Kasete vidéo so agboto lê na ndo mbeni kpengba kode ti kaïngo kobela so ato nda ti mû ndo
A-avocat nga na awanganga ayeke bi bê mingi na ndo atënë ti bê nga na adroit ti azo ti kobela. Ye so asala si a maï afini yorö nga na akode so aTémoin ti Jéhovah alingbi ti wara ye ti nzoni dä (Kus. 15:28, 29). A gboto lê na ndo aye so na yâ kasete vidéo Transfusion-Alternative Health Care—Meeting Patient Needs and Rights. E hunda mo ti bâ kasete ni, na pekoni kiri mo bâ aye so mo manda na yâ ni.—Kete tënë: Teti so na yâ kasete ni a fa ambeni kete mbage ti akode ti surungo zo, a lingbi ababâ na mama asala ye na ndara tongana ala na akete molenge ayeke bâ kasete ni.
(1) Ngbanga ti nyen bungbi ti awanganga ayeke kiri ti bâ atënë na ndo mungo mênë na zo? (2) Fa atapande ota ti surungo zo so ayeke ngangu mingi ti sala ni sân ti tene a sala kusala na mênë. (3) Awanganga oke na ndo sese kue afa dutingo ndulu ti ala ti kaï kobela na salango kusala na mênë pëpe? Ngbanga ti nyen ala yeke ndulu ti sala tongaso? (4) Ye wa afini mandango ye na yâ ada-nganga afa na ndo salango kusala na mênë? (5) Akpale wa ti kaïngo kobela ague oko na mungo mênë na zo? (6) Ye wa mingi ti awakode ti kaïngo kobela atene na nda ni na ndo aye ti nzoni ti ayorö so a yeke sala na kusala na place ti mênë? (7) Aye wa ayeke sala si zo ayeke na mênë mingi pëpe? Mênë ti zo alingbi ti kiri na gbe ni juska na ndo wa na zo ni ayeke ngbâ na fini? Ye wa a lingbi ti sala na kusala na place ti mênë? (8) Ye wa alingbi ti sala ti maï dungo a-globule ti bengba na yâ tele ti mbeni zo ti kobela? (9) Akode wa ayeke sala na kusala ti kanga lege si mênë ayuru mingi pëpe na ngoi ti surungo mbeni zo? (10) Ayorö so a yeke mû ni na place ti mênë alingbi ti sala kusala nzoni teti amolenge wala azo so ayeke ndulu ti kui? (11) Mbeni oko ti akozo kpengba-ndia so andu atënë ti bê ti zo, na so ague oko na nzoni kode ti kaïngo kobela ayeke so wa? (12) Ngbanga ti nyen a yeke kota ye teti aChrétien ti soro ye kozoni na ndo akode nde nde ti salango kusala na mênë pëpe ti kaï na kobela? Tongana nyen e lingbi ti sala ni?
Ti yeda na ambeni kode ti kaïngo kobela so a fa ni na yâ kasete vidéo so ayeke mbeni ye so andu desizion ti zo mveni, so ague oko na yingo-ti-hinga ti zo oko oko so Bible afa lege na ni. Mo mû desizion awe na ndo ayorö so a yeke sala na kusala na place ti mênë so mo yeke ndulu ti yeda na ni teti mo mveni nga na amolenge ti mo? A lingbi mo fa nga adesizion ti mo nga na nda ti adesizion so nzoni na asewa ti mo so ayeke aTémoin pëpe.—Bâ “Atënë so azo ahunda”, so ayeke na yâ Tour ti Ba Ndo ti français ti lango 15 ti juin, nga Tour ti Ba Ndo ti lango 1 ti novembre, 2000.