Kaï nzala ti aye so amanke mo na lege ti yingo

¹ Kota Bungbi ti e ti District, “Awakua ti Royaume so ayeke na wâ”, so ayeke ga amû na e mbeni nzoni lege ti kaï nzala ti aye ti yingo so amanke e. Tongana mbeni pendere kobe ti mitele, fade programme ni ayeke mû na e biani kobe ti yingo ‘na lege ti tënë ti mabe’. (1 Tim. 4:6). A yeke mû ande lege na e ti ga ndulu na Jéhovah mingi ahon. E lingbi nga ti ku ti wara wango na atënë so akpengba zo, ti mû maboko na e ti hon ndo ti atara so e yeke wara na yâ fini. Jéhovah amû na e zendo so: “Fade Mbi wa mo, na Mbi fa na mo lege so a lingbi mo tambela dä; fade Mbi wa mo, na lê ti Mbi angbâ na ndo mo.” (Ps. 32:8). So tâ matabisi si e yeke na ni ti wara fango lege ti lo ti ndoye na yâ fini ti e! Zia e bâ ambeni mbilimbili ye so alingbi ti mû maboko na e ti wara ye ti nzoni mingi ahon na lege ti programme ti kota bungbi so.

² A lingbi e leke bê ti e: Zo oko oko kue e yeke na kungba ti bata bê ti lo ti fä (aProv. 4:23). Ye so ahunda ti tene e fa lege na tele ti e mveni na e sala ye na lege ni e mveni. Kota bungbi so ayeke ngoi ti gbu li na ndo songo ti e na Jéhovah, ngoi ti ‘gi nda ti ndia so alingbi kue, ndia ti liberté’. Ti leke bê ti e ti ‘kamata tënë so a lu na bê ti e’, a lingbi e voro yanga na Jéhovah ti gi yâ ti bê ti e na ti wara mbeni ‘sioye na yâ e’ so a hunda ti leke ni, nga ti gue na e na “lege ti lakue lakue”.​—Jacq. 1:21, 25; Ps. 139:23, 24.

³ Mä ndo na gbu li: Jésus agonda Marie teti so lo dengi mê nzoni ti mä tënë ti lo. Jésus atene: “Marie akamata ye ti nzoni so, na fade a lungula na tïtî lo pëpe.” (Luc 10:39, 42). Tongana e yeke na mara ti bibe tongaso, fade e yeke zia lege pëpe na asenge senge ye ti gboto lê ti e na mbeni ndo nde. A lingbi e duti na e dengi mê nzoni na ngoi ti programme ni kue. A lingbi e sala lisoro pëpe, wala ti tambela senge senge pëpe. A lingbi e sala hange ti tene a-portable ti e, amasini ti photo, na a-camescope ti e akanga lege na ambeni zo pëpe ti mä tënë.

⁴ Tongana e yeke mä adiskur, a yeke nzoni ti sû akete ndulu tënë na mbeti, so ayeke mû maboko na e ti bâ tongana nyen a yeke fa nda ti tënë ni. A lingbi e tingbi aye so e mä na ye so e hinga kozoni awe. Fade ye so ayeke mû lege na e ti gbu nda ti tënë so e mä na ti bata ni. Tongana e kiri ti bâ akete ndulu tënë so e sû, e yeke sala tongaso na bibe ti salango ye alingbi na ni. Zo oko oko na popo ti e alingbi ti hunda tele ti lo nzoni: ‘Tongana nyen ye so andu songo ti mbi na Jéhovah? Aye wa a lingbi mbi leke na yâ fini ti mbi? Tongana nyen mbi lingbi ti sala kusala na ye so mbi mä na yâ salango ye ti mbi na ambeni zo? Tongana nyen mbi lingbi ti sala kusala na ni na fango tënë?’ Sala lisoro na ambeni zo na ndo ti atënë so anzere na mo. Fade salango aye so ayeke mû maboko na e ti bata atënë ti Jéhovah ‘na yâ bê ti e.’​—aProv. 4:20, 21.

⁵ Zia e sala ye alingbi na so e manda: Mbeni ita-koli so alondo na kodoro wande atene na peko ti mbeni kota bungbi ti district: “Programme ni andu zo oko oko kue. A pusu zo ti gi ti bâ ye so ayeke na yâ bê ti lo nga na bê ti sewa ti lo, na ti mû maboko na ndoye tongana bezoin ni ayeke dä na lege ti Bible. A sala si mbi hinga mingi ahon kungba so mbi yeke na ni ti mû maboko na kongregation ti mbi.” A lingbi ti tene so aita mingi ayeke na oko bibe so. Ye oko, tongana assemblée ahunzi awe, gi ti bâ so a kpengba e na adë bê ti e alingbi pëpe. Jésus atene: “Tongana i hinga ye so, ngia ayeke na i tongana i sala ye so.” (Jean 13:17). A lingbi e sala ngangu kue ti sala ye alingbi na akota tënë so andu e mveni (aPhil. 4:9). So ayeke yorö ti kaïngo nzala kue ti aye so amanke e na lege ti yingo.

[Encadré na lembeti 5]

Gbu li na ndo ti ye so mo mä:

■ Tongana nyen a ndu songo ti mbi na Jéhovah?

■ Tongana nyen a sala ngangu na ndo salango ye ti mbi na ambeni zo?

■ Tongana nyen mbi lingbi ti sala kusala na ni na yâ fini ti mbi nga na fango tënë?