Lege so Ekole ti Kusala ti aChrétien ayeke mû maboko na e
1 Mara ti Jéhovah ayeke na kota matabisi mingi ti wara fango ye so alondo na lo (Es. 54:13; Jean 6:45). Ye oko, nene ti nzoye so e wara na yâ ni aluti mingi ni na ndo ngangu so e yeke sala ndali ni. Mo lingbi ti bâ aye ti nzoni so Ekole ti Kusala ti aChrétien ayeke sala na ndo dutingo ti mo na lege ti yingo?
2 Atënë ti gonda: Asurveillant ti ekole mingi atene so gbungo nda ti akode ti salango tënë asala si kongregation ti ala afa tënë nzoni. Nga, mbeni surveillant ti ekole abâ so mungo mbage ti kongregation na angbongboro tënë ti dikongo Bible amû lege na azo mingi ti bata kapa ti dikongo Bible ni. Na ndo use devoir ni, mingi ti aita-koli agonda nzoni ye ti bingo lê gi na ndo mbage so a hunda ti diko, sân ti tene mo leke akozo tënë na atënë ti hunzingo ni. Ala so a mû na ala mbage so ayeke zia fadeso lê ti ala mingi na ndo maïngo akode ti ala ti dikongo mbeti.—1 Tim. 4:13.
3 Zo kue alingbi ti wara nzoni dä: Ti kiri tënë na abungbi alingbi ti mû ngia mingi (aProv. 15:23). Na ti wara ahundango tënë ti lisoro ti dango bê kozo na lango ni ayeke mû lege na e ti leke tele ti e ti kiri tënë hio. Na ndo ni, ngbele ye na Tour ti Ba Ndo ti lango 1 ti janvier 2004, akota tënë ti abuku ti Bible asigigi so ague oko na kapa ti dikongo Bible na yâ Ekole ti Kusala ti aChrétien. A-article so amû maboko na azo mingi ti sala atënë ti kpengbango zo na ngoi ti angbongboro tënë ti dikongo Bible.
4 Zo kue so iri ti lo ayeke na yâ ekole ni ayeke na kota matabisi mingi ti leke na ti sala adevoir. E kue e lingbi ti wara ye ti nzoni na yâ atënë ti gonda so surveillant ti ekole ayeke mû na ndo pupitre. Na élève oko oko ayeke wara anzoni tënë mingi na yâ awango so lo lingbi ti mû na ala na peko ti bungbi. Ye ti tara na tele na ndo akode ti salango tënë so ayeke na hunzingo ti chapitre oko oko ti buku Wara nzoni na lege ti Ekole ti Kusala ti aChrétien amû maboko nga.
5 Tongana a yeke fa lege ti sala kusala na mbeni tënë wala a yeke gboto lê ti mo na ndo mbeni tënë na yâ Tënë ti Nzapa na ngoi ti ekole ni nga na pekoni, sû note na ndo ni na yâ mbeti ti mo Ekole ti Kusala. Gbu li na ndo ye so mo manda, na bâ tongana nyen tënë ti fango ye ti Nzapa so akono dutingo ti mo na lege ti yingo.