E sala ye tongana apionnier
1. Mo yeke fa salango ye tongana apionnier tongana nyen?
1 Atâa e yeke pionnier na ngoi so wala pëpe, awafango tënë ti Royaume kue alingbi ti fa na gigi so ala yeke sala ye tongana apionnier. Ala kue ayeke na nzara ti mä komandema ti gue ti fa tënë na ti sala adisciple (Mat. 28:19, 20; Kus. 18:5). Ala yeke bi bê na ndo azo na ala gbanzi tele ti ala na aye mingi teti fango tënë (Mat. 9:36; Kus. 20:24). Awakua ti Jéhovah aye ti sala ye kue so a hunda ti mû maboko na azo ti manda tâ tënë (1 aCor. 9:19-23). Zia e bâ tapande ti mbeni zo so afa ândö mara ti bibe so: Philippe, wafango tënë.
2. Tongana nyen a-ancien na aserviteur ti mungo maboko alingbi ti mû tapande ti wâ ti Philippe na fango tënë?
2 Fango tënë na fango ye: Na yâ kongregation ti akozo Chrétien, Philippe ayô akota kungba mingi (Kus. 6:1-6). Ye oko, lo yeke kozoni kue mbeni wafango nzo tënë so ayeke na wâ (Kus. 8:40). Tongaso laso, na ngoi so ala yô akungba ti ala, a-ancien na aserviteur ti mungo maboko alingbi ti fa na gigi so ala yeke sala ye tongana apionnier na mungo li ni na ngia na yâ fango tënë. Ye so ayeke mû wâ mingi na kongregation!—aRom. 12:11.
3. Tongana nyen e lingbi ti fa na gigi bibe ti sala ye tongana apionnier na ngoi so e tingbi na atara?
3 Na peko ti kuâ ti Etienne, mbeni kota salango ngangu so alondo gi hio tongaso agbian aye mingi na yâ dutingo ti adisciple. Ye oko, Philippe angbâ ti fa tënë, na lo duti ândö kozo zo so akomanse ti fa tënë na aSamaritain (Kus. 8:1, 4-6, 12, 14-17). E lingbi ti sala tongana lo na ngbango ti fa nzo tënë na ngoi so e yeke wara atara nga na fango tënë sân ti sala kangbi na popo ti azo kue so e tingbi na ala.—Jean 4:9.
4. Tapande wa Philippe azia na e tongana wafango ye?
4 A lingbi ti bâ Philippe tongana mbeni wafango tënë ti Nzapa so ayeke na kode na yâ mbaï ti eunuque ti Ethiopie so aga Chrétien (Kus. 8:26-38). Ti maï kode ti sala kua nzoni na Bible na ti “wa [azo] na lege ti Mbeti ti Nzapa” ayeke mbeni lege ti fa so e sala ye tongana apionnier (Kus. 17:2, 3). Legeoko tongana Philippe, e yeke gi ti fa nzo tënë na ndo kue so azo ayeke dä nga na ngoi kue so alingbi.
5. Ye nyen alingbi ti mû maboko na ababâ na mama Chrétien ti lë nzara ti sala ye tongana apionnier na yâ amolenge ti ala?
5 Na sewa nga na kongregation: Kite ayeke pëpe so nzoni bibe ti Philippe nga na tapande ti lo asala nzoni ye na ndo amolenge ti lo ti wali (Kus. 21:9). Legeoko nga, ababâ na mama Chrétien so azia akusala ti Royaume na kozo ndo na yâ fini ti ala ayeke pusu amolenge ti ala ti sala tongaso nga. Atâa so lo lingbi ti nze na nda ti yenga na peko ti akusala ti yenga ni, mbeni babâ wala mama so ayeke na nzara mingi ti fa tënë na azo alingbi ti sala ngangu mingi na ndo amolenge ti lo.—aProv. 22:6.
6. Tongana nyen e lingbi ti yekia apionnier ti kongregation ti e?
6 Philippe ayamba na da ti lo Paul na Luc, aChrétien so asala kua ti Jéhovah na wâ (Kus. 21:8, 10). Na lege wa e lingbi ti fa bê ti kiri singila ti e nga ti mû maboko na ala so ayeke na wâ na ngoi ti e? Peut-être e lingbi ti hunda ti fa tënë na apionnier na mbeni ndapelele wala na peko ti midi na mbeni lango so azo mingi asigigi na fango tënë pëpe (aPhil. 2:4). E lingbi ti tisa ala na ndo ti e si songo ti e akpengba. Atâa dutingo ti e ayeke tongana nyen, a lingbi e kue e fa bibe ti sala ye tongana apionnier.