Ngbâ ti sala tënë ti apendere kusala ti Jéhovah

1. Ambeni pendere kusala ti Jéhovah so mo bâ ni mbilimbili na nene ni mingi ayeke so wa?

¹ Zo oko ti lingbi na Jéhovah, kota Nzapa ti e, ayeke dä pëpe! David asû na mbeti: “O L’Eternel Nzapa ti mbi, kusala ti kpene ti Mo, na bibe ti Mo teti e awu mingi; zo oko ti lingbi na Mo ayeke pëpe.” (Ps. 40:6). Apendere kusala ti Jéhovah andu aye so lo leke na ndagigi, Royaume ti Messie, akusala ti nzobe na mbage ti azo ti lo nga na kapa ti fango tënë na ndo sese kue (Ps. 17:7, 8; 139:14; Dan. 2:44; Mat. 24:14). Ndoye teti Jéhovah na bê ti kiri singila teti aye kue so lo sala apusu e ti sala tënë ti lo na ambeni zo (Ps. 145:5-7). Na nze ti mars, avril na mai, e yeke wara ande lege ti sala ni mingi ahon ti kozo.

2. Na lege wa e mveni e yeke wara nzoni na lege ti kusala ti pionnier auxiliaire?

² Na salango kusala tongana pionnier auxiliaire: Na yâ anze ti kusala so ayeke nde, mo lingbi ti leke kapa ti mo si, teti nze oko wala ahon so, mo mû angbonga 50 teti kusala ti fango tënë? Ambeni gbiango ye so mo yeke sala ni na yâ kapa ti mo ti lâ oko oko ayeke duti ande senge ye pëpe (aEph. 5:16). Azo mingi abâ so kusala ti pionnier auxiliaire amû maboko na ala ti sala si kode ti fango tënë ti ala aga nzoni ahon ti kozo. Ala yeke na mbito mbeni pëpe na yanga ti mbeni da, na lege azi mingi na ala ti sala kusala na Bible. Mungo ngoi mingi teti fango tënë asala si a yeke ngangu pëpe na ala ti kiri ti bâ azo so asala nzara ti tënë ni, nga ambeni so kozoni ala yeke na étude pëpe awara mbeni na ngoi so ala yeke apionnier auxiliaire. Teti so kusala ti pionnier auxiliaire andu salango ngangu ti mû maboko na ambeni zo, ayeke mbeni kusala so aga na ngia.​—Kusala 20:35.

3. Tongana nyen ambeni zo awara lege ti ga apionnier auxiliaire atâa akpale so dutingo ti ala aga na ni?

³ Tene hio pëpe so dutingo ti mo akanga lege na mo ti mû kusala ni. Mbeni ancien so amû kusala ti pionnier auxiliaire na ngu so ahon ayeke na amolenge use nga na kua ti nginza ti ngoi kue. So lo yeke na aye mingi ti sala, ita so asala ni tongana nyen? Teti so lo yeke sala kusala na yâ ti yenga ni, lo mû alango kue ti anda-yenga ni ti fa tënë; na asamedi, lo yeke to nda ni na fango tënë na lege na ngbonga 7 ti ndapelele. Mingi ti azo ti kongregation ni so ayeke na yâ mara ti dutingo so aga nga apionnier auxiliaire. Ala mû maboko nga ala mû wâ na popo ti tele. Na yâ mbeni kongregation nde, mbeni ita-wali so ayeke na ngu 99 ayeda ti ga pionnier teti nze ti mai na peko ti so molenge ti lo ti wali atisa lo ti sala kusala ni legeoko na lo. Ambeni zo nde ti kongregation amû maboko na ita mbakoro so ti gue da na da nga na ndo ti a-étude na pusungo lo na yâ ngende ti lo. Lo yeke mû nga mbage na yâ fango tënë na téléphone, na ndo lege nga na sungo alettre. Lo hinga biani na bê ti lo so lo sala ni na lege ti ngangu ti lo mveni pëpe, me gi na lege ti mungo maboko ti Jéhovah.​—Es. 40:29-31.

4. Aye wa a lingbi e gi ti bâ ni tongana e yeke leke kapa ti kusala ti pionnier auxiliaire?

⁴ Tara ti leke mbeni kapa so alingbi na dutingo ti mo. Atapande ti programme so ayeke na yâ ti Kusala ti Royaume so alingbi ti duti nzoni teti mo. Mo yeke sala kua ti nginza ti ngoi kue wala mo yeke gue na ekole? Mbeni kapa so na yâ ni a yeke sala kusala mingi ni na anda-yenga alingbi ti duti nzoni mingi teti mo. Tongana mo yeke na akpale ti seni na ngangu ti mo amû lege na mo pëpe ti fa tënë na yâ ti lango ni kue, mbeni kapa so a hunda gi ngoi kete lâ oko oko alingbi ti duti nzoni mingi teti mo. Sala lisoro na ambeni zo na ndo nzara ti mo ti ga pionnier auxiliaire. Peut-être ala nga ala yeke zia ni ande na gbele ala.

