Dabe na ambakoro be-ta-zo
1 Atâa so lo yeke womua na so ngu ti lo ahon mingi, Anne so ayeke na ngu 84 ‘azia Temple lâ oko pëpe’. Dutingo be-ta-zo ti lo apusu Jéhovah ti mû na lo mbeni matabisi so mara ni ayeke gi oko (Luc 2:36-38). Laso, aita-koli na aita-wali mingi afa na gigi mara ti bibe ti Anne, atâa so ala yeke wara akpale. Même tongana a lingbi amara ti abe-ta-zo tongaso atiri na akpale ti kobela wala akatikati so gango mbakoro ayeke ga na ni, ngoi na ngoi, ala bâ so bê ti ala anze. Zia e bâ ambeni mbilimbili lege so na yâ ni, e lingbi ti wa ala na ti mû maboko na ala ti bata mbeni nzoni programme ti aye ti yingo.
2 Abungbi nga na fango tënë: Tongana ambeni ita aleke, na lege ti ndoye, ti mû ala na kutukutu, ye so alingbi ti duti ngangu pëpe na ambakoro be-ta-zo mingi ti gue lakue na abungbi. Salango ye tongaso ayeke kpengba na lege ti yingo abe-ta-zo so, ala so aninga mingi na yâ tâ tënë. A yeke ga nga na aye ti nzoni na kongregation. Mo yeke mû mbage ti mo na mara ti pendere kusala so?—aHéb. 13:16.
3 Mungo mbage lakue na yâ kusala ti fango tënë ayeke ga na ngia nga na nzerengo tele na atâ Chrétien. Ye oko, salango tongaso alingbi ti duti ngangu na ambakoro nga na ala so ayeke na kobela. Lege ayeke dä ti tene mbeni oko ti aita ti e so e ndoye ala mingi, so aga mbakoro awe, ague oko na mo tongana ‘fon mo na yâ kusala’ na ambeni mbage ti fango tënë? (aRom. 16:3, 9, 21). Mo lingbi peut-être ti hunda na lo ti mû mbage ti lo na mo na yâ fango tënë na téléphone wala ti gue legeoko na mo ti sala mbeni vizite wala mbeni étude. Tongana ita ni so aga mbakoro angbâ gi ngbango na yâ ti dä, mbeni wamandango Bible ni alingbi ti gue na da ti lo ti manda ni?
4 Mandango ye nga na dutingo na popo ti mba: Ngoi na ngoi ambeni ita ayeke tisa mbeni mbakoro, wala lo so ayeke na kobela, ti ga ti manda ye legeoko na sewa ti ala. Ala lingbi même ti sala ni na ndo ti ita ni so. Mbeni mama ague na akete molenge ti lo use na ndo ti mbeni ita-wali mbakoro si ala use kue amanda buku Mbeti ti atene ti Bible na amolenge ni. Na pekoni, ala kue awara ngangu na lege ti salango ye so. Amara ti azo tongaso ayeke nga na ngia ti tene a tisa ala teti mbeni tengo kobe, wala na ngoi ti ambeni salango ngia na songo. Tongana aita so ayeke na kobela ayeke na ngangu pëpe ti sala yongoro lisoro, mo lingbi peut-être ti hiri ala na téléphone, wala ti sala ndulu vizite na ala ti diko mbeti, ti sambela. Mo lingbi même ti sala na ala tënë ti ambeni ye so asi, so alingbi ti kpengba zo.—aRom. 1:11, 12.
5 Jéhovah abâ na nene ni ambakoro be-ta-zo (aHéb. 6:10, 11). E lingbi ti mû tapande ti lo na fango na gigi so e bâ ala na nene ni, nga na mungo maboko na ala ti bata mbeni nzoni programme ti aye ti yingo.