Kiri mo bâ azo kue so asara kamême nzara ti tënë ni
1 Mingi ti e ayeke laso na yâ tâ tënë ndali ti so mbeni zo so afa tënë na e abâ mbeni ye ti nzoni na yâ sarango ye ti e na mango tokua ti Royaume so lo ga na ni, nga na be-nze-pepe lo kiri peut-être fani mingi ti kono nzara ti e. Legeoko nga, a yeke nzoni e leke na bê ti e ti kiri ti bâ azo so asara kamême nzara ti tënë ni. Biani, ti kiri ti sara avizite ayeke mbeni oko ti aye so ayeke na yâ kusala ti e ti sarango “adisciple”.—Mat. 28:19, 20.
2 Gi ti hinga ye so agbu bê ti zo ni: Même tongana mbeni zo ayeda pëpe na ambeti ti e, lê ti lo, totongo ti go ti lo wala atënë ti lo alingbi ti fa so tokua ti Royaume ni agbu kamême bê ti lo. Tongana e hinga ye ni so, e lingbi ti kiri ti sara vizite na lo. Mbeni ita-koli asara vizite na mbeni zo teti yenga oku sân ti zia na lo mbeti. Na vizite ti omene ni, zo ni ayeda ti mû mbeti, nga na pekoni, zo ni ayeda ti manda Bible.
3 Tongana mo bâ mbeni ye so agbu bê ti zo ni, kiri hio, peut-être lango kete na pekoni. Zia lege pëpe na “wato-sioni” ti zi ye so mo lu na yâ bê ti lo (Mat. 13:19). Tongana mo mû yanga ti kiri, sara kue ti kiri ti bâ zo ni na lango so mo fa na lo.—Mat. 5:37.
4 Fango tënë na ndo ti lege: Mo yeke sara ka kue ti kono nzara ti azo so mo wara ala na fango tënë na ndo ti lege wala na mbeni lege so azi na mo? Na nda ti lisoro ni, mo lingbi ti tene: “Lisoro ni anzere na mbi mingi. Mbi lingbi ti wara mo na ndo wa ti tene e kiri e sara lisoro mbeni”? Tongana lege ayeke dä, ambeni wafango tënë ayeke hunda iri ti zo ni nga na ndo so lo lango dä. Tongana azo abâ mo lakue na fango tënë na lege na oko ndo ni so, ala yeke duti nduru ti fa na mo iri ti ala nga na ndo so ala lango dä. Même tongana ala ke ti fa ni na mo, mo lingbi ti tara lakue ti kono nzara ti ala na ngoi ti peko tongana mo tingbi na ala na lege.
5 Tongana e bâ akeke so e lu na so e zia ngu dä amaï pendere, ye so ayeke mû na e ngia. Legeoko nga, e lingbi ti wara ngia mingi tongana e kiri ti sara avizite na ti mû maboko na azo ti gue na li ni na lege ti yingo (1 aCor. 3:6). Zia na gbele mo ti kiri ti bâ azo kue so asara kamême nzara ti tënë ni.