Maï Angangu ti Mo ti Gbungo Nda ti Ye

¹ Lâ ti nda ni so amu vundu, so e yeke fadeso na yâ ni, aga na akpale nga na akota tara nde nde na azo ti Nzapa na ndo kue. (2 Tim. 3:1-5) E kue e yeke na bezoin ti tene a kpengba e si e luti ngangu na yâ mabe. (1 aCor. 16:13) E lingbi ti sala tongaso na lege ti mungo maboko ti Jéhovah tongana e ngbâ lakue ti te kobe so ayeke na yâ Tene ti lo, ti zia bê kue na ndo yingo ti lo, nga ti ngbâ ndulu mingi na bungbi ti lo.​—Ps. 37:28; aRom. 8:38, 39; Apoc. 2:10.

² Na lege ni, a fa nda ti kota li ti tene “I Ga Abiazo na Lege ti Angangu ti Gbungo Nda ti Ye” na ngoi ti kapa ti kota bungbi ti lango oko ti ngu ti kusala 2001. A luti la ni na ndo 1 aCorinthien 14:20, so na yâ ni e diko atene ti bazengele Paul: “Aita, a lingbi i bi bê ti i pepe tongana amolenge; tene ti ye ti sioni, i duti tongana aforoto, me i ga abiazo na lege ti bibe ti i.” Bibe ti mo na ndo kapa ni la ni ayeke tongana nyen?

³ “So ye ti mungo ngangu!” “A yeke la ni tâ ye so e ku!” So ayeke gi use na popo ti akiringo tene ni. Même mbeni zo so ayeke Témoin pepe, so aga na kota bungbi ti lango oko so ti ba batême ti molenge ti lo ti wali ti ngu 12, atene kapa ni apika bê ti lo mingi na lo lingbi ti ba tongana nyen a yeke ga na ye ti nzoni na sewa ti lo. Bibe ti mo ayeke tongaso nga? Zia e dabe na ambeni ngbongboro tene ti kapa ni.

⁴ Tâ hingango ye ayeke kota ye ti maï angangu ti gbungo nda ti ye: Na yâ kozo diskur ni, “Maï Fadeso Angangu ti Mo ti Gbungo Nda ti Ye,” wamungo diskur ni agboto lê na ndo ye wa so a hunda ti wara ti hon ndo ti akpale ti laso? Ye mingi ahon gi hingango ye na li. A lingbi e maï na e kono angangu ti e ti gbungo nda ti Bible, si asioni kue so e yeke na gbele ni ahon ndo ti e pepe. Gbungo nda ti ye so ahunda fango lege ti Nzapa. Legeoko tongana wasungo psaume, a lingbi e hunda na Jéhovah na yâ sambela ti sala si e gbu nda ti andia na adango bê ti lo si e lingbi ti sala na lo na bê kue.​—Ps. 119:1, 2, 34.

⁵ Na yâ diskur ti peko, surveillant ti circonscription afa so Jéhovah, na lege ti Tene nga na bungbi ti lo, amu na e ‘Amaboko ti Ga Abiazo na Lege ti Gbungo Nda ti Bible.’ A fa nda ti gbungo nda ti ye tongana “ngangu ti hinga mbeni ye nzoni na ti ba nda ti tene ti yâ ni na hingango akamba so ayeke na popo ti akete mbage ni na tene ni kue, si a gbu nda ni.” Zo wa alingbi ti mu maboko na e ti maï ngangu so? Jéhovah amu amatabisi ti azo ti mu maboko na e si e gue na li ni na lege ti yingo. (aEph. 4:11, 12) Bungbi ti lo na ndo sese awa e ti diko Tene ti Nzapa lâ oko oko na ti gue lakue na abungbi kue ti kongregation. (Ps. 1:2) A fa na e tongana nyen ti sala kusala na Bible nga na ambeti ti Chrétien na yâ mandango ye ti e mveni nga na sewa, nga na yâ lekengo tele teti abungbi na fango tene. Mo yeke wara aye ti nzoni na yâ aye kue so a mu? Mo yeke bata mbeni kapa ti dikongo Bible lakue mo mveni? Ye so ayeke kota ye tongana e ye ti tene a bata e si e tï pepe na yâ gbanda ti anzala, asalango ye, asenda-ndara, nga aye ti handa ti sese so.​—aCol. 2:6-8.

