E Fa Nzo Tene na Bê so Ahinga Ye Biani

¹ Na tongo nda ti kozo siècle, Jésus Christ amu na abe-ta-zo ti lo kusala ti fa nzo tene ti Royaume na ti ‘sala si azo na popo ti amara kue aga adisciple.’ (Mat. 24:14; 28:19, 20) A-Témoin ti Jéhovah aba yanga so amu na nene ni, ni la na hunzingo ti siècle 20 ni sewa ti e ti aChrétien asi na aita-koli nga na aita-wali ahon 5 900 000 na yâ ti akodoro 234. A sala si kota bia ti sepela atoto teti Babâ ti e ti yayu.

² E lï fadeso awe na yâ siècle 21 ni. Wato ti e ayeke tara na mayele ti kanga lege na kota kusala ti e, so ayeke ti fa tene ti Royaume na ti sala adisciple. Lo hon na lege ti aye ti ngangu ti bungbi ti aye ti sese so nga na agbâ ti akete kusala ti gboto lê ti e, ti mu ngoi ti e na ti gboto ngangu ti e. A hon ti zia lege na bungbi ti aye ti sese so ti fa na e ye so ayeke kota na yâ ti fini, e yeke zia Tene ti Nzapa afa na e so ye so ayeke kota mingi ayeke ti sala ye so bê ti Jéhovah aye. (aRom. 12:2) So aye ti tene ti mä wango so Mbeti ti Nzapa amu na e ti ‘fa tene na ngoi ti nzoni nga na ngoi ti ngangu, na ti sala kusala ti e kue.’​—2 Tim. 4:2, 5.

³ E mai mbeni bê so ahinga ye biani: A yeke nzoni aChrétien “alingbi kue, na a hinga na bê ti [ala] biani ye kue so Nzapa aye.” (aCol. 4:12) Mbeni bakari afa nda ti hingango ye biani na bê tongana “hingango biani so mbeni ye ayeke tâ tene.” So e yeke aChrétien, a lingbi e hinga biani ye nyen na bê ti e? So tene ti prophétie ti Nzapa ayeke tâ ye na e gue fadeso ayo awe na yâ ngoi ti nda ni. A lingbi e duti na mbeni beku so akpengba tongana ti bazengele Paul so atene, na ndo nzo tene, so lo ‘yeke ngangu ti Nzapa ti sö azo kue so amä na bê.’​—aRom. 1:16.

⁴ Diable ayeke sala kusala na azo ti sioni nga na azo ti handa, so ahanda tele ti ala mveni, ti sala ngangu na ndo ti ambeni zo na ti handa ala. (2 Tim. 3:13) Teti so e hinga tene ni kozo, e leke aye ti kpengba na hingango ye biani na bê ti e so e yeke biaku na tâ tene. A hon ti zia agingo bê ti fini ti dê wâ ti e, e yeke ngbâ ti zia aye ti Royaume na kozo ndo. (Mat. 6:33, 34) E ye nga pepe ti glisa so e yeke na mbeni kota ngoi, na tapande na bingo bê so nda ti bungbi ti aye ti sese so ade yongoro mingi. Lo yeke ndulu mingi ahon. (1 Pierre 4:7) Atä ye asi so e bi bê so fango nzo tene ayeke lë alengo mingi pepe na yâ ti ambeni kodoro teti so a fa tene dä kozo awe, a lingbi kusala ti gbotongo mê angbâ ti tambela.​—Ezéch. 33:7-9.

⁵ Na lâ ti nda ni so, akota hundango tene ayeke: ‘Mbi yeke mu na nene ni komandema ti Jésus ti sala adisciple? Tongana mbi yeke fa nzo tene, mbi yeke fa na gigi so mbi hinga biani na bê ti mbi so beku ti Royaume ayeke tâ ye? Mbi leke na bê ti mbi ti mu mbage mingi ahon na kusala ti songo zo so?’ Teti e hinga so e gue na li ni mingi na yâ ngoi ti nda ni, a lingbi e bi bê na ndo e mveni, na kusala ti e ti wafango tene na ti awafango ye, teti na salango tongaso fade e sö e mveni nga na ala so ayeke mä e. (1 Tim. 4:16) Tongana nyen e kue e lingbi ti kpengba hingango ye biani na bê ti e na yâ kusala ti e ti fango tene?

