Salango ye alingbi na mungo tele ti e na Nzapa
1 Atâa so mo mû batême ade ti ninga pëpe wala asala angu mingi awe, mo dabe mo peut-être so a yeke lani mbeni kota ye so asi na yâ fini ti mo. Mungo batême ti e ayeke pëpe hunzingo ti ye. Nde na so, ayeke tongo nda ti mbeni kusala so e yeke mû ti sala na Nzapa na yâ fini ti e kue so alingbi ti ninga teti lakue lakue (1 Jean 2:17). Salango ye alingbi na mungo tele ti e na Nzapa andu nyen?
2 Mû tapande ti Christ: Gi na peko ti batême, Jésus “akomanse kusala ti Lo,” na fango ‘nzo tënë ti royaume ti Nzapa’. (Luc 3:23; 4:43). Legeoko nga, e yeke ga awakua ti fango nzo tënë gi na ngoi so e fa na gigi so e mû tele ti e na Jéhovah na lege ti batême. Atâa so a hunda ngoi nga ti sala ngangu mingi ti wara aye so zo ayeke na bezoin ni na yâ fini ti lo, kusala so aga kozo na yâ fini ti e ayeke kusala ti e ti Chrétien (Mat. 6:33). Ahon ti sala ngangu kue ti tomba peko ti mosoro wala yango-iri, ala so amû tele ti ala na Nzapa ayeke gi ti ‘gonda kusala ti ala’, tongana ti so bazengele Paul asala lani (aRom. 11:13). Mo yeke bâ na nene ni matabisi so mo yeke na ni, so mara ni ayeke use pëpe, ti sala na Jéhovah? Mo yeke sala ngangu kue ti sala ni?
3 Na tapande ti Jésus, a lingbi e “ke zabolo”. (Jacq. 4:7). Satan atara lani Jésus na peko ti batême ti Lo. Laso, lê ti lo ayeke nga na tele ti awakua so amû tele ti ala ti sala na Jéhovah (Luc 4:1-13). Teti so sese ti Satan angoro e, a lingbi e fa lege na tele ti e mveni, na kpengo aye so alingbi ande ti buba bibe ti e wala bê ti e (aProv. 4:23; Mat. 5:29, 30). A wa aChrétien ti “te kobe na table ti Seigneur [nga] na table ti ayingo sioni pëpe.” (1 aCor. 10:21). Ye so ahunda ti tene e bata tele ti e na mbage ti angia ti sioni, asioni kamarade nga na kpale so aga na lege ti Internet. A hunda nga ti tene e kpe ambeti ti a-apostat. Fade dutingo na donzi na ndo aye so, nga na ndo amayele ti Satan, ayeke mû maboko na e ti sala ye alingbi na mungo tele ti e na Nzapa.
4 Sala kusala na aye so Nzapa aleke: Ti mû lege na e ti sala ye alingbi na mungo tele ti e na Nzapa, Jéhovah amû maboko na e na lege ti Tënë ti lo, nga na kongregation ti aChrétien. Sala si dikongo Bible na sambelango Jéhovah aga mbage ti salango ye ti mo ti lâ oko oko (Jos. 1:8; 1 aThes. 5:17). Wara ngia na guengo na abungbi ti kongregation (Ps. 122:1). Duti ndulu na ala so akpe mbito ti Jéhovah na amä yanga ti lo.—Ps. 119:63.
5 Na lege ti mungo maboko ti Nzapa, mo lingbi ti sala ye alingbi na mungo tele ti mo na Jéhovah, na ti wara ngia ti sala na lo teti lakue lakue.—Ps. 22:27, 28; aPhil. 4:13.