Mo yeke hunda ti wara ambeni étude na lege ti azo so mo manda na ala?

Tongana mo yeke manda Bible na mbeni zo, mo hunda lo lâ oko awe wala ambeni kamarade ti lo, afami ti lo wala azo so lo hinga tere na ala aye ti hinga ye so Bible afa? Fani mingi, wamandango ye ni ayeke fa iri ti gbâ ti azo. Tongana wamandango ye ni ayeda, mo lingbi ti fa iri ti lo na ngoi so mo yeke gue ti bâ azo ni ti tisa ala ti manda Bible. Na peko ti so mo fa iri ti wamandango ye ni na zo ni awe, mo lingbi ti tene: “Lo ye mingi ti manda Bible, na lo pensé so mo nga kue mo lingbi peut-être ti wara ye ti nzoni na lege ti kapa ti mandango Bible so e yeke sara ni na azo senge senge.” Na pekoni, mû ngoi kete ti fa na lo tongana nyen e yeke sara étude na zo na lege ti buku Bible afa.

Tongana mo yeke na mbeni wamandango Bible so ayeke gue na li ni nzoni, mo lingbi ti wa lo ti fa na akamarade nga na azo ti sewa ti lo so aye peut-être ti manda Bible lege so étude ni ayeke tambela. Lo lingbi ti tisa ala ti duti na tere ti lo na ngoi ti étude ti lo ni. Tongana ngoi ni alingbi na ala pëpe, lo lingbi ti leke si mo tingbi tere na ala ti fa na ala tongana nyen a yeke sara étude ni. Ti sara tongaso ayeke mû maboko na lo ti fa na ambeni zo ye so lo yeke manda.

Azo so mo yeke sara lakue lisoro ti Bible na ala alingbi nga ti fa na mo azo so ayeke ye ande ti manda Bible, même tongana ade ala mveni ayeda pëpe ti sara étude. Na ngoi so mo yeke fa na ala buku Bible afa, mo lingbi ti hunda: “Mo hinga ambeni zo so ayeke ye ande ti wara buku so?”

Teti ngoi ti e ayeke ngoi so a hunda ti sara ye hio, e yeke sara kusala na alege kue ti mû maboko na azo ti mä nzo tënë na ti yeda na ni. Mo yeke hunda ti wara ambeni étude na lege ti azo so mo manda na ala?