“Tënë nzoni aga na ndö ti mo ndali ti so mo sara ye tongana zo so ahinga ndo”

DAVID, zo ti Israël ti ândö, la atene atënë so ti gonda mbeni wali so lo tingbi na lo. Iri ti lo ayeke Abigaïl. Nyen la apusu David ti gonda lo? E lingbi ti wara aye ti nzoni na lege ti tapande ti lo tongana nyen?

David awara lani wali so ayeke na koli so na ngoi so lo yeke kpe Gbia Saül. Koli ti Abigaïl ayeke Nabal, mbeni zo ti mosoro so ague na gbâ ti anyama ti lo ti te pere na ndo so ahoto ayeke dä na mbage ti sud ti Juda. David na azo ti lo ayeke lani “tongana mbeni gbagba ti bata” aberger ti Nabal nga na anyama ti lo. A si na mbeni ngoi, David atokua azo na Nabal ti hunda ‘ye kue so lo lingbi ti mû’, so ti tene akobe (1 Sam. 25:8, 15, 16). Ye so David ahunda ayeke na lege ni, ndali ti so lo na azo ti lo abata lani aye ti Nabal.

Me Nabal, so ndani aye ti tene “Zo so li ti lo ayeke dä pëpe” wala “Buba zo”, asara ye alingbi na iri ti lo. Lo kiri tënë na David na ngangu, lo zonga lo nga lo ke ti mû na lo ye so lo hunda. Tongaso, David aleke ti punir Nabal ndali ti tënë ti songo bê so lo tene na lo nga ndali ti so lo sara ye na lo na lege ni ape. Nabal na azo ti da ti lo ayeke wara ye ti peko ti sarango ye ti buba ti lo.—1 Sam. 25:2-13, 21, 22.

So Abigaïl ahinga angangu kpale so ayeke ga na peko ti ye so David aga na loro ti sara, sân mbeto Abigaïl asara mbeni ye. Na nengo David, lo sara si David apensé na ndö ti songo ti lo na Jéhovah. Nga, lo mû gbâ ti kobe na David, so ayeke ga lani gbia, nga na azo ti lo. David atene so Jéhovah asara kua na lo ti kanga lege na lo ti sara mbeni ye so ayeke sara si tënë ayeke na li ti lo na gbele Nzapa. David atene na Abigaïl: “Tënë nzoni aga na ndö ti mo ndali ti so mo sara ye tongana zo so ahinga ndo! Tënë nzoni aga na ndö ti mo ndali ti so mo kanga lege na mbi si mbi yô ngbanga ti mênë na li ti mbi pëpe.”—1 Sam. 25:18, 19, 23-35.

A yeke ngangu na e ape ti bâ so e yeke ye lâ oko ape ti sara ye tongana Nabal, ti kiri singila pëpe ndali ti nzoni so a sara na e. Na ndö ni, tongana e bâ so mbeni sioni ye aye ti si, a yeke nzoni e sara ye so e lingbi ti sara ti kanga lege na ni. E lingbi ti duti na oko bibe ti zo ti sungo psaume so atene na Nzapa, atene: “Fa na mbi ti sara ye tongana zo so li ti lo ayeke dä, nga mû na mbi hingango ye.”—Ps. 119:66.

Peut-être azo ayeke bâ so e sara ye na ndara, wala e sara ye tongana zo so li ti lo ayeke dä. Atâa ala tene ni wala pëpe, ala lingbi ti duti na oko pensé ti David so atene: “Tënë nzoni aga na ndö ti mo ndali ti so mo sara ye tongana zo so ahinga ndo!”