Atënë so i hunda
◼ Ye wa a lingbi e girisa pëpe tongana e yeke sala kusala na téléphone ti maboko?
Mara ti téléphone tongaso alingbi ti mû lege na e ti sala lisoro na azo na ndo kue so e yeke dä. Atâa so a lingbi ti mû maboko na zo, a yeke nzoni e duti na donzi. A yeke nzoni e sala kusala na ni pëpe na angoi kirikiri, ye so alingbi ti buba fango tënë ti e wala abungbi ti e. Tongana nyen?
Pensé na ye so alingbi ti si tongana téléphone ti e atoto na ngoi so e yeke fa tënë na mbeni zo. Zo ni ayeke pensé nyen? Tongana e kaï lisoro ni ti kiri tënë na zo so ahiri e, lo yeke tene nyen ande na peko ti e? Biani, e ye pëpe ti sala mbeni ye so alingbi ti kanga lege na ambeni zo ti mä tokua ti Royaume (2 aCor. 6:3). Tongaso, tongana e yeke na mbeni téléphone na tele ti e, a lingbi e sala kue ti tene afâ yâ ti tënë ti e wala ti ambeni zo pëpe na ngoi so e yeke na fango tënë.
Me ka tongana e yeke ku na ngoi so ambeni ita angbâ ti fa tënë? Tongana e zia mbeni ngoi nde teti kusala ti fango tënë, a lingbi e bi bê ti e kue pëpe gi na ndo ni? Ti yekia kusala ti e ti nzoni-kue, a yeke nzoni e sala atënë ti dengo buze ti e mveni, so ayeke ambeni senge senge ye, wala ambeni tënë nde na mbeni ngoi nde (aRom. 12:7). Biani, a ye ti tene pëpe so a gbanzi e ti sala kusala na téléphone ti e ti fa tënë wala ti sala mbeni rendez-vous ti fango tënë.
Tongana e yeke pika singa na mbeni zo na ngoi so e yeke kpe na kutukutu, a lingbi e sala hange mingi, teti agingo nda ti ye afa so pasa ayeke dä mingi ti tene andao ti lege asi na ngoi ni. A lingbi e kpe andia kue so akanga lege na zo ti pika singa na ngoi so lo yeke kpe na kutukutu.
E yeke ga na abungbi ti aChrétien nga na akota bungbi ti voro Jéhovah na ti tene lo fa ye na e. Bê ti kiri singila teti angoi so azia ni nde tongaso apusu e pëpe ti sala kue si téléphone ti e agboto pëpe lê ti e wala ti ambeni? Tongana mbeni tënë ayeke dä, so ahunda ti tene e bâ lege ni fade fade, a lingbi e gue na gigi si e sala ni. Tongaso pëpe, a lingbi e leke ti bâ lege ti atënë ti e mveni na ambeni senge tënë nde na mbeni ngoi nde na so e soro teti vorongo.—1 aCor. 10:24.
Zia fason so e yeke sala kusala na téléphone ti e wala na ambeni masini nde afa lakue so e yeke bâ ambeni zo nga na aye ti yingo na nene ni.