KIRINGO TËNË NA AHUNDA TI AZO
Jésus ayeke sara ande nyen na yâ ti angoi so ayeke ga?
Lani na ngu 33 ti ngoi ti e, Jésus akui, a zingo lo, na pekoni lo gue na yayu. Angu mingi na pekoni, Nzapa azia lo Gbia (Daniel 7:13, 14). Na yâ ti angoi so ayeke ga, Gbia Jésus ayeke ga ande na siriri na ndo ti sese kue nga lo yeke zi yere.—Diko Psaume 72:7, 8, 13.
Gbia Jésus ayeke zi ande asioni ye kue na ndo ti sese
Teti so Jésus ayeke komande ande na ndo ti azo kue, lo yeke ga na gbâ ti anzoni ye na ala. Lo yeke sara ande kua na ngangu so Nzapa amû na lo ti zi na siokpari na tere ti azo. Ala yeke duti ande na ngia na ndo ti sese, ala yeke ga mbakoro ape nga ala yeke kui ape.—Diko Jean 5:26-29; 1 aCorinthien 15:25, 26.
Nyen la Jésus ayeke sara fadeso nyen?
Jésus ayeke fa lege na kua ti fango tënë so atâ disciple ti lo ayeke sara laso na ndo ti sese kue. Adisciple ni ayeke gue na yanga-da ti azo ti fa na ala ye so Bible atene na ndo ti Royaume ti Nzapa. Jésus atene lani na adisciple ti lo atene ni yeke ngbâ ti mû maboko na ala na yâ ti kua ni so juska na ngoi so Royaume ti Nzapa ayeke ga ti futi agouvernement ti dunia so kue.—Diko Matthieu 24:14; 28:19, 20.
Na lege ti congrégation ti atâ Chrétien, Jésus ayeke fa na azo ye so ala lingbi ti sara si gigi ti ala aduti tâ nzoni. Lo yeke ngbâ ti fa lege na ala juska na ngoi so a yeke ga ti futi dunia so e yeke na yâ ni si ala lï na yâ ti fini dunia so Nzapa amû zendo ni.—Diko 2 Pierre 3:7, 13; Apocalypse 7:17.