5. Aye wa amaseka alingbi ti zia na gbele ala teti nze ti mars, avril na mai?

⁵ Alege so amaseka alingbi ti mû mbage dä: Jéhovah ayeke na ngia tongana amaseka ayeke sala tënë ti apendere kusala ti lo (Ps. 71:17; Mat. 21:16). Tongana mo yeke maseka so awara batême awe, peut-être mo lingbi ti ga pionnier auxiliaire na yâ ti mbeni nze so ekole akanga. Tongana mo lingbi pëpe ti mû kusala ni, mo lingbi ti zia na gbele mo ambilimbili lege ti kono yâ ti mungo mbage ti mo na fango tënë nga ti sala si, na yâ ti anze ni so, kode ti fango tënë ti mo aga nzoni ahon ti kozo? Tongana mo yeke mû mbage na fango tënë legeoko na ababâ na mama ti mo, me mo yeke pëpe wafango tënë so ade ti wara batême pëpe, so ayeke mbeni nzoni ngoi teti mo ti gi ti lingbi na ni. A hunda pëpe ti tene na bê ti mo so alingbi mo duti mbeni wakode ti kiringo tënë na ndo atënë ti Bible wala a lingbi mo yeke na hingango ye mingi tongana akota zo so awara batême awe. Mo gbu nda ti akozo fango ye ti Bible? Mo yeke sala ye alingbi na anzoni salango ye so Bible ahunda? Mo ye ti tene a hinga mo tongana mbeni oko ti aTémoin ti Jéhovah? Tongaso, sala tënë ni na ababâ na mama ti mo. Ala lingbi ti leke si mo na ala aga ndulu na a-ancien ti bâ wala mo yeke sala aye so ahunda.​—Bâ buku Notre ministère, alembeti 99-100.

6. Tongana nyen e lingbi ti mû maboko na awamandango Bible ti ga awafango nzo tënë?

⁶ E mû maboko na ambeni zo ti fa tënë: Peut-être awamandango Bible so ague na li ni ayeke lë alengo so a hunda ti bungbi na e tongana awafango tënë teti kusala so ayeke nde na yâ anze so ayeke ga. Tongana mo yeke na mbeni wamandango Bible so ayeke gue na li ni nzoni, gi mungo maboko ti surveillant ti mandango buku ti mo wala ti surveillant ti kusala. Mbeni zo oko na popo ti ala alingbi ti gue legeoko na mo na mandango ye ni ti bâ guengo na li ni ti zo ni. Tongana wamandango ye ni alë alengo so a hunda nga lo yeke na nzara ti ga mbeni wafango tënë, surveillant président alingbi ti leke si a-ancien use atingbi na mo nga na lo. (Bâ Tour ti Ba Ndo ti français, ti lango 15 ti novembre 1988, lembeti 17.) Tongana a yeda na lo, to nda ni hio ti mû na lo fango lege na yâ kusala ti fango tënë.

7. Tongana nyen a lingbi ti mû maboko na awakua so ayeke bi rapport lakue lakue pëpe nga na ala so azia ti fa tënë aninga?

⁷ Asurveillant ti mandango buku ayeke duti ande ndulu ti bi bê ti ala mingi na ndo azo ti yâ ti groupe ti ala so azia ti fa tënë wala ala so ayeke bi rapport lakue lakue pëpe. Mo mveni mo lingbi ti tisa ala ti fa tënë legeoko na mo. Tongana ala zia ti fa tënë aninga, lege ti ndara ayeke ti tene a-ancien use asala lisoro na ala kozoni ti bâ wala ala lingbi ti fa tënë. (Bâ Kusala ti Royaume ti janvier 2001 Akiringo Tene na Ahundango Tene ti I .) Wâ ti kongregation na yâ ti anze ti kusala so ayeke nde alingbi ti pusu ala ti kiri ti fa tënë lakue lakue.

8, 9. Ye wa a-ancien alingbi ti sala ti maï wâ ti aita teti kusala so ayeke nde?

