“Bâ, mbi yeke sara si aye kue aga fini”

Mo ye ti tene mo na sewa ti mo aduti na nzoni seni nga ala ngbâ aninga na ndo ti sese? Mo ye ti duti na yâ ti mbeni dunia so pasi nga na kuâ ayeke dä encore ape? Mara ti dunia ni so ayeke duti ande dä, a yeke senge tënë ti bango li ape. Fini dunia so mbilimbili ayeke duti ande dä aga nduru ti si awe ndali ti so a yeke ye so Jéhovah Nzapa aleke ti sara la. Bâ tongana nyen ye ni so ayeke ga tâ tënë tongana ti so a fa na Apocalypse 21:3-5.​—Diko ni.

Nzapa ayeke “mbô ngu ti lê kue na lê ti ala”. (Apocalypse 21:4). Mara ti ngu ti lê ti so wa la Nzapa ayeke mbô ni so? A yeke ngu ti lê ti nzerengo tere ape, wala lo ti so ayeke ka na yâ ti lê ti e ti bata lê ti e so ape. Zendo ti Nzapa ni andu ngu ti lê so pasi na vundu ayeke na gunda ni. Lo yeke mbô gi ngu ti lê ni so ape, me lo yeke zi nga pasi na vundu ni.

“Kuâ ayeke duti ande dä mbeni pëpe”. (Apocalypse 21:4). Ye so ayeke sara ka si ngu ti lê ti e asigigi mingi ayeke tâ gi kuâ. Me ti azo so amä yanga, Jéhovah ayeke zi ala ande na yâ ti kuâ. Na lege wa? Lo yeke sara ni na zingo tâ ye so aga na kuâ na ndo ti e azo, so a yeke siokpari so e wara ni na lege ti Adam (aRomain 5:12). Grâce na sandaga ti Jésus la Jéhovah ayeke zi ande siokpari na tere ti azo so amä yanga.a Na pekoni, “kuâ so ayeke ndangba wato ni, fade a yeke futi lo biaku biaku.” (1 aCorinthien 15:26). Na ngoi ni so la si azo so amä yanga ti Nzapa ayeke ngbâ ande na fini lakue lakue nga na nzoni tere tongana ti so Nzapa aleke ândö ndali ti ala.

“Pasi ayeke duti dä mbeni pëpe.” (Apocalypse 21:4). Pasi ti so wa la ayeke duti ande dä ape so? A yeke aye kue so siokpari aga na ni so ayeke zia vundu na bê ti e wala so ayeke sara si e yeke tï kobela nga ambeni mbage ti tere ti e abuba. Aye ni so nga la asara si azo kutu mingi ayeke gi na yâ ti vundu.

Tënë so a tene ngu ti lê, kuâ nga na pasi ayeke hunzi so, a ga nduru ti ga tâ tënë awe. Me, peut-être e hunda tere ti e, e tene, ‘Ye ni so ayeke pasêe ande na ndo wa?’ ‘Peut-être na yayu?’ A yeke na yayu ape. Ngbanga ti nyen? Kozo ni kue, na tongo nda ti zendo ni a tene, “tente ti Nzapa ayeke na azo,” na e hinga so azo ayeke gi ge na sese (Apocalypse 21:3). Use ni, zendo ni asara tënë ti mbeni dunia so “kuâ ayeke duti ande dä mbeni pëpe”, so ti tene kuâ ni ayeke dä kozo, ni la a yeke duti ande encore dä ape. Kuâ ayeke lâ oko kâ na yayu ape, a yeke gi depuis na ndo ti sese ge. A yeke polele so, apendere zendo ti Nzapa so ayeke ga ande tâ tënë gi na sese ge.

Jéhovah aye si e mä na bê na zendo ti lo ti fini dunia so. Gi na peko ti so lo fa anzoni ye so lo yeke ga na ni, lo tene mbeni tënë so afa so atënë ti lo ni ayeke mvene ape, lo tene: “Bâ, mbi yeke sara si aye kue aga fini.” Na pekoni lo kiri lo tene: “Atënë so ayeke atënë so a lingbi ti zia bê dä nga ayeke tâ tënë.” (Apocalypse 21:5). E wa mo ti gi ti hinga ye so mo na azo ti mo alingbi ti sara ti tene ala duti na popo ti awakua ti Nzapa so na ngia na bê ayeke bâ ande tongana nyen la zendo ni so ayeke ga biani tâ tënë.