Atënë so azo ahunda

A yeke na lege ni ti tene mbeni Chrétien aduti na ngombe ti bata na terê ti lo si ambeni zo asara sioni na lo ape?

Atâa so aChrétien alingbi ti sara ambeni ye ti bata na terê ti ala, ala yeke sara ye alingbi na amama-ndia ti Bible. Amama-ndia so afa so a yeke na lege ni ape ti tene aChrétien asara kua na angombe ti bata na terê ti ala si mbeni zo asara sioni na ala ape. Gbu li ti mo na ndö ti atënë so:

Na lê ti Jéhovah, fini ti azo ayeke nzoni-kue. David, mbeni zo ti sungo psaume, atene so Jéhovah la ‘amû fini na aye kue’. (Ps. 36:9). Ni la, tongana mbeni Chrétien asoro ti sara ambeni ye ti bata na terê ti lo wala na aye ti lo, lo yeke sara kue ti tene ngbanga ti mênë ti zo aduti na li ti lo ape.—Deut. 22:8; Ps. 51:14.

A yeke tâ tënë so aye nde nde so mbeni zo asara kua na ni ti bata na terê ti lo alingbi ti sara si ngbanga ti mênë aduti na li ti lo, me angombe asara si a yeke ngangu ape ti fâ zo, atâa zo ni aye fade ti fâ zo ape wala lo fâ zo na mbana.a Nga, tongana bê ti zo so aga ti sara sioni na zo ason awe, na lo bâ so zo ni ayeke na ngombe, ye ni alingbi ti ga sioni mingi, na kuâ alingbi ti si dä.

Tongana, na ndangba bï ti Jésus na sese, lo tene na adisciple ti lo ti mû a-épée na terê ti ala, a yeke pëpe ti tene ala bata na terê ti ala. (Luc 22:36, 38). Me Jésus ahunda na ala ti mû a-épée ti tene lo fa na ala so a lingbi ala sara ye ti ngangu na zo pëpe, même tongana gbâ ti azo so ayô aye ti bira ayeke na devant ti ala (Luc 22:52). Na peko ti so Pierre asigi na épée ti lo ti sara sioni na ngbâa ti kota prêtre, Jésus amû yanga na lo, atene: “Kiri na épée ti mo na place ni.” Na pekoni, Jésus atene mbeni kpengba tâ tënë so ayeke fa lege na aChrétien juska laso: “Azo kue so amû épée ayeke kui ande na lege ti épée.”—Mat. 26:51, 52.

Ti gue oko na Michée 4:3, azo ti Nzapa ‘apika a-épée ti ala si aga alê ti kpoka ti charrue nga ala yeke pika alikongo ti ala si aga azembe ti fango na amaboko ti keke.’ A yeke ye so a hinga na atâ Chrétien, na a gue oko na ye so bazengele Paul awa aChrétien ti sara. Lo tene: “Ala kiri sioni ndali ti sioni na zo oko pëpe. . . . Tongana lege ni ayeke dä, na ala lingbi ti sara mbeni ye, zia ala duti na siriri na azo kue.” (aRom. 12:17, 18). Atâa akpale mingi so Paul awara, so na popo ni lo tingbi na “azo ti gbungo ye ti azo na ngangu,” lo sara ye ague oko na atënë ti yanga ti lo; lâ oko ape lo zia tënë ti batango terê ti lo kozo na amama-ndia ti Bible (2 aCor. 11:26). Me lo zia bê ti lo na Nzapa nga na ndara so ayeke na yâ ti Bible, ndara so “ayeke nzoni ahon aye ti sarango na bira”.—Zo-ti. 9:18.

A-Chrétien abâ fini na nene ni mingi ahon aye ti sese. “Fini ti [zo] alondo pëpe na aye so lo yeke na ni.” (Luc 12:15). Tongaso, tongana mbeni Chrétien asara tënë yeke gbä na mbeni zo so ayeke na ngombe so aga ti nzi ye, na ndara lo yeke sara ye alingbi na wango so Jésus amû, so atene: “Mo gi pëpe ti luti na zo so ayeke zo ti sioni.” Ye so ahunda peut-être ti tene e zia na zo ni aye kue so lo ye ti mû ni (Mat. 5:39, 40; Luc 6:29).b Ti tâ tënë ni, nzoni ye so e lingbi ti sara ayeke ti gboto lê ti azo ti sioni na ndö ti e ape. Tongana e kpe “sarango baba ti akungba so [e yeke] na ni” nga avoizin ahinga e tongana aTémoin ti Jéhovah so aye siriri, a yeke sara si azo ti sioni ayeke zia lê ti ala na ndö ti e ape.—1 Jean 2:16; aProv. 18:10.

A-Chrétien ane conscience ti amba ti ala. (aRom. 14:21). Tongana aita ahinga so mbeni membre ti congrégation ayeke na mbeni ngombe ti bata na terê ti lo si azo asara sioni na lo ape, a lingbi ti son bê ti ambeni mba ti lo Chrétien, a lingbi même ti sara si ala pika gere ti ala. Ndoye apusu e ti zia aye so ayeke ndali ti nzoni ti amba ti e kozo na ti e, même tongana sarango tongaso aye ti tene e sara pëpe ye so ndia amû lege na e ti sara.—1 aCor. 10:32, 33; 13:4, 5.

A lingbi aChrétien aduti nzoni tapande. (2 aCor. 4:2; 1 Pi. 5:2, 3). Tongana a mû wango na mbeni Chrétien me lo ngbâ na ngombe ti bata na terê ti lo si azo asara sioni na lo ape, lo yeke nzoni tapande encore ape. Tongaso, lo lingbi pëpe ti tene a mû na lo ambeni kua na yâ ti congrégation wala lo lingbi pëpe ti wara pasa ti sara ambeni kua so ayeke nde. A yeke sara nga tongaso na mbeni Chrétien so angbâ ti sara kua so a hunda ti tene lo duti na ngombe na terê ti lo. A yeke duti nzoni mingi ti tene lo gi mbeni kua nde.c

A yeke na Chrétien oko oko ti mû desizion na ndö ti lege so lo yeke bata na terê ti lo nga na sewa ti lo wala na aye ti lo, tongana ti so lo yeke mû desizion na ndö ti kua so lo ye ti sara. Me tongana lo yeke mû desizion ni, zia ague oko na amama-ndia ti Bible. Nzapa ti e ti ndara amû na e amama-ndia so ndali ti so lo ye e. Ndani la aChrétien so ayeke na kpengba songo na lo ayeke soro pëpe ti duti na ngombe ti bata na terê ti ala si azo asara sioni na ala ape. Ala hinga so tongana ala zia bê ti ala na Nzapa nga ala sara ye alingbi na amama-ndia ti Bible, na yâ ti angoi so ayeke ga, sioni ayeke si na ala ande ape teti lakue lakue.—Ps. 97:10; aProv. 1:33; 2:6, 7.