E yekia amatabisi ti kusala ti e!
1 Ngbene ye so azo abâ gigi, Jéhovah amû na awakua ti lo mara ti amatabisi nde nde. Lo mû na ala amatabisi ni atâa ayeke koli wala wali, atâa ngu ti zo ni wala dutingo ti lo ayeke tongana nyen (Luc 1:41, 42; Kus. 7:46; aPhil. 1:29). Ti e laso, amatabisi wa lo mû na e?
2 Ambeni matabisi so e wara: E yeke na matabisi ti duti azo so Jéhovah ayeke fa ye na ala (Mat. 13:11, 15). Ti sepela Jéhovah na lege ti akiringo tënë ti e na ngoi ti abungbi ti kongregation ayeke nga mbeni matabisi so e yekia ni (Ps. 35:18). Tongana lege azi na e ti sara tënë na bungbi, e yeke sara ni na ngia. Legeoko nga, tongana e bâ akusala oko oko ti kongregation tongana mbeni ye ti gonda, e yeke mû kode ti e kue ti sara na ni. E yeke mû mbage ti e lakue ti bale Da ti Royaume na ti bata ni nzoni?
3 Atâa so azo kutu mingi ayeke hunda tere ti ala wala Nzapa ayeke mä sambela ti ala, ti e, e yeke na kota matabisi ti tene Kota Zo ti dunia kue ayeke mä sambela ti e (aProv. 15:29). Jéhovah mveni ayeke mä sambela ti awakua ti lo (1 Pi. 3:12). Lo zia katikati pëpe na wungo ti sambela so e yeke tene ni ti ga nduru na lo. Bâ pendere matabisi so e yeke na ni ti wara lege ti sambela “na ngoi kue”!—aEph. 6:18.
4 “Afon Nzapa na kusala”: Mbeni oko ti apendere matabisi ti e ayeke fango nzo tënë ti Royaume ti Nzapa tongana “afon Nzapa na kusala.” (1 aCor. 3:9). Kusala so aga na ngia na amû ngangu na zo (Jean 4:34). Jéhovah ayeke na bezoin ti azo ti sara kusala so pëpe, me lo mû kusala so na e ti fa so lo ye e mingi (Luc 19:39, 40). Jéhovah amû matabisi ti kusala so na zo kirikiri pëpe. Me a yeke ti zo so amû mbage na fango tënë ti sara ye alingbi na ambeni ye ti yingo so a hunda na ti bata ni (Es. 52:11). E fa so e bâ na nene ni matabisi so na sarango si kusala ti fango tënë aduti oko ti akota ye so e yeke sara yenga na yenga?
5 Matabisi kue so alondo na Jéhovah asara si fini ti e asi na aye ti nzoni (aProv. 10:22). Zia e bâ ni lâ oko tongana senge ye pëpe! Tongana e fa na gigi so e yekia biani amatabisi ti kusala nde nde so e wara, fade e yeke nzere na lê ti Babâ ti e ti yayu, Lo so amû “matabisi kue ti nzoni na matabisi kue so alingbi kue”.—Jacq. 1:17.