Ku Kete Pepe!
1 Tongana e yeke ndulu ti gue ti fa tene da na da, kota ye ti hon ndo ni ayeke peut-être da ti e mveni. Bibe ti lingbingo kue pepe alingbi ti sala si tele ti e ane ti sigigi ti fa tâ tene na “mara ti azo nde nde kue.” (1 Tim. 2:4, NW) Me a lingbi e ku kete pepe ti fa nzo tene. Ngbanga ti nyen?
2 A yeke tokua ti Jéhovah: Jéhovah afa tene ti lo na lege ti Bible. Tongana e fa tokua so na azo, e yeke fa abibe ti lo, pepe ti e. (aRom. 10:13-15) Tongana azo ake tokua ti Royaume ni, ala ke biani Jéhovah. Ye oko, bê ti e anze pepe. E hinga na bê kue so tokua so ayeke ndu bê ti azo so aye mingi ti tene dutingo ti aye ti sese so agbian na so ahinga ye ti yingo atia ala.—Ezéch. 9:4; Mat. 5:3, 6.
3 Jéhovah agboto azo: Zo so ake ti mä e giriri alingbi peut-être ti mä e fadeso teti so dutingo ti aye ti lo agbian na bê ti lo awoko. Jéhovah alingbi fadeso ti fa nzobe ti lo na mbage ti zo so na ti ‘gboto lo.’ (Jean 6:44, 65, NW) Tongana ye tongaso asi, e ye ti duti ndulu ti tene Jéhovah asala kusala na e na ti yeda na fango lege ti a-ange na yâ warango mara ti azo tongaso.—Apoc. 14:6.
4 Nzapa amu na e yingo ti lo: Yingo ti nzoni-kue amu maboko na e ti sala tene na “mbito pepe na yâ Seigneur.” (Kus. 14:1-3) Na batango na li so e yeke na mungo maboko so ti ngangu na yâ kusala ti e, fade e yeke ke pepe ti sala tene ti tâ tene na azo so ayeke ndulu na e, afon e na ndo ti kusala, akamarade ti e na ekole, asongo, azo so ahinga mbeti mingi wala azo ti mosoro.
5 Jésus afa na e lege ni: Giriri Jésus asala kusala na ahundango tene so apusu zo ti gbu li, atapande so azo ahinga ni, nga kode ti fango tene na lege ti Mbeti ti Nzapa. Lo fa nda ti tâ tene na lege so akpengba pepe, so anzere, na so alondo na bê. Laso aye so angbâ lakue akode ti nzoni ahon. (1 aCor. 4:17) Dutingo ti aye so e fa tene dä alingbi ti gbian, me tokua ti Royaume so ayeke ngangu agbian lâ oko pepe.
6 E yeke na matabisi ti tene Jéhovah asala kusala na e ti mu maboko na azo na mbeni lege so ayeke nde na so ayeke kota ye mingi. Zia e ku kete pepe! Zia e duti na mbito pepe na e mu lege na Jéhovah ti ‘lungula lege na e’ si e lingbi ti fa nzo tene na azo.—aCol. 4:2-4.