⁸ Leke tele fadeso ti kono yâ ti kusala ti mo: A-ancien, i to nda ni fadeso ti zingo nzara ti aita ti ga apionnier auxiliaire. I lingbi ti sala ye mingi na lege ti anzoni tënë nga na nzoni tapande ti i (1 Pi. 5:3). Kota wungo ti apionnier auxiliaire ti kongregation ni ayeke kozoni oke? A lingbi ti hon ni na ngu so? Asurveillant ti mandango buku na azo so amû maboko na ala alingbi ti gi alege ti wa azo kue ti yâ ti groupe ni ti kono yâ ti kusala ti ala. Asurveillant ti kusala alingbi ti leke ambeni bungbi ti fango tënë na ndo ni, na ti fa kozoni na kongregation aye so a leke. Soro awafango tënë so alingbi ti mû li ni na ti sala si abungbi so ato nda ni nga ako nda ni na ngoi ni. (Bâ Kusala ti Royaume ti janvier 2001 Akiringo Tene na Ahundango Tene ti I .) Surveillant ti kusala alingbi nga ti leke si territoire, apériodique na ambeti alingbi.

⁹ Na ngu so ahon, a-ancien ti mbeni kongregation ato nda ni hio nga na wâ ti wa aita ti ga apionnier auxiliaire, na mingi na popo ti a-ancien ni asû demande ti ala nga. Ala leke ambeni bungbi ti fango tënë na ndo ni: mbeni na ngbonga 5 na ndambo ti ndapelele teti fango tënë na lege, mbeni nde na ngbonga 3 ti peko ti midi teti ala so ahunzi ekole, na ota ni na ngbonga 6 ti lakui teti ala so ahunzi ti sala kua. Na ndo ni, a leke abungbi ti fango tënë ota na asamedi. Ti fa so ala yeda na lekengo ye so, azo 66 ti kongregation amû kusala ni na nze ti avril!

10. Tongana nyen asewa alingbi ti leke tele ti kono yâ ti kusala ti ala?

¹⁰ Ngbanga ti nyen mo bata pëpe mbeni ngoi na yâ mandango ye na sewa ti peko ti zia na gbele ala ambeni ye so ala lingbi ti si dä na yâ anze so ayeke ga? Na lekengo tele nzoni nga na salango ye maboko na maboko, sewa ni kue wala ambeni zo ti yâ ni alingbi ti ga apionnier auxiliaire. Tongana lege ayeke dä pëpe, leke ti kono yâ ti kusala ti mo na gbotongo yâ ti angoi so mo yeke mû ti fa na tënë lakue, wala ti sala ni na ambeni ngoi nde. Sambela na ndo tënë so legeoko na sewa. Mo lingbi ti hinga na bê kue so fade Jéhovah ayeke deba nzoni na ndo angangu so mo yeke sala.​—1 Jean 3:22.

11. (a) Apendere ye wa sandaga ti Christ asala? (b) Na ndo wa a yeke sala Matanga ti Dango Bê na ndo so mo yeke dä? Nga na ngoi wa?

¹¹ Pendere kusala ti Nzapa so ahon atanga ni kue: Fä ti ndoye ti Jéhovah ti kota ahon kue ayeke so lo mû Molenge ti lo tongana kota ngele teti e (1 Jean 4:9, 10). Kota ngele ti sandaga ni ayeke biani ye so a hunda ti zi azo na gbe ti siokpari na kui (aRom. 3:23, 24). Mênë ti Jésus so atuku asala si fini mbele awara ngangu, na asala si lege azi na azo so ayeke mbilimbili-kue pëpe ti ga amolenge ti Nzapa. Ala yeke nga na beku ti komande na yâ Royaume ti yayu (Jér. 31:31-34; Marc 14:24). Me kozoni kue, na mango yanga mbilimbili-kue, Jésus asala si iri ti Jéhovah aga nzoni-kue (Deut. 32:4; aProv. 27:11). Na dimanche, lango 4 ti nze ti avril, na peko ti lindango ti lâ, fade a yeke sala Matanga ti Dango Bê na ndo sese kue.

12. Tongana nyen azo so asala nzara ti tënë ni alingbi ti wara ye ti nzoni na guengo na matanga ti Kobe ti Lakui ti Seigneur?

¹² Batango Kobe ti Lakui ti Seigneur ayeke gonda apendere kusala ti Jéhovah. Diskur ni ayeke kono bê ti kiri singila ti e teti ye so Jéhovah asala na mungo kota ngele. Azo so aga na so asala nzara ti tënë ni alingbi ande ti bâ ambeni pendere kusala ti Nzapa. Ala yeke wara ande lege ti bâ beoko nga na ndoye ti wâ so Jéhovah amanda na azo ti lo ti fa ni na gigi (aEph. 4:16, 22-24; Jacq. 3:17, 18). Teti so guengo na kota matanga so alingbi ti sala biani mbeni ngangu na ndo bibe ti zo, e ye si azo mingi aga ande dä.​—2 aCor. 5:14, 15.

13, 14. Azo wa e lingbi ti tisa ala na Mémorial? Na tongana nyen?