⁶ E manda aThessalonicien: Bazengele Paul, tongana lo dabe na ngangu kusala so aita ti Thessalonique asala, atene na ala: “Nzo tene so e fa asi na popo ti i pepe gi na lege ti tene me nga na lege ti ngangu na yingo ti nzoni-kue na hingango ye biani na bê, gi tongana ti so i hinga mara ti azo wa e ga na lê ti i teti i; na i ga azo ti sala legeoko tongana e sala, na tongana Seigneur asala, teti i kamata Tene ni na yâ pono mingi, na tâ ngia ti Yingo ti Nzoni-kue.” (1 aThes. 1:5, 6, NW) Biani, Paul ayeke gonda giriri kongrégation ti Thessalonique teti so, atä aye ti vundu mingi, azo ti lo ayeke fa tene na wâ nga na bê so ahinga ye biani. Ye nyen amu lege na ala ti sala tongaso? Mingi ni, a yeke wâ na mabe so ala ba na ndo ti bazengele Paul nga na afon lo ti kusala so asala ye ti nzoni na ndo ti ala. Ngbanga ti nyen?

⁷ Fini ti Paul na ti afon lo ti tambela afa so yingo ti Nzapa ayeke na ndo ti ala nga so ala mä na bê ti ala kue na ye so ala yeke fa. Kozoni ti si na Thessalonique, a sala ye ti kamela na Paul nga na Silas na Philippes. Atä so adë ngbanga oko pepe na ndo ti ala, apika ala, azia ala na da ti kanga na azia ala na yâ olombo. Ye oko, ye ti ngangu so awoko pepe wâ ti ala teti nzo tene. Mbeni kusala ti Nzapa asala si azi ala, a sala si zo ti bata da ti kanga ni na sewa ti lo amä na bê, na a mu lege na ala ti ngbâ na yâ kusala ti ala.​—Kus. 16:19-34.

⁸ Na gbe ti yingo ti Nzapa, Paul ague na Thessalonique. Kâ, lo sala kusala teti wara aye so atia lo, na pekoni ti bi tele ti lo kue ti fa tâ tene na azo ti Thessalonique. Lo gbanzi tele ti lo pepe ti fa nzo tene na ngoi kue. (1 aThes. 2:9) Hingango ye biani na bê ti lo so Paul afa na tene andu ambeni zo mingi na tongaso ala zia vorongo yanda ti ala na ala ga awakua ti tâ Nzapa, Jéhovah.​—1 aThes. 1:8-10.

⁹ Salango ngangu akanga lege pepe na afini wamabe so ti fa nzo tene. Teti so fini mabe so ala wara apusu ala na so ala hinga na bê ti ala so fade ala yeke wara anzoye ti lakue lakue, azo ti Thessalonique alondo ti fa tâ tene so ala yeda na ni na wâ. Kongrégation ti ala aduti na wâ mingi na tongaso Macédoine nga na Achaïe amä tene ti mabe ti ala nga na wâ ti ala. Ni la, tongana Paul asû kozo mbeti ti lo na aThessalonicien, azo ahinga akusala ti ala nzoni mingi awe. (1 aThes. 1:7) So tâ pendere tapande!

¹⁰ Ndoye na mbage ti Nzapa nga na mbage ti azo apusu ala ti sala kusala: E lingbi laso tongana nyen, na tapande ti aThessalonicien, ti bata mbeni kpengba mabe na ngoi so e yeke fa nzo tene? Na ndo ala, Paul asû na mbeti: “E dabe e lakue na kusala ti i ti mabe, na kusala ti i ti ndoye.” (1 aThes. 1:3) A yeke polele so ala yeke la ni na kota ndoye teti Jéhovah Nzapa nga teti azo so ala yeke fa tene na ala. A yeke oko ndoye so si apusu Paul na afon lo ti fa na aThessalonicien “gi tene nzoni ti Nzapa pepe, me âme ti i mveni nga.”​—1 aThes. 2:8.

