ATËNË SO AZO AHUNDA

A yeke na lege ni ti tene na ngoi ti abungbi, babâ na mama so ayeke aChrétien aduti ndo oko na molenge ti ala so a bi lo na gigi?

Mbeni raison ayeke dä pëpe ti gi bê ti e ahon ndo ni na ndo ti place so a lingbi mbeni zo so a bi lo na gigi aduti dä na Da ti Royaume. Tour ti Ba Ndo awa mingi babâ na mama so ayeke aChrétien ti mû maboko na lege ti yingo na molenge ti ala so a bi lo na gigi me so angbâ ti lango da oko na ala, tongana a yeke na lege ni ti sara ni. Tongana ti so a fa na lembeti 19 na 20 ti Tour ti Ba Ndo ti lango 15 ti novembre, ngu 1988 na Français, babâ na mama alingbi même ti manda Bible na molenge ti ala so a bi lo na gigi me so angbâ kete na angbâ ti lango da oko na ala. E hinga so molenge ni ayeke wara mungo maboko so lo yeke na bezoin ni ti zia lege ti ye ti sioni so lo sara.

Âdu ti place ti dutingo dä na Da ti Royaume, a yeke sioni pëpe ti tene molenge so a bi lo na gigi aduti kpô na tere ti babâ na mama ti lo. Teti so mbeni ndia afa pëpe so a lingbi zo so a bi lo na gigi aduti na peko na yâ ti Da ti Royaume, a yeke sioni pëpe tongana mbeni molenge so a bi lo na gigi aduti na tere ti babâ na mama ti lo, atâa ndo wa la ala duti dä. Na ngoi so babâ na mama ayeke bâ lege ti molenge ti ala na lege ti yingo, ala ye biani ti bâ wala lo yeke dengi mê na aye so a yeke fa na ngoi ti abungbi. A yeke nzoni mingi ti tene molenge ni aduti na tere ti ala ahon ti tene lo duti na mbeni ndo nde na ala bâ ndo na ndo ti lo pëpe.

Ka tongana molenge so a bi lo na gigi alango ndo oko mbeni pëpe na babâ na mama ti lo? A ye ti tene so lo lingbi ti duti ndo oko na babâ na mama ti lo pëpe? Na yâ ti angu so ahon, na yâ ti ambeti ti e a fa polele nzoni bango ndo so a yeke nzoni babâ na mama asara ngangu ti duti na ni tongana a ndu tënë ti lengo songo na mbeni fami so a bi lo na gigi me so alango ndo oko na ala pëpe.a Ye oko, ti tene mbeni zo so a bi lo na gigi aduti kpô na tere ti afami ti lo teti mbeni ngoi na ngoi ti bungbi ayeke nde mingi na ti so afami ni ayeke gi senge senge ti sara songo na lo. Tongana amembre ti sewa ni so angbâ be-ta-zo ayeke na nzoni bango ndo na mbage ti fami ti ala so a bi lo na gigi nga ala yeke sara ngangu ti sara ye alingbi na wango so Bible amû na ndo ti lengo songo na lo, mbeni raison ayeke dä ape ti tene zo agi bê ti lo.​—1 aCor. 5:11, 13; 2 Jean 11.

Tongana mbeni zo so a bi lo na gigi aduti na tere ti mbeni fami ti lo wala na tere ti mbeni ita nde, mbeni raison ayeke dä ape ti tene azo agi bê ti ala tongana lo sara ye na lege ni. Tongana a mû lege na zo pëpe ti duti na ndo so bê ti lo aye, a lingbi ti ga na akpale nde nde; akpale ni alingbi ti londo ndali ti fason so a leke na aplace na ndo ti bungbi ni, ngobo ti ndo ni, bango ndo ti amembre ti sewa ni wala ti ambeni zo nga na ambeni ye tongaso. Mbeni raison ayeke pëpe ti gi bê ahon ndo ni na ndo ti place so a lingbi azo so aga na bungbi aduti dä, tongana azo kue so aga, même afami so ayeke be-ta-zo, asara ngangu ti sara ye alingbi na aye so Bible afa na ndo ti azo so a bi ala na gigi, na a ga pëpe mbeni tênë ti pikango gere teti aita.