¹³ Tisa ambeni zo nde ti ga: To nda ni fadeso ti leke molongo ti azo so mo ye ti tisa ala. Mo lingbi ti zia na popo ni asewa ti mitele so amä na bê pëpe, azo so alango ndulu na mo, amba ti mo ti place ti kua wala ti ekole, azo so amanda Bible ândö nga fadeso nga na afini vizite ti mo kue. Asurveillant ti mandango buku alingbi ti zia na yâ molongo ti ala ambeni ita so azia ti fa tënë.

¹⁴ Sala kusala na ambeti ti tisango ndo, na sû mbeti polele na ndo ni ti fa ngoi nga na ndo ti Matanga ni. Wala mo ye ti sala kusala na tisango ndo so ayeke na ndangba lembeti ti Tour ti Ba Ndo ti lango 15 ti mars 2004, wala Réveillez-vous! ti lango 22 ti mars 2004. Tongana lango 4 ti avril aga ndulu, dabe ti azo so mo tisa ala, na guengo ti bâ ala wala na lege ti téléphone.

15. Tongana nyen e lingbi ti fa na gigi yambango ndo na ngoi ti Mémorial?

¹⁵ Na ngoi ti Meḿorial: Sala ngangu ti si hio kozoni na tongo nda ti Matanga ti Dango Bê ni. Fa na gigi yambango zo na balango afini zo na wâ (aRom. 12:13). Mo yeke na mbeni kpengba kungba na mbage ti agene so mo tisa ala. Yamba ala nzoni na yekiango ala, na fa ala na ambeni zo ti kongregation ni. Peut-être mo lingbi ti mû maboko na ala ti wara ndo ti duti ndulu na tele ti mo. Na tongana ambeni ayeke na Bible wala mbeti ti bia pëpe, leke si ala lingbi ti bâ ni legeoko na mo wala na mbeni zo nde. Na peko ti matanga ni, duti ndulu ti kiri tënë na ahundango tënë ti ala. Tongana a yeke ti fani oko ni si ambeni aga na Matanga ni, hunda wala ala ye ti manda ambeni ye mingi na ndo Tënë ti Nzapa nga na ndo ye so lo leke ti sala. Hunda ti manda Bible na ala.

16. Ye wa a lingbi ti sala ti mû maboko na ala so aga na Mémorial ti gue na li ni na lege ti yingo?

¹⁶ Ngbâ ti mû maboko na ala so aga na Mémorial: Ala so aga na Mémorial ayeke na bezoin ti wara mungo maboko mingi na yâ ayenga so aga na pekoni. Ye so andu nga ala so kozoni ala gue lakue na abungbi me so fadeso a yeke ngangu ti bâ ala dä. Fade a-ancien ayeke duti ndulu ti bâ si agirisa mara ti azo tongaso pëpe. Ala lingbi ti gi ti hinga ngbanga ti nyen ala zia ti gue na li ni na lege ti yingo, na ti fa na ala polele so a yeke ngoi ti sala ye hio (1 Pi. 4:7). Mû maboko na ala ti bâ ye ti nzoni so ayeke ga na peko ti salango ye alingbi na wango ti Bible ti bungbi lakue legeoko na azo ti Nzapa.​—aHéb. 10:24, 25.

17. Ngbanga ti nyen a lingbi e ngbâ ti sala tënë ti apendere kusala ti Jéhovah?

¹⁷ Atâa tongana e duti na fini teti lakue lakue, e yeke gbu nda ti akusala ti Jéhovah kue pëpe (Job 42:2, 3; Zo-ti. 3:11). Ni la, fade e yeke lakue na aye ti sepela lo ndali ni. Na ngoi ti Matanga ti Dango Bê so, e lingbi ti fa na gigi bê ti kiri singila ti e teti apendere kusala ti Jéhovah na salango ngangu kue ti kono yâ ti kusala ti e.

[Tableau na lembeti 5]

Mo lingbi ti duti pionnier auxiliaire na salango kusala na mbeni oko ti akapa so?

Mars L* M* M* J V S D Kue na yâ nze

Lâ oko oko 1 1 1 1 1 5 2 51

Lango use 5 0 5 0 0 0 0 50

Gi na anda-yenga 0 0 0 0 0 8 5 52

Avril L M M J* V* S D Kue na yâ nze

Lâ oko oko 1 1 1 1 1 5 2 50

Lango use 0 0 0 5 5 0 0 50

Gi na anda-yenga 0 0 0 0 0 8 5 52

Mai L* M M J V S* D* Kue na yâ nze

Lâ oko oko 1 1 1 1 1 4 2 51

Lango use 5 0 0 0 0 5 0 50

Gi na anda-yenga 0 0 0 0 0 7 3 50

* Wungo ti lango ni so ayeke oku na yâ ti nze ni