¹¹ Legeoko nga, kota ndoye teti Jéhovah nga teti mba ti e ayeke pusu e ti ye ti mu mbage mingi ahon na kusala ti fango tene so Nzapa ahunda na e ti sala. Na mara ti ndoye tongaso, e yeda so e oko oko ayeke na kungba ti fa nzo tene. Na gbungo li na bê ti kiri singila na ndo ye kue so Jéhovah asala teti e ti gue na e na “tâ fini,” fade bê ti e ayeke pusu e ti kangbi na azo so e yeke tingbi na ala apendere tâ tene so e yeda na ni na bê ti e kue.​—1 Tim. 6:19.

¹² Na ngoi so e ngbâ na yâ kusala ti fango tene, a lingbi ndoye ti e teti Jéhovah nga teti azo angbâ ti maï. Tongana a yeke tongaso, fade a yeke pusu e ti kono mungo mbage ti e na fango tene da na da nga na ambeni lege kue ti fango tene so ayeke na gbele e. Fade e yeke gbu angoi ti fa tene na ngoi kue so asi na e na asewa ti e, azo so ayeke ndulu na e nga na ala so e hinga ala. Na atä mingi ti azo ake nzo tene so e yeke fa na ala na ambeni asala ngangu ti kanga lege na fango tene ti Royaume, e yeke wara ande mbeni kota ngia na bê ti e. Ngbanga ti nyen? Ngbanga ti so e yeke hinga na bê ti e biani so e sala ngangu ti e kue ti fa tene na ndo Royaume na ti mu maboko na azo ti wara salut. Na ndo ni, Jéhovah ayeke hiri ande deba nzoni na ndo angangu so e yeke sala ti wara na azo ti be-nzoni. Atä akpale ti fini ti lâ oko oko ayeke ga ngangu mingi ahon nga so Satan agi ti buba yâ ti ngia ti e, e lingbi ande ti bata hingango ye ti e biani na bê kue nga na wâ ti e ti fa tene na ambeni zo. Tongana zo oko oko ayö kungba ti lo, akongrégation ayeke kpengba na aduti na wâ tongana ti Thessalonique.

¹³ E zia lâ oko pepe na gbele atara: Ti hinga ye biani na bê ayeke nga kota ye tongana e wara atara nde nde. (1 Pierre 1:6, 7) Jésus afa mbilimbili na adisciple ti lo so tongana ala mu peko ti lo fade ala “ga ye ti ke na lê ti amara kue.” (Mat. 24:9, NW) Ye so asi na Paul na Silas na ngoi so ala yeke na Philippes. Tondo so asû ni na Kusala chapitre 16 afa so abi Paul na Silas na da ti kanga ti yâ ni na akanga gere ti ala na yâ a-olombo. Fani mingi, kota da ti kanga ni ayeke giriri tongana mbeni sedu so asululu so yâ ni akono nzoni na wâ aza dä nzoni angoro ni. Nde na so, da ti kanga ti yâ ni ayeke na wâ pepe na pupu aya dä nzoni pepe. Paul na Silas aduti na yâ vukongo ndo, ndo wâ nga na fungo ti sioni ti ndo ti kanga so ayeke nzoni oko pepe. Mo lingbi ti bi bê na songo ti tele so ala wara na dutingo na yâ a-olombo teti angbonga mingi, peko so afâ na kâ nga na mênë so ayulu ngbanga ti apika so ala wara?

¹⁴ Atä atara so, Paul na Silas angbâ be-ta-zo. Ala fa na gigi tâ hingango ye biani na bê so amu na ala ngangu ti sala na Jéhovah atä akpale. Hingango ye ti ala biani na bê asigigi polele na Kusala 16:25, na ndo so e diko so Paul na Silas ‘asambela na asala bia ti sepela Nzapa.’ Tongaso, atä ala duti na da ti kanga ti yâ ni, ala hinga biani na bê kue so Nzapa ayeda na ala ni la ala he bia na kota go na tanga ti azo ti kanga ni amä ala. A lingbi e duti na oko hingango ye biani na bê so laso tongana atara mabe ti e.

