KIRINGO TËNË NA AHUNDA TI AZO

Zo alingbi ti sara nyen ti duti na ngia na yâ ti mariage ti lo?

Teti so Jéhovah Nzapa la ayeke na gunda ti mariage, awango so lo mû na yâ ti Bible ndali ni amû maboko mingi na azo. A fa na e ti duti na asarango ye so asara si zo aduti na ngia na yâ ti mariage ti lo, nga a gboto mê ti e na ndo ti ambeni sarango ye so ayeke buba yâ ti mariage. A fa nga na e fason so e lingbi ti sara lisoro na azo ti yâ ti sewa ti e si e kue e duti na ngia.​—Diko aColossien 3:8-10, 12-14.

A yeke ti akoli na awali ti ne mba. Tongana ala use kue asara kusala ti ala ti koli na ti wali tâ tongana ti so Nzapa afa, ala lingbi ti duti na ngia.​—Diko aColossien 3:18, 19.

Nyen la ayeke sara si mariage aninga?

Tongana, na yâ ti mariage, koli ni na wali ni aye tere, ala yeke ke tere lâ oko ape. Nzapa afa na e tongana nyen ti ye koli ti e wala wali ti e. Lo wani nga na Molenge ti lo, Jésus, azia na e tâ nzoni tapande ti azo so aye azo na bê ti ala oko.​—Diko 1 Jean 4:7, 8, 19.

Tongana akoli na awali amû mariage na nene ni na ala bâ ni tongana mbeni ye so Nzapa la aleke, ala yeke ngbâ na mba. Nzapa azia lani mariage na sese ti tene aninga si asewa aduti nzoni. Azo so amû tere alingbi ti ngbâ na mba aninga ngbanga ti so Nzapa asara akoli na awali ti mû maboko na mba, atâa na lege ti bibe wala ti mitele. Lo sara nga ala na image ti lo, so ti tene ala lingbi ti sara ye na ndoye tongana lo.​—Diko Genèse 1:27; 2:18, 24.