Tongana nyen ti leke ambeni tënë ti fa na apériodique ti e
1. Na yâ ti Kusala ti Royaume, e yeke wara ka atënë ti tene na ndo apériodique. Ngbanga ti nyen a yeke nzoni ti leke ti tene atënë ni na kode ti e mveni ahon ti tene gi a-oko tënë so ayeke na yâ ni?
1 Peut-être mo yeke hunda tere ti mo, mo tene: ‘Ka so a fa na e awe aye ti tene na ndo apériodique na yâ ti Kusala ti Royaume, ndali ti nyen ti kiri ti leke ambeni tënë na ndo ni?’ Atâa so aita mingi abâ so atënë ti fa na ndo apériodique so ayeke na yâ ti Kusala ti Royaume amû maboko na ala, a yeke nzoni e wani e leke tere ti e nga, ngbanga ti so ambeni tënë ni so alingbi ti lë lengo na yâ ti mbeni territoire alingbi ti sara kusala pëpe na yâ ti mbeni territoire ni nde. Ni la, a yeke kota ye pëpe ti tene gi a-oko tënë ni so a zia na yâ ti Kusala ti Royaume. Même tongana a yeke ye so e ye ti sara la, zia si e tene ni na atënë ti e mveni.
2. Nyen la ayeke mû ande maboko na e ti soro mbeni article so e ye ti fa ande?
2 Soro mbeni article: Tongana mo diko périodique ni awe, soro mbeni article so alingbi na territoire ti mo na so anzere nga na mo. Tongana mo yeke fa article ni, sara ni na wâ nga fa so tënë ni ayeke tâ tënë. Ye so alingbi ti pusu zo so mo yeke fa mbeti ni na lo ti duti na nzara ti diko ni nga. Atâa so mo yeke fa peut-être mbeni article so ayeke gbu bê ti mingi ti azo ti territoire ni, hinga nga nzoni atënë ti yâ ti ambeni article ti périodique ni. A yeke mû ande lege na mo ti gbian yâ ti atënë ti mo tongana mo tingbi na mbeni zo so aye ti lo ti sara lisoro na ndo ti mbeni article ni nde.
3. Mara ti atënë ti tongo nda ni wa so mo yeke sara na kusala ayeke lë lengo nzoni mingi?
3 Hunda mbeni tënë: Na pekoni, leke nzoni akozo tënë ti mo. Akozo tënë so mo yeke tene ande ayeke kota ye mingi. Peut-être tongana mo hunda na zo ni mbeni tënë so ayeke pusu lo ti gbu li, a yeke zingo nzara ti lo ndali ti article so mo soro ni. Me, mingi ni, ti hunda atënë so ayeke pusu zo ni ti fa atënë ti bê ti lo ayeke lë lengo mingi. Hunda pëpe atënë so alingbi ti zia kamene na lê ti zo ni wala so alingbi ti sara si lo luti na mo.
4. Tongana dutingo ti zo ni amû lege na e ti diko na lo mbeni versê, aye ti nzoni wa e yeke wara na pekoni?
4 Diko mbeni versê: Na nda ni, soro mbeni versê ti diko na zo ni tongana dutingo ti lo amû lege ti sara ni. Mo lingbi ti soro mbeni versê na yâ ti article so mo ye ti fa na zo ni. Ti diko mbeni versê ayeke mû maboko na zo ni ti bâ so tënë ti e alondo na yâ ti Mbeti ti Nzapa (1 aThes. 2:13). Nga, a yeke duti mbeni tënë ti témoin na zo ni atâa lo ke ti mû mbeti ni. Kozoni ti tene ambeni ita ahunda tënë, ala yeke zingo nzara ti azo ni na dikongo na ala mbeni versê. Kozo ti diko versê ni, mo lingbi ti tene: “Mbi ye ti hinga tënë ti bê mo na ndo atënë ti yâ ti versê so.” Na pekoni, gboto lê ti zo ni na ndo tënë so andu ni, so ayeke na yâ ti périodique ni. Na nda ni, tene mbeni nduru tënë ti zia nzara ni mingi na bê ti zo ni kozoni si mo mû na lo périodique ni.
5. Akota ye wa a yeke nzoni mo bata na li ti mo na ngoi so mo yeke leke ambeni tënë ti tene na ndo apériodique?
5 A mû andia pëpe na ndo ye so a lingbi mo tene na ngoi so mo yeke fa apériodique na azo. Mingi ni, a yeke nzoni ti sara si atënë ti mo ni akpengba pëpe nga aduti nduru. Sara kusala na mbeni kode so mo hinga ni nzoni nga so ayeke lë lengo mingi. Fa nzoni ti apériodique ni, nga sara tënë na wâ. Tongana mo leke tere ti mo nzoni, mo yeke zia ande Tour ti Ba Ndo na Réveillez-vous! mingi na tïtî azo so ayeke na yâ ti “mbilimbili dutingo so a hunda teti fini ti lakue lakue”.—Kus. 13:48, NW.