¹⁵ Atara so Diable azia na gbele e ayeke mingi. Ambeni na popo ti e ayeke wara aye ti ngangu so alondo na sewa, ti ambeni a yeke ti luti na gbele akpale ti adengo ngbanga, wala kengo ndo ti a-apostat. E lingbi ti diko nga akpale ti nginza, akpale ti wara aye so atia zo. Ti apendere, a lingbi ala luti na gbele salango ngangu ti akamarade ti ala ti ekole. Tongana nyen ti wara lege ti luti na gbele akpale so? A lingbi e duti na nyen si mabe ti e angbâ lakue na wâ?

¹⁶ Kozoni kue, a lingbi e lë akpengba songo na Jéhovah. Tongana Paul na Silas ayeke la ni na da ti kanga ti yâ ni, ala dema tele pepe teti dutingo ti ala na ala toto ahon ndo ni pepe na ndo ye so asi na ala. Fade fade ala vi lê ti ala na mbage ti Nzapa na yâ sambela na ala sepela lo na lege ti abia. Ngbanga ti nyen? Ngbanga ti so ala duti na tâ songo na Babâ ti ala ti yayu. Ala hinga la ni so ala ba pasi ngbanga ti dutingo ti ala ndulu na mbilimbili nga so salut ti ala alondo na Jéhovah.​—Ps. 3:9 (3:8, NW).

¹⁷ Tongana a lingbi e luti na gbele atara laso, a lingbi e nga e gi salut so alondo na nduzu. Paul awa e ti ‘fa na Nzapa ye so i ye; na fade siriri ti Nzapa, so ahon bibe kue ayeke bata ande bê ti e na bibe ti e.’ (aPhil. 4:6, 7) A yeke ye ti dengo bê ti hinga so Jéhovah ayeke zia ande e oko pepe ti luti na gbele atara! (Es. 41:10) Lo yeke lakue ndulu na e tongana e sala na lo na hingango ye biani na bê.​—Ps. 46:8 (46:7, NW).

¹⁸ Mbeni kota lege ti sala si hingango ye biani na bê ti e angbâ na ngangu ayeke ti duti lakue na ye mingi ti sala na yâ kusala ti Jéhovah. (1 aCor. 15:58) A bi Paul na Silas na kanga ngbanga ti so ala fa lakue nzo tene. Ala zia ti fa tene ngbanga ti akpale ti ala? Oko pepe, ala ngbâ ti fa tene atä na da ti kanga, nga na pekoni so azi ala, ala gue na Thessalonique na ala lï na yâ synagogue ti aJuif ti ‘fa nda ti tene na ala na ndo Mbeti ti Nzapa.’ (Kus. 17:1-3) Tongana e yeke na kpengba beku na Jéhovah na tongana e hinga na bê kue so e yeke na tâ tene, ye oko “alingbi kangbi e pepe na ndoye ti Nzapa so ayeke na yâ Christ Jésus Seigneur ti e.”​—aRom. 8:35-39.

¹⁹ Atapande ti laso ti hingango ye biani na bê kue: Na ngoi ti e, aita-koli na aita-wali mingi, na tapande ti Paul na Silas, azia pendere tapande na ndo fango na gigi hingango ye biani na bê kue. Mbeni ita-wali so asö kuâ na kando ti sana ti Auschwitz adabe lo na hingango ye biani na bê kue nga na ngangu mabe so aita-koli na aita-wali afa na gigi na ngoi ti kanga ti ala. Lo tene: “Mbeni lâ, na ngoi ti hundango tene ti bê ti e, mbeni turugu ti kota kamba aga ndulu na mbi, lo kanga maboko ti lo na gobo. Lo tene na kongo: ‘Me fade e yeke sala nyen na i? Tongana a gbu i, tene ni aso i pepe, tongana a zia i na kanga, a sala ye oko pepe na i; tongana a tokua i na kando ti sana, i yeke gi même bê ti i pepe; na tongana a dë ngbanga ti kuâ na li ti i, i yeke sala ye oko pepe, mo ba mo tene ye ni andu i pepe. Tongaso fade e yeke sala nyen na i?’ ” A yeke biani ye ti mungo ngangu ti ba mabe so aita ti e aduti na ni na yâ ti angoi ti ngangu so! Ala gi lakue maboko ti Jéhovah ti tene ala gbu ngangu.

