Akiringo Tene na Ahundango Tene ti I
◼ Zo wa ayeke na kungba ti leke yâ ti Da ti Royaume?
Mbeni Da ti Royaume so aleke ni nzoni na ayamba zo nzoni ayeke mu kota ngele na tene so e yeke fa. (Ba 1 Pierre 2:12.) Tongaso, a yeke kota ye ti bata ni mbilimbili si a duti nzoni nga na saleté pepe. Zo oko oko alingbi ti mu mbage dä. A lingbi e bi bê ti e pepe so kusala ni ayeke gi kungba ti ambeni zo. Mingi ni, a yeke aita ti Bungbi ti Mandango Buku oko oko si ayeke leke yâ ti da ti Royaume ni na peko ti tele, na gbe ti ita so amu li ni na bungbi ni, wala lo so amu maboko na lo. Na yâ ti aDa ti Royaume so ayeke yamba akongrégation mingi, fade a-ancien ayeke leke programme ti lekengo ndo ni nzoni si akongrégation ni kue amu mbage dä.
Nzoni lege ti yö kungba so ayeke so wa? A lingbi aleke yâ ti da ni na lege ti mbeni programme so atambela nzoni. A lingbi awara na ndo ti kusala ni agbakuru na aye ti kua ni so alingbi. Fade a sû na mbeti na a zia na tableau, na ndo so a-volontaire alingbi ti ba ni nzoni, mbeni molongo ti akusala so alingbi a sala ni. Ambeti so afa amolongo ti aye so alingbi ti duti use: Mbeni oko teti mbeni ndulu lekengo da ni na peko ti bungbi oko oko, na mbeni nde teti mbeni kota lekengo yâ ti da ni yenga oko oko. Wamungo li ni na mandango buku ayeke leke ande ti tene lekengo yâ ti da ni kue aduti na mbeni lango nga na mbeni ngbonga so alingbi na programme ti ala kue so ayeke mu mbage ti ala dä. Nga, fade a yeke leke lakue lakue a-gazon, a-fleur na akete keke. Fade a zia saleté oko pepe na tele ti lege nga na ndo ti ziango akutukutu. Ngu oko oko, fade a yeke leke ti sukula yâ ti da ni kue, peut-être ngoi kete kozoni na matanga ti Mémorial. A lingbi ti zia na yâ ti programme ni, sukulango afenêtre, atele ti da ni, lekengo a-tapis na a-rideau.
Tâ tene, zo oko oko alingbi ti sala si kua ni aduti mingi pepe na bingo na sese pepe achewing-gum wala ambeni saleté na yâ da ni wala na gigi ti da ni. Tongana zo ague na kabiné, a yeke nzoni ti zia ni na lege ni, si saleté aduti dä pepe teti ala so ayeke ga ande na peko. E bata nzoni si e buba pepe akungba wala aye ti duti. E fa tene ti asaleté so e ba na ndo ti tapis, abanc so abuba, akpale ti a-tuyau ti ngu, a-ampoule ti wâ wala ala so agbi, na ambeni tongaso, na ita so ayeke na kungba ti ba lege ti lekengo yâ ti Da ti Royaume nzoni.
E duti ndulu ti sala mbage ti e. Fade e yeke sala si ndo ti vorongo ti e aduti nzoni, na e yeke fa so e yeke mara so ayeke na saleté pepe, so ayekia Jéhovah Nzapa.—1 Pierre 1:16.