⁶ A lingbi a fa lege na angangu ti e ti gbungo nda ti ye: Na yâ kozo diskur ti lo, so li ti tene ni ayeke “Bata Dutingo ti Mo na Lege ti Yingo Nzoni na Fango Lege na Angangu ti Mo ti Gbu Nda ti Ye,” wamungo diskur so aga gango afa so azo ti sese alingbi pepe ti sala kangbi na popo ti ye ti nzoni na ti sioni. (Es. 5:20, 21) A yeke tongaso ngbanga ti so ala ke ti yeda na alege ti tambela ti mbilimbili ti Nzapa na ti bata ni. Nde na so, e so e wara fango lege ti yingo na yâ bungbi ti Jéhovah, e yeda na alege ti Nzapa, so nda ni ayeke ti fa lege na akusala nga na atambela ti e. Tongaso, e lingbi ti fa na e mveni ye so ayeke nzoni na so anzere na Jéhovah, nga ye so ague legeoko na ye ti bê ti lo so ayeke mbilimbili-kue.​—aRom. 12:2.

⁷ Ti kpe abibe ti sese so ague kirikiri nga na asioni lengo ni, a lingbi e ngbâ lakue ti fa lege na angangu ti e ti gbungo nda ti ye. Tongana nyen? Tongana ti so a fa pekoni na aHébreu 5:12-14, bazengele Paul agboto lê na ndo nene ti nyon pepe gi “dulait” ti tene ni. A lingbi e te kpengba kobe ti yingo, tongana ti so e yeke wara na yâ Mandango prophétie ti Isaïe na Mandango Buku ti Kongregation. Na pekoni, a lingbi e duti ndulu ti sala ye alingbi na ye so e manda na yâ fini ti e. Tongana e sala tongaso, e hinga na bê kue mbilimbili ti akpengba-ndia na alege ti Jéhovah. Ye so afa lege na angangu ti e ti gbungo nda ti ye ti hinga polele ye ti nzoni na ti sioni.

⁸ Vundu ni ayeke so ambeni ague yongoro na lege ti yingo. Ngbanga ti nyen? Ala zia lê ti ala pepe na ndo ye so ayeke nzoni nga mbilimbili na lê ti Jéhovah. Ye ti pekoni ayeke so ala tï na gbe ti akua-singa ti da-singa na ti televizion so ayeke nzoni pepe na lege ti Tene ti Nzapa, ti sioni mozoko, wala ti sioni ngangu ti alisoro na lege ti ordinateur. Na salango ye na ndara, fade e kpe si azo ti pitan, ti buba, wala ti sioni asala ngangu na ndo e pepe.​—aProv. 13:20; aGal. 5:7; 1 Tim. 6:20, 21.

⁹ A lingbi amaseka “aduti aforoto teti ye ti sioni”: Kapa ni ayeke la ni na ambage use so awa mbilimbili amaseka ti maï angangu ti gbungo nda ti ye ti ala. Awamungo diskur ni afa so dutingo “aforoto teti ye ti sioni” aye ti tene dutingo lakue tongana azo so ahinga ye pepe, so ti tene azo so tene ayeke na li ti ala pepe tongana akete molenge, na ndo aye so ayeke sioni na lê ti Jéhovah. (1 aCor. 14:20) A wa e kue ti sala hange mingi na ndo lege so e yeke sala kusala na ngoi ti e si e kpe ti duti na gbele amara ti sioni nde nde nga ti kpe ti tene a sala sioni na e. (aEph. 5:15-17) A wa e ti diko wungo ti ngoi so e mu ti diko na ambeti so asala biani pepe si e maï na lege ti gbungo nda ti aye ti yingo. Mo sala ni la ni? Aye ti pekoni afa nyen na gigi? Na ndo ti dikongo Bible lâ oko oko, leke na bê ti diko ambeti kue so bungbi ni ayeke mu. Fade salango tongaso ayeke mu maboko na e kue, so andu amaseka, ti “hinga nda ti ye.”​—aProv. 4:7-9.

¹⁰ “E sala ye alingbi na akpengba-ndia ti Bible na gbungo nda ni teti nzoni ti e”: So ayeke li ti ndangba diskur ti kapa ti kota bungbi ti lango oko so. Wamungo diskur so aga gango afa so Jéhovah ayeke Lingu ti gbungo nda ti ye so amu fini, so ayeke kota mingi ahon ti azo kue. Bi bê kete na ndo lege so e yeke na ni ti wara ye na yâ gbungo nda ti ye ti Jéhovah! Na nzobe, lo mu ni na azo so agi ni na bê kue nga ahunda ni na yâ mabe. (aProv. 2:3-5, 9; 28:5) Mo yeke wara ye ti nzoni kue na lege ti ye so lo mu?

