Duti Ndulu ti Wara Awambongi na yâ Territoire ti Mo

¹ Jéhovah ayeke kono yâ ti tisango ndo so: “Ga! . . . Zo so aye, zia lo nyon ngu so amu fini, zia lo nyon senge senge.” (Apoc. 22:17) Kota wungo ti awambongi so angbâ ti gue na li ni ayeke na popo ti azo so ayeda na tisango ndo so. Tongana ye ti pekoni, na yâ ti andangba ngu 13 so ahon, a leke akongregation 27 nga na a-groupe 43 so atene yanga ti awambongi na filiale ti États-Unis. Na Togo, mbeni groupe oko ti azo so asala tene ti awambongi ayeke dä na Lomé. Ndulu na azo 10 ague na abungbi lakue nga azo ahon 30 ague na akota bungbi.

² Atä so akongregation na a-groupe so atene yanga ti awambongi amu ngangu ti ala kue ti fa tene na awambongi nga na azo so amä ndo nzoni pepe na yâ aterritoire ti ala, azo tongaso ayeke mingi so a lingbi a wara ala na a fa tene na ala na yâ kusala ti fango tene.

³ Mo lingbi ti mu maboko tongana nyen? Tongana mo yeke na ndo so azo mingi ayeke dä, mo ba awe ambeni zo so asala tene na yanga ti awambongi? Mo hinga mbeni zo na ndo ti kusala ti mo wala na ekole so ayeke na mbeni wambongi na yâ ti sewa ti lo? Duti ndulu ti wara azo so amä ndo pepe na ngoi so mo yeke sala akusala ti mo ti lâ oko oko. Me tongana nyen mo lingbi ti hinga biani so ala yeke wara tene ti témoin ti Royaume?

⁴ Salango tene ti témoin: Ye afa so awambongi mingi ague na li ni hio na yâ mandango tâ tene tongana ala wara lege ti bungbi oko na aTémoin so ayeke awambongi na abungbi ti kongregation. Na ndo tene so, tongana mo tingbi na mbeni wambongi na yâ fango tene ti mo, a lingbi mo sû iri ti lo nzoni nga na adresi ti lo kue, so andu nga iri wala molongo ti balabala ti lo na molongo ti da ti lo, nga na ambeni sango nde so ayeke mu ande maboko na mo ti wara zo ni. Sala kue ti hinga wala wambongi ni agbu nda ti mbeni oko ti ayanga ti awambongi. Mu asango kue so andu wambongi ni na secrétaire ti kongregation so fade na nda ti nze oko oko ayeke fa na Société awambongi kue so alango na yâ ti territoire ti kongregation. Tongaso, Société alingbi nzoni ahon ti leke ambeni ye teti awambongi na yâ ti territoire.

⁵ Na ngoi so mo yeke ku ti tene amaï ambeni ye, tongana zo oko ayeke ndulu pepe ti mu maboko na wambongi ni na lege ti yingo na yâ vaka ti mo, mo lingbi ti mu maboko tongana nyen? Ngbanga ti nyen ti sala pepe fini vizite na ti sala tene na mbeni oko ti azo ti sewa ti wambongi ni, so amä ndo? Hunda ti fa mbeni kasete vidéo so ayeke na yanga ti awambongi ti zingo nzala ti wambongi ni. Ambeni wafango tene amanda même yanga ti awambongi ti fa tene nzoni ahon na ala. (Kus. 16:9, 10) A lingbi ti wara brochure Ahunda na buku Hingango Ye na Yanga ti Awambongi na Anglais na ndo kasete vidéo. Mungo li ni na yâ mandango Bible na salango kusala na agbakuru so aga awe na anzoni ye na nda ni.

⁶ Na dutingo ndulu ti wara awambongi na yâ vaka ti mo, mo lingbi ti mu lege na ala ti nyon senge senge ngu so amu fini.​—Mat. 10:11.