E lingbi ti mû ye na Jéhovah
1 Mo hinga so azo alingbi ti mû mbeni ye na Nzapa? Abel amû offrande ti ambeni ti nzoni nyama ti lo na Jéhovah, na Noé na Job asara nga legeoko (Gen. 4:4; 8:20; Job 1:5). Tâ tënë, Jéhovah aga wamosoro pëpe na peko ti a-offrande so, teti lo yeke na ye kue kozoni awe. Me a-offrande so afa na gigi kota ndoye so akoli be-ta-zo so ayeke na ni ândö na mbage ti Nzapa. Laso, e lingbi ti mû ngoi ti e, ngangu ti e nga na mosoro ti e ti mû na Jéhovah tongana “sacrifice ti merci”.—aHéb. 13:15.
2 Ngoi ti e: Bâ tongana nyen a yeke nzoni ti ‘zia l’heure ti e ahon senge pëpe’ ndali ti asenge ye na ti mû mbage mingi na fango tënë! (aEph. 5:15, 16). Peut-être e lingbi ti leke yâ ti kapa ti e tongaso si e sara kusala ti pionnier auxiliaire nze oko wala mingi na yâ ti ngu. Wala e lingbi ti fa tënë ngoi mingi ahon ti so e yeke sara ka. Ti sara penze-ngbonga 30 yenga na yenga na ndo ti ngbonga ti e so e yeke sara ni ka na fango tënë ayeke sara si e wara l’heure use na nda ti nze na ndo ti l’heure ti e!
3 Ngangu ti e: Ti tene e wara ngangu ti fa tënë, a lingbi e kpe angia na e kpe ti sara kua mingi so na nda ni asara si e nze, na tongaso e lingbi pëpe ti mû na Jéhovah ye ti nzoni so e yeke na ni. E yeke nga na bezoin ti pusu yamba atënë ti gingo bê so alingbi ti sara si e “ba bango”, na so alingbi ti zi ngangu so e yeke na ni ti sara na Nzapa (aProv. 12:25). Même tongana tënë so agbu bê ti e ayeke na lege ni, bâ so a yeke nzoni mingi ti ‘zia kungba ti e na ndo ti Jéhovah’!—Ps. 55:23; aPhil. 4:6, 7.
4 Mosoro ti e: E lingbi nga ti mû aye ti mosoro ti e ndali ti kusala ti fango tënë. Paul awa amba ti lo aChrétien ti tene lakue ala ‘kamata mbeni ye ti ye so ala wara,’ tongaso ala yeke na mbeni ye ti mû na