Bê ti Nzapa ayeke son ka, me e lingbi ti zia ngia na bê ti lo

A si na mo awe ti toto ndali ti so mbeni ye ason mo ngangu?—a A si na e kue. Me peut-être a yeke pëpe ngbanga ti so e gu tere ti e wala mbeni zo la apika e si ason e. A lingbi ti duti mbeni sioni tënë so mbeni zo atene na ndo ti e me so ayeke mvene. Mara ti ye tongaso ason bê mingi, ni ape?— Ti Nzapa nga kue, tongana a tene mvene na ndo ti lo, bê ti lo ayeke son nga. Zia e bâ ambeni ye na ndo ni na e bâ nga ye so e lingbi ti sara ti zia ngia na bê ti Nzapa, me ti son bê ti lo ape.

Bible atene so ambeni zo so atene lani atene ani ye Nzapa ‘amû vundu na Lo’. Tongaso, zia e bâ ndani so bê ti Jéhovah ayeke son tongana e sara pëpe ye so lo tene na e ti sara.

Akozo zo so Jéhovah asara ala na ndo ti sese azia vundu na bê ti lo lani mingi. Nzapa azia ala lani na yâ ti Paradis so a iri ni “yaka ti Eden.” Azo ni so ayeke azo wa?— Ni la, kozo zo ni ayeke Adam, na use zo ni ayeke Ève. Zia e bâ ye so ala sara so ason bê ti Jéhovah.

Na peko ti so Jéhovah azia ala na yâ ti pendere ndo so, lo tene na ala ti bâ lege ni nzoni. Lo tene nga na ala so ala lingbi ti dü amolenge na ti ngbâ na ndo ni so kpu na kpu. Mawa ni ayeke so, kozoni si Adam na Ève adü amolenge, mbeni ye ti sioni asi. Nyen la asi nyen?— Mbeni ange apusu Ève ti ke yanga ti Jéhovah. Adam nga kue atï na pekoni. Zia e bâ tongana nyen la si ye ni so asi.

Ange ni asara si mbeni ngbo asara ye mo bâ mo tene lo yeke sara tënë. Ye so Ève amä so anzere na lo mingi. Ngbo ni atene na lo so lo Ève ni lo yeke ga “tongana Nzapa”. Tongaso Ève asara ye so ngbo ni atene na lo ti sara. Nyen la lo sara nyen?—

Ève ate lê ti keke so Jéhovah atene ândö na Adam ti te ape. Lani kozoni si Jéhovah asara Ève, lo tene tënë so na Adam, lo tene: “Mo lingbi te le-keke kue ti yaka tongana bê ti mo aye; me lê ti keke ti hinga nzoni na ti hinga sioni, mo te pëpe; teti na lâ ni so mo te lê ni so, fade mo kui biani.”

Ève nga kue ahinga ndia so. Me, lo bâ keke ni so ngbii, lo bâ so a kpa mbeni ye ti tene zo ate ni, na “a nzere na lê” ti lo. Tongaso, lo mû ni, lo te. Na pekoni, lo mû lê ti keke ni na Adam, “na lo te nga.” Na mo, nyen la apusu Adam ti te lê ti keke ni so?— A yeke ngbanga ti so Adam aye Ève mingi ahon Jéhovah. Lo soro ti nzere na lê ti wali ti lo ahon ti nzere na lê ti Nzapa. Ye oko, ti mä yanga ti Jéhovah ayeke kota mingi ahon ti mä yanga ti mbeni zo nde.

Ka ti ngbo so asara tënë na Ève so ayeke tongana nyen? A yeke tongana ti mbeni zo so ayeke sara ngia na mbeni poupée. Lo sara mo bâ mo tene poupée ni la ayeke sara tënë, andâ ka a yeke lo. Ti ngbo ni nga kue a yeke tongaso. Mbeni zo la asara tënë, me tâ lo ngbo ni ape. Zo ni so ayeke zo wa?— A yeke “ngbo ti giriri, lo so a iri lo Zabolo na Satan”.

Mo lingbi ti sara nyen ti zia ngia na bê ti Jéhovah?— A yeke nzoni mo gi lakue ti mä yanga ti lo. Satan atene so lo lingbi ti pusu azo kue ti sara ye so lo Satan ni aye. Ni la, Jéhovah awa e, lo tene: “Molenge ti mbi, mo duti na ndara na mo mû ngia na bê ti mbi, si mbi lingbi kiri tënë na zo so azonga mbi.” Satan ayeke zonga Jéhovah wala lo yeke gi yanga ti lo. Lo tene so ni lingbi ti pusu azo kue ti ke yanga ti Nzapa. Tongaso, mä yanga ti Jéhovah na sara na lo si lo duti na ngia. Mo yeke sara ande ni?—