Akota Bungbi ti District na a-Assemblée Internationale apusu e ti mû gloire na Nzapa!

Akota Bungbi ti District nga na a-Assemblée Internationale “Mû gloire na Nzapa” so asala ni juska fadeso amû mbeni kota tënë ti témoin so adö bê. Akota bungbi so ti aChrétien aga na gonda na iri ti Jéhovah na amaï akode ti e ti “mû na Jéhovah gloire so alingbi na iri ti lo.” (Ps 96:8, NW ). Biani, lo lingbi na gloire teti apendere ye so lo leke, nga so afa na gigi akota lengo ti lo.​—Job 37:14; Apoc. 4:11.

Na salango kusala na ahundango tënë so ayeke na gbe ni ge legeoko na andulu tënë so mo sû na mbeti, leke tele ti mo ti mû mbage na dango bê na kapa ti kota bungbi ni so a yeke sala ni na yâ ti yenga ti lango 23 ti février.

1. Na lege wa aye so Nzapa aleke so ayeke na fini pëpe afa gloire ti lo? Na tongana nyen ye so ayeke nde na lege so azo ayeke sepela na lo? (Ps. 19:2-4; “Aye so Nzapa aleke afa gloire ti lo”).

2. Gbiango tele ti Jésus lani aduti fä ti ye wa so laso ayeke tâ ye? Nga na lege wa tâ ye so amû ngangu na aChrétien ti laso? (Diskur na ndo kota li ti tënë: “Apendere suma ti prophétie amû ngangu na e!”).

3. Tongana nyen e lingbi ti fa mara ti dutingo na tâ be-ti-molenge ti prophète Daniel? Na tongana nyen e yeke wara ande ye ti nzoni na salango tongaso? (Dan. 9:2, 5; 10:11, 12; “A fa gloire ti Jéhovah na abe-ti-molenge”).

4. (a) Fa aye ota so e lingbi ti manda na ndo fango ngbanga ti Nzapa na lege ti prophétie ti Amos (Amos 1:3, 11, 13; 9:2-4, 8, 14). (b) Ye ti nzoni wa aTémoin ti Jéhovah ti laso alingbi ti manda na lege ti tapande ti gbotongo mê so a wara na Amos 2:12? (“Prophétie ti Amos, tokua ti lo teti ngoi ti e”).

5. (a) Akpale wa ayeke ga na lege ti nyongo sämba ahon ndo ni, atâa tongana sämba asala zo pëpe? (b) Tongana nyen a lingbi ti leke kpale ti nyongo sämba ahon ndo ni? (Marc 9:43; aEph. 5:18; “Kpe gbanda ti nyongo sämba ahon ndo ni”).

6. Tongana nyen mo yeke wara ye ti nzoni na lege ti fini mbeti “Voyez le bon pays”? (“ ‘Nzo sese’ ni, fä ti paradis”).

7. Fa alege ota so na yâ ni e lingbi ti ‘fa tongana tatara gloire ti Jéhovah’. (2 aCor. 3:18; “E fa tongana tatara gloire ti Jéhovah”).

8. Ye nyen ayeke na gunda ti kengo e senge senge? Na ye wa alingbi ti mû maboko na e ti bata be-biani ti e atâa e yeke na gbele mara kengo ndo tongaso? (Ps 109:1-3; “A ke e senge senge”).

9. Bango ndo ti Christ na ndo dutingo kota ayeke so wa? Na tongana nyen mbeni zo alingbi ti hinga so a hunda na lo ti maï bango ndo so mingi ahon ti kozo? (Mat. 20:20-26; “E gi ti duti na bango ndo ti Christ na ndo dutingo kota”).

10. Ye wa alingbi ti mû maboko na e ti ngbâ na ngangu na lege ti yingo atâa e woko na lege ti mitele? (“Ngangu ahunzi, me kue pëpe”).

11. Ambeni zo wa angbâ ti maï amvene ti Satan? Na Bible awa e ti sala nyen tongana azo so agi ti futi mabe ti e? (Jean 10:5; “Sala hange na ‘go ti awande’ ”).

12. (a) Tongana nyen ababâ na mama alingbi ti mû tapande ti Jésus tongana ti so a sû na Marc 10: 14, 16? (b) Ye wa anzere na mo mingi na lege ti fini buku Mä Kota Wafango ye? (“Amolenge ti e: Ye ti héritier ti ngele ngangu”).

13. Tongana nyen amaseka ayeke sepela Jéhovah? (1 Tim. 4:12; “Lege so amaseka ayeke sepela na Jéhovah”).

14. Na yâ drame “E fa tënë na mbito pëpe atâa kangango lege”, ascène wa angbâ lakue na li ti mo?

15. Tongana nyen e lingbi ti mû peko ti tapande ti (a) Pierre na Jean? (Kus. 4:10) (b) Etienne? (Kus. 7:2, 52, 53) (c) Kongregation ti aChrétien ti kozo siècle? (Kus. 9:31; drame nga na diskur “ ‘E zia pëpe’ ti fa nzo tënë”).

16. (a) E mû yanga ti mû gloire na Nzapa na alege wa? (b) Ye wa e lingbi ti hinga ni biani tongana e sala ye alingbi na ye so e manda na Kota Bungbi “Mû gloire na Nzapa”? (Jean 15:9, 10, 16; “ ‘Ngbâ ti lë mingi’ teti gloire ti Jéhovah”).

Na gbungo li na ndo pendere fango ye ti yingo so asigigi na kota bungbi so, fade ayeke pusu e ti sala ye alingbi na aye so e manda (aPhil. 4:8, 9). Ye so ayeke kpengba ande lekengo na bê ti e ti “sala ye kue teti gloire ti Nzapa.”​—1 aCor. 10:31.