Aye Ti Nzoni Wa La Mo Yeke Wara Tongana Mo Hinga Nzapa?

Juska ge, e manda aye nde nde so amû lege na e ti wara kiringo tënë na hunda so atene ‘Mo hinga Nzapa nzoni?’ E manda kozoni kue na yâ ti Bible so iri ti Nzapa ayeke Jéhovah, nga sarango ye ti lo so ahon atanga ni kue ayeke ndoye. E manda nga aye so lo sara nga na aye so lo ga nduru ti sara ndali ti nzoni ti azo. Gbâ ti aye ayeke dä so e peut ti manda na ndö ti Nzapa. Me, nzoni ti nyen la mo yeke wara tongana mo manda ti hinga lo encore?

Jéhovah amû zendo so “tongana mo gi lo, lo yeke sara si mo wara lo”. (1 Chronique 28: 9). Gbu li na ndö ti kota cadeau so ayeke ku mo tongana mo manda ti hinga Nzapa nzoni, ti ga mbeni ‘kota kamarade ti lo.’ (Psaume 25:14). Mara ti kpengba songo ti kamarade tongaso apeut ti ga na mo nyen?

Tâ ngia. Bible afa so Jéhovah ayeke “Nzapa so ayeke na ngia”. (1 Timothée 1:11). Tongana e ga nduru na Jéhovah nga e mû tapande ti lo, e yeke wara tâ ngia so ayeke sara nzoni na e (Psaume 33:12). Mo peut ti duti na ngia tongana mo kpe ti sara aye ti sioni, mo duti na anzoni sarango ye, nga mo duti na nzoni songo na azo. Ye so ayeke sara si mo yeke yeda ande na tënë ti mbeni zo so asû Psaume, so lo tene: “Ti ga nduru na Nzapa asara nzoni na mbi.”—Psaume 73: 28.

Nzapa ayeke pensé na zo oko oko. Jéhovah amû zendo lani na awakua ti lo, lo tene: “Mbi yeke mû na mo wango, na lê ti mbi ayeke gï na ndö ti mo.” (Psaume 32:8). Ye so afa so lo yeke bibe na azo ti lo oko oko na lo mû na ala ye so ala bezoin ni (Psaume 139:1, 2). Tongana mo yeke na nzoni songo na lo, mo yeke bâ so lo yeke lakue na terê ti mo.

Mbeni pendere gigi ti kekereke. Jéhovah amû lege na mo ti duti na pendere gigi laso, me lo zi nga lege na mo ti wara mbeni pendere gigi ti kekereke (Ésaïe 48:17, 18). Bible atene: “Ti wara fini ti lakue lakue, a lingbi ala gi ti hinga mo, mo oko tâ Nzapa, nga na lo so mo tokua lo, Jésus Christ.” (Jean 17: 3). Na yâ ti gigi ti e so akpale asi singo dä so, beku so Nzapa amû na e ayeke tongana kale ti bateau so ayeke kpengba e ti ‘luti nzoni nga ti luti ngangu.’—aHébreu 6: 9.

So ayeke gï ambeni raison so amû lege na e ti hinga Nzapa nzoni nga ti lë kpengba songo na lo. E tisa mo ti sara lisoro na mbeni Témoin ti Jéhovah wala ti gue na ndö ti site jw.org ti wara ambeni sango na ndö ni.