni na yâ ti article ni nga tongana nyen la andu fini ti mo wani.

Zo so amû li ni na ngoi ti Mandango Tour ti Ba Ndo ayeke mû lege na azo ti yâ ti congrégation ti sara tënë na ndo ti foto oko oko kue, ti fa tongana nyen foto ni ague oko na article ni nga ye so asara na ndo ti ala wani. Ti ambeni foto ni, a yeke wara na tere ni mbeni tënë so atingbi foto ni na mbeni mbilimbili paragraphe. Ti ambeni, zo so amû li ni alingbi ti bâ aparagraphe so a yeke nzoni ti tene na ngoi ni a sara tënë na ndo ti afoto oko oko. Tongana lo sara tongaso, azo kue ayeke bâ nzoni na lege ti afoto so a zia dä ti mû maboko na azo so adiko ni ti bâ ye so ala lingbi ti manda na yâ ti Mbeti ti Nzapa.

Mbeni ita-koli atene: “Tongana mbi hunzi dikongo mbeni article so a sû ni pendere, afoto ni” asara si article ni akiri ayeke pendere mingi.