²⁰ E dabe e mbilimbili na hingango ye biani na bê kue so aita ti e mingi afa na gigi na gbele salango ngangu na popo ti akete mara so asi na yâ ti angu so ahon. Atä ala yeke na yâ aye ti sioni, aita so amu li ni ayeke bata si aita-koli na aita-wali ti ala awara kobe na lege ti yingo. Ala kue ahinga biani na bê kue so ‘ye ti bira kue so asala ti ke ala na ni alingbi sala ye oko pepe.’​—Es. 54:17.

²¹ Mingi ti aita ti e so koli wala wali ti ala ayeke Témoin pepe ayeke fa nga na gigi kpengba mabe nga na gbungo ngangu. Mbeni ita ti Guadeloupe awara kota tara na mbage ti wali ti lo so ayeke Témoin pepe. Ti sala si bê ti lo anze na ti kanga lege na lo ti gue na abungbi ti aChrétien, wali ni asala na mbana ti to kobe pepe, wala ti sukula, ti repasser wala ti fu abongo ti lo pepe. Teti ambeni ngoi so ayo mingi lo yeke ke ti sala tene na koli ti lo. Ye oko, na salango na Jéhovah na hingango ye biani na bê kue nga na gingo maboko ti lo na yâ sambela, ita so awara lege ti hon ndo ti akpale so kue. Teti ngoi oke? Ndulu na ngu bale use, na pekoni bê ti wali ti lo agbian yeke yeke. Na pekoni, ita-koli ni awara ngia mingi tongana lo yeda na beku ti Royaume ti Nzapa.

²² Na nda ni, a lingbi e glisa pepe hingango ye biani na bê kue ti aita ti e ti koli na ti wali so ade pendere so ayeke gue lâ na lâ na ekole, na so a lingbi ala luti na gbele asalango ngangu ti akamarade ti ala nga na ambeni kpale. A yeke kete ye pepe ti duti nde na ekole tongana ti so mbeni oko ti aita-wali ti e so ade pendere afa: “Na ekole, azo kue ayeke wa e ti sala kpengba li kete. Amba ti e ayeke yekia e mingi ahon tongana e ke yanga ti komande kete.” So tâ ye ti ngangu si apendere ti e alingbi ti luti na gbe ni! A lingbi ala leke na bibe ti ala nga na bê ti ala ti luti na gbele tara.

²³ Mingi ti apendere awara lege ti bata be-biani ti ala atä na gbele atara. Na tapande, ba ye so asi na mbeni ita-wali ti Franzi so ade pendere. Mbeni lâ, na peko ti tengo kobe, amolenge-koli atara ti gbu lo na ngangu ti tene lo sû yanga ti ala, me lo sambela na lo ke na ngangu, na tongaso ala zia lo. Na pekoni, mbeni oko ti ala akiri na atene na lo so lo gonda gbungo ngangu ti lo. Lo wara lege ti mu na lo nzoni tene ti témoin na ndo Royaume, na lo fa na lo anengo kpengba-ndia so Jéhovah alu teti ala kue so aye ti wara mbage na adeba nzoni ti lo. Na yâ ti ngu ni so, lo wara nga lege ti fa tene ti mabe ti lo na klase ti lo.

²⁴ So tâ pendere matabisi si e yeke na ni ti duti na popo ti ala so Jéhovah ayeke na ngia ti sala kusala na ala teti fa, na hingango ye biani na bê, ye so bê ti lo aye! (aCol. 4:12) Na mbage, e yeke na pendere lege ti fa na gigi be-biani ti e tongana e wara salango ngangu ti Satan Diable, mbeni wato so ayeke sioni mingi tongana bamara. (1 Pierre 5:8, 9) Zia e glisa lâ oko pepe so Jéhovah ayeke sala kusala na tokua ti Royaume ti mu salut pepe gi na e so ayeke fa tene, me nga na ala so ayeke mä e. Zia adesizion so e yeke mu nga na dutingo ti e ti lâ oko oko afa so e zia Royaume na kozo ndo! E ngbâ ti fa nzo tene na bê so ahinga ye biani!