¹¹ A wa e la ni ti manda ti hinga akpengba-ndia na ngoi so e yeke diko Bible. (2 Tim. 3:16, 17) Manda ala nzoni ti wara tâ gbungo nda ti ye so Jéhovah ayeke fa. Mu ngoi ti gbu li na ndo akpengba-ndia so na zia ni ngangu na yâ bibe nga bê ti mo. Fade ye so afa lege na angangu ti mo ti gbungo nda ti ye si mo lingbi ti sala ye nzoni tongana mo yeke mu adesizion. (Jos. 1:8) Zia e ba ambeni kete mbage ti aye so azo mingi aluti na gbele ni nga tongana nyen batango akpengba-ndia ti Bible alingbi ti mu maboko na e ti sala ye nzoni.

¹² ‘A lingbi mbi mu peko ti mbeni kode ti yungo bongo na ti lekengo kuali?’ Mingi ni, bibe ti salango ye ti sese so ahon ndo ni na yâ yungo bongo nga na lekengo kuali afa na gigi yingo ti kengo yanga. Mara ti yingo tongaso afa lege na azo ti yu bongo nzoni pepe nga pendere pepe, wala ti gboto lê ti akoli wala ti awali. Akpengba-ndia wa ti Bible, so alingbi, ayeke mu ande maboko na e ti hon ndo ti abibe tongaso? Teti e fa lege awe na angangu ti e ti gbungo nda ti ye, fade e yeke ba na nene ni kpengba-ndia so a wara na 1 Timothée 2:9, 10, ti yü bongo “na kota bê pepe, na ndara . . . , so alingbi na [azo] so atene ala yeke bata tene ti Nzapa.” Ambeni kpengba-ndia so alingbi na ni andu ala so a sala tene ti ala na 2 aCorinthien 6:3 nga na aColossien 3:18, 20.

¹³ ‘Mbi lingbi ti sala nyen ti ngbâ lakue ti bata asongo ti sewa ti mbi ngangu?’ Nzoni salango lisoro na popo ti azo ti sewa ayeke kota ye. Jacques 1:19 (NW) atene na e: “A lingbi zo oko oko aduti ndulu ti mä ndo, ti sala tene hio hio pepe, ti sala ngonzo hio hio pepe.” A lingbi azo ti sewa amä tene nga asala tene na popo ti mba teti so ayeke azo use wala mingi si ayeke sala lisoro na yâ sewa. Atä na ngoi so ye so e tene ayeke tâ tene, tongana a tene ni na mbana, na baba, wala na nzobe pepe, ayeke sala peut-être sioni ahon ti sala nzoni. Tongaso, atä e yeke mbeni koli wala mbeni wali, babâ wala mama, wala molenge, a lingbi e zia salango tene ti e ‘aduti nzoni lakue, a leke ni na ingo.’​—aCol. 4:6.

¹⁴ ‘Kota nzala ti kungba ayeke fa lege na mbi?’ Kota nzala ti kungba ayeke mbeni ngangu ti sese so aga na kpale na fini ti zo. A zi lege pepe na dutingo na ngia. (Zo-ti. 5:9 [5:10, NW]; Luc 12:15; 1 Tim. 6:9, 10) Ti mu maboko na e ti kpe son ti kota nzala ti kungba, Jésus afa na e kota kpengba-ndia so: Ti zia lê na ndo ye oko. Dutingo na fini na lege so alingbi nga akpengba pepe andu ziango lê ti e na ndo aye ti Royaume, na ziango tanga ti aye kue na use ndo.​—Mat. 6:22, 23, 33.

¹⁵ A lingbi e zia nyen na gbele e?: Na yâ Tene ti Nzapa, e wara lingu ti akpengba-ndia ti mbilimbili, so e lingbi ti zia bê dä ti fa lege na e na yâ mungo adesizion. A lingbi e manda akpengba-ndia so, e gbu li na ndo ni, na e hinga tongana nyen ti sala ye alingbi na ni na yâ fini ti e. Tongaso, na ‘fango lege na angangu ti e ti gbu nda ti ye ti hinga popo ti ye ti nzoni na ti sioni,’ fade e yeke sala nzoni na e mveni na e gonda Jéhovah.​—aHéb. 5:14.