Tongana Nyen ti Maï Kode ti Fango Nda ti Tene
1 Mbeni oko ti nda ti “fango nda ti tene” ayeke “ti sala kusala na ambeni tene nga na ambeni nda ti tene ti ga na mbeni zo ti yeda na mbeni ye.” Ti sala si kusala ti fango tene ti e aga nzoni ahon, a lingbi e leke mbilimbili kode ti e ti fa nda ti tene na azo so amä e. (Kus. 17:2-4) Me tongana nyen ti maï kode ti fango nda ti tene?
2 Ti to nda ni, a yeke nzoni ti gbu li: Na ngoi so e yeke manda atâ tene ti Bible, a yeke kota ye ti gbu li na ndo ye so e yeke manda. Tongana e ba so a yeke ngangu na e ti gbu nda ti mbeni tene, e mu ngoi ti gi nda ni na e gbu li na ndo akiringo tene so e wara. E gi ti hinga polele gi pepe atene so a fa nda ni, me nga atene ti Bible so ayeke na gunda ni.
3 Mbeni fango tene so a leke ni nzoni: E gbu li na ndo lege ti fa nda ti tâ tene na mara ti azo nde nde. Ti zingo nzala ti wamango e ni, a lingbi ande e leke mbeni hundango tene so ayeke pusu zo ti gbu li. E gi mbeni tene so amu lege ti si na mbeni tene ti Bible so fade e yeke sala na kusala ti fa nda ti tene. E bi bê na ndo atene ti kangango lege na lisoro so a lingbi ti tene na e nga na lege ti hon ndo ni. E soro na yâ mbeti so e yeke fa mbeni kpengba tene so alingbi na lisoro ni.
4 E mu tapande ti Jésus: Na ndo tene ti fango nda ti tene na lege ti Mbeti ti Nzapa, Jésus angbâ Tapande teti e. Zia e ba yâ ti fango ye ti lo na lege ti tondo ti Luc 10:25-37. Ba akapa ni: (1) gboto lê na ndo Mbeti ti Nzapa tongana akiri tene na ahundango tene; (2) tisa zo ni ti fa tene ti bê ti lo na gonda lo teti atene so lo tene na ndara; (3) ba nzoni so a yeke gboto lê na ndo kamba so ayeke na popo ti hundango tene ni na versê na yâ ti Mbeti ti Nzapa; (4) sala kusala na mbeni tapande so andu bê ti mu lege na zo ni ti gbu nda ti kiringo tene ni mbilimbili.—Ba La Tour de Garde ti kozo lango ti mars 1986, alembeti 27-28, aparagraphe 8-10.
5 E sala kusala na agbakuru so e yeke na ni: A sala buku Comment raisonner à partir des Écritures mbilimbili teti fango tene. Atene ti tongo nda ti lisoro, akiringo tene na ahundango tene so aye ti kanga lege na lisoro nga atene so afa nda ti ambeni ye mbilimbili ti yâ ti buku ni ayeke mu maboko na e ti maï kode ti fa nda ti tene. Buku so ayeke mbeni gbakuru ti ngele ngangu so a lingbi e duti na ni lakue na tele ti e na yâ kusala ti fango tene na so a lingbi e duti na gingo bê pepe ti sala na kusala na ngoi so e yeke to nda ti mbeni lisoro na ndo Bible. E kiri e ba alembeti 7 na 8 ti sala kusala nzoni ahon na apendere ye so ayeke na yâ ni.
6 Kode ti fango nda ti tene ayeke sala si e lë lengo mingi ahon na yâ kusala ti fango tene nga na fango ye ti e. Fade lo yeke ga na adeba nzoni mingi na awafango tene nga na azo so e yeke wara na yâ kusala ti fango tene ti e.