“Fa Tënë ti Nzapa na mbeto pëpe”
1 Tongana lege azi na mo ti fa tënë ti mabe ti mo na ekole wala na ndo ti kusala ti mo, a yeke si so mbeto asara mo? A yeke ngangu na mo ti fa tënë na asewa ti mo nga na avoizin wala peut-être na azo so mo hinga ala pëpe? Nyen la alingbi ti mû maboko na e kue ti gbu anzoni lege kue so azi na e ti “fa Tënë ti Nzapa na mbeto pëpe”?—aPhil. 1:14.
2 Sara mbeto pëpe: Tongana a bi tënë ti mvene na li ti kota kamarade ti mo wala ti fami ti mo, mo yeke sara mbeto ti gbu koko ti lo? A diko atënë ti mvene na li ti Jéhovah, Nzapa ti e so e ye lo mingi, teti angu saki mingi. Kota lege azi na e ti duti témoin ti kota Nzapa ti e! (Es. 43:10-12). Kota ndoye so e yeke na ni na mbage ti Jéhovah alingbi ti mû maboko na e ti hon ndo ti kamene wala mbeto, na alingbi ti pusu e ti fa tâ tënë na mbeto pëpe.—Kus. 4:26, 29, 31.
3 Girisa pëpe so tënë so e yeke gue na ni na azo ayeke nzoni tënë. Tongana azo asara ye alingbi na ni, ala yeke wara aye ti nzoni teti lakue lakue. Ti zia lê ti e gi na ndo nene ti kusala ti e ti fango tënë ahon ti zia lê ti e na ndo e mveni wala na ndo awato ti e ayeke mû maboko na e ti fa tënë na mbeto pëpe.
4 Tapande ti ambeni wakua ti Nzapa: E lingbi ti wara ngangu na lege ti tapande ti ambeni wakua be-ta-zo ti Nzapa so afa tënë ti lo na mbeto pëpe. E yeke na tapande ti Hénoc so afa lani na mbeto pëpe tënë ti ngbanga ti Jéhovah na ndo azo ti sioni (Jude 14, 15). E yeke nga na tapande ti Noé so azia lani pëpe ti fa tënë na azo so nzara ti tënë ti Nzapa ayeke na yâ ti ala pëpe (Mat. 24:37-39). Akozo Chrétien ayeke lani “azo so amanda mbeti pëpe, na ala yeke azo senge,” me atâa so kue ala zia pëpe ti fa tënë na gbele kangango lege ti ngangu (Kus. 4:13, 18-20). Mingi ni, na yâ Tour ti Ba Ndo nga na Réveillez-vous!, a yeke wara mbaï ti fini ti ala so amä na bê na Jéhovah na so ahon ndo ti mbeto ti zo na ala ga angangu wafango nzo tënë.
5 E lingbi ti wara ngangu tongana e gbu li na ndo dutingo be-ta-zo ti awakua ti Nzapa ti giriri so aluti na lê ti akota kpale (1 aGbia 19:2, 3; Marc 14:66-71). Ala “yeke na mbeto pëpe na yâ Nzapa ti e” na ala sara tënë na mbeto pëpe. E nga kue e lingbi ti sara legeoko!—1 aThes. 2:2.