Aye Wa La Nzapa Ayeke Sara Ande?

Tongana mo yeke na yâ ti kpale, mo yeke zia bê ti mo na mbeni nzoni kamarade ti aidé mo. Ni la, ambeni zo atene so Nzapa ayeke kamarade ti ala ape ndali ti so lo sara nga ye oko ape ti aidé ala. Me ti vrai ni, Nzapa asara aye mingi ndali ti nzoni ti e awe na lo yeke sara nga ande mbeni ye ndali ti apasi so e yeke bâ laso. Nyen la lo yeke sara ande?

LO YEKE SARA SI AYE TI SIONI KUE AHUNZI

Nzapa ayeke zi ande aye ti sioni kue na lege so lo yeke zi aye so ayeke na gunda ni. Bible afa zo so ayeke na gunda ni atene: “Dunia so kue ayeke na gbe ti Zo ti sioni.” (1 Jean 5:19). “Zo ti sioni” so ayeke gï zo so Jésus airi lo “mokonzi ti dunia so”, so ti tene Satan Zabolo (Jean 12:31). Ngangu so Satan ayeke sara na ndö ti dunia la asara si aye ti vundu ayeke mingi na ndö ti sese. Me nyen la Nzapa ayeke sara?

Na lege ti Jésus Christ, Jéhovah Nzapa aga nduru ti “neka lo so ayeke na ngangu ti ga na kuâ, so ti tene Zabolo”. (aHébreu 2:14; 1 Jean 3:8). Ni la, Bible afa so Zabolo wani ahinga so “lo yeke na ngoi mingi pëpe.” (Apocalypse 12:12). Nzapa ayeke zi nga azo kue so ayeke na gunda ti aye ti sioni.—Psaume 37:9; aProverbe 2:22.

LO YEKE SARA SI SESE AGA PARADIS

Na peko ti so Nzapa azi aye ti sioni kue na ndö ti sese awe, lo yeke sara ande ambeni ye tongaso si azo ti mbilimbili aduti na ndö ti sese teti lakue lakue. Nyen la e yeke ku ti bâ ande?

Siriri na nzoni duti teti lakue lakue. “Me azo so asara terê ti ala kete, sese ayeke ga ye ti ala, na ala yeke duti na ngia mingi na yâ ti siriri so amû ndo.”—Psaume 37:11.

Gbâ ti anzoni kobe. “Alê ti kobe ayeke dü mingi na ndö ti sese; a yeke sigi gbani gbani na li ti ahoto.”—Psaume 72:16.

Pendere da ti lango nga na nzoni kua ti sarango ni. “Azo ayeke leke ada, na ala yeke lango na yâ ni, nga ala yeke fâ ayaka ti vigne, na ala yeke te lengo ni . . . ala yeke wara ngia na yâ ti kua so ala sara na maboko ti ala.”—Ésaïe 65:21, 22.

Mo yeke na nzara ti bâ mara ti pendere gigi tongaso? Na yâ ti kete ngoi azo kue ayeke vivre ande tongaso.

LO YEKE ZI ANDE KOBELA NA KUÂ

Laso, terê ti azo ayeke son nga ala yeke kui, me a yeke duti ande tongaso encore ape. Na yâ ti kete ngoi Nzapa ayeke sara si azo ayeke bâ nzoni na lege ti sandaga ti Jésus, tongaso si “zo kue so amä na bê na lo, a lingbi ti futi lo pëpe, me lo yeke na fini ti lakue lakue.” (Jean 3:16). Ye ti peko ni ayeke duti tongana nyen?

Kobela ayeke duti ande dä ape. “Zo ti kodro ni ayeke tene ande pëpe: ‘Terê ti mbi ason.’ A yeke pardonné siokpari ti azo so alango na yâ ti kodro ni.”—Ésaïe 33:24.

Kuâ ayeke duti dä encore ape. “Lo yeke mene ande kuâ biaku biaku, Jéhovah, Seigneur ti dunia kue, ayeke mbô ngu ti lê na lê ti azo kue.”—Ésaïe 25:8.

Azo ayeke ngbâ na fini lakue lakue. “Matabisi so Nzapa amû ayeke fini ti lakue lakue na lege ti Christ Jésus Seigneur ti e.”—aRomain 6:23.

A yeke zingo ande azo so akui. “A yeke zingo ande na kuâ azo ti mbilimbili na azo so ayeke mbilimbili pëpe.” (Kusala 24:15). Grâce na ye so Nzapa afuta ti zi azo, azo so akui ayeke zingo ande na kuâ.

Nzapa ayeke sara aye so kue tongana nyen?

LO ZIA MBENI NZONI GOUVERNEMENT NA SESE

Nzapa ayeke sara ye alingbi na ye so lo leke na bê ti lo ti sara, na lege ti mbeni gouvernement so ayeke na yayu, so lo zia Jésus gbia ni (Psaume 110:1, 2). A yeke gouvernement so wala royaume so la si Jésus afa na adisciple ti lo ti sambela ndali ni a tene: “Babâ ti e so mo yeke na yayu, . . . Zia Royaume ti mo aga.”—Matthieu 6:9, 10.

Royaume ti Nzapa ayeke komande ande na ndö ti sese kue nga ayeke zi pasi nga na aye ti vundu kue. Royaume ni so ayeke mbeni nzoni gouvernement so azo ade ti wara ni lâ oko ape! Ni la, Jésus amû terê ti lo kue ti fa “nzoni tënë ti Royaume,” na ngoi so lo yeke lani na sese na lo tene na adisciple ti lo ti sara nga tongaso.—Matthieu 4:23; 24:14.

Ndali ti kota ndoye so Jéhovah ayeke na ni na mbage ti azo, lo mû zendo ti sara aye ti nzoni so kue na azo. Eskê ye so asara si mo yeke na nzara ti hinga lo nga ti ga nduru na lo? Tongana mo sara tongaso, ye ti nzoni wa la mo yeke wara ande? Mbage so ayeke ga na peko ayeke sara tënë na ndö ni.