Mû tapande ti Christ na yâ fango tënë ti mo
1 Jésus azia tapande na e ti mû pekoni na yâ fango tënë ti e. Lo fa kota ndoye ti lo teti Nzapa nga teti azo na angoi nde nde nga na alege mingi. Lo fa na azo ti tâ be-ti-molenge tâ tënë nga lo sara akusala ti nzobe ndali ti azo so ayeke na vundu na so ahu pono.—Mat. 9:35.
2 Tapande ti Jésus na aye so lo fa: Jésus azia si ye agboto lê ti lo pëpe, aye tongana bingo tere ti lo na yâ atënë ti poroso wala gingo ti maï nzoni duti ti azo na yâ ti kodoro. Wala lo zia pëpe si aye so azo asara na nzoni bibe agboto lê ti lo wala amû place ti kozo kusala ti lo (Luc 8:1). Lê ti lo angbâ gi na ndo fango nzo tënë ti Royaume ti Nzapa so ayeke gi oko yorö ti kaïngo akpale ti azo teti lakue lakue. Jésus ayeke lani na kota kusala ti sara na lo yeke na ngoi mingi pëpe ti sara ni. Tongana azo ti Capernaüm aye si Jésus angbâ na popo ti ala, lo tene na adisciple ti lo: “Zia e gue na mbeni ndo, . . . si Mbi lingbi fa tënë kâ nga, teti Mbi ga teti tënë so.”—Marc 1:38.
3 Na peko ti so lo fa ye na adisciple ti lo, Jésus atokua ala na lo mû na ala mbilimbili wango so: “I fa tënë, i tene, Royaume ti yayu ayeke nduru.” (Mat. 10:7). Lo fa na adisciple ti lo so a lingbi ala zia aye so andu Royaume na kozo ndo na yâ fini ti ala (Mat. 6:33). Ndangba tënë ti lo na adisciple ti lo kozoni si lo gue na yayu afa polele ye so ala yeke na ni ti sara. Lo tene: “I gue, i fa tënë na amara kue si ala ga adisciple.”—Mat. 28:19.
4 Nene ti Royaume: Kota tënë ti lisoro ti Jésus na azo ayeke Royaume ti Nzapa, na lo wa adisciple ti lo ti mû tapande ti lo. Ngangu so azo asara ti leke akpale ti sese alingbi pëpe ti ga nzoni (Jér. 10:23). Gi Royaume ti Nzapa oko si fade asara si iri ti Nzapa aga nzoni-kue na amû na azo dengo bê teti lakue lakue (Mat. 6:9, 10). Fango atâ tënë ti Royaume na azo so “abima, ala so atoto teti ye kue ti sioni mingi so azo asara” amû maboko na ala ti duti na ngia fadeso na ti gbu ngangu tâ beku teti kekereke.—Ezéch. 9:4.
5 Jésus angbâ ti sara kusala ngangu na yâ fango nzo tënë ti Royaume ti Nzapa, na lo tene so ni yeke mû maboko na e (Mat. 28:20). Juska na ndo wa si fango tënë ti e alingbi na ti so Jésus azia tapande ni na e? (1 Pi. 2:21). Na lâ ti nda ni so, zia e sara ye kue so ayeke na ngangu ti e ti ngbâ nduru na tapande so Jésus azia na lege ti fango tënë!