Ekole so afa na e nzoni ye ti sara
1 Na ndembe so e yeke bâ ambeti so a fa na yâ ti mbeti-kapa ti Ekole ti Kusala ti aChrétien ti ngu 2006, e yeke gi ti wara nzoni na lege ti afango ye ti Bible. A yeke na lege so e yeke sara kusala na afango ye so na yâ fango tënë nga na yâ dutingo ti e ti lâ oko oko. E leke na bê ti e ti sara ye alingbi na aye so e manda.—Jean 13:17; aPhil. 4:9.
2 Kiringo atënë na bungbi: Na yâ ti mbeti-kapa ti ngu so, a zi penze-ngbonga oko na ndo ti ngbonga so a mû na ita-koli so ayeke sara ngbongboro tënë ti Bible a zia ni na ndo ti ngbonga ti ala so ayeke kiri tënë. So ti tene a lingbi ita-koli ni asara kue ti hunzi mbage ti lo na yâ ti apenze-ngbonga oku, me pëpe omene. A yeke nzoni aita so ayeke kiri tënë abâ nga ngoi ni. Tongaso, ita so ayeke kiri tënë, a yeke nzoni lo gbu li ti lo kozoni, si lo sigigi na mbeni tënë so alingbi ti mû maboko na amba ti lo. Lo lingbi ti sara tënë ti lo ni na yâ ti anzene-ngbonga 30, me a hon ni pëpe. Tongana a bâ nzoni, azo bale-oko alingbi ti mû anzoni kiringo tënë na yâ ti penze-ngbonga oku so a mû na ala.
3 Adiskur so afa ye na zo: A lingbi aita so ayeke fa angbongboro tënë ti Bible nga ayeke sara diskur ti wango afa mingi ni tongana nyen e lingbi ti sara kusala na atënë ti yâ ti ambeti ni na yâ fango tënë nga na yâ dutingo ti e ti lâ oko oko. A lingbi ita ni azingo gi pëpe na yâ ti azo so ayeke mä lo nzara ti sara ye, me a yeke nzoni lo fa ye so a lingbi ala sara, tongana nyen ti sara ni, nga nzoni ye so ala lingbi ti wara tongana ala sara ni. Ita ni alingbi ti tene, “A yeke tongaso si versê ni afa na e ye so a lingbi e sara,” wala “E lingbi ti sara kusala na aversê so tongaso na fango tënë.” A yeke nzoni a-ancien na aserviteur ti mungo maboko ahinga nzoni mingi sarango ye ti azo ti ndo so ala yeke dä. Tongaso, ala yeke gi ti fa nzoni mingi ye so aita alingbi ti sara.
4 Ti mû atapande ti Bible alingbi ti mû maboko mingi na ita so ayeke mû li ni ti fa na aita ye so ala lingbi ti sara. Tongana lo fa mbeni tapande ti Bible awe, lo lingbi ti tene, “Mo nga kue, mara ti ye tongaso alingbi ti si na mo.” A yeke nzoni lo bâ si ye so lo fa na lege ti tapande ti Bible ni ague oko na aversê so angoro tapande ni, a gue oko na tënë ti yâ ti Bible ni kue nga na tënë so “ngbâa be-ta-zo na ti ndara” afa.—Mat. 24:45, NW.
5 Ndara ayeke sarango kusala nzoni na ye so mo hinga ni awe nga na ye so mo gbu nda ni. “Ndara ayeke kozo ye.” (aProv. 4:7). Na ngoi so e yeke wara ndara na lege ti ye so e manda na Ekole ti Kusala ti aChrétien, zia e maï nga kode ti e ti fa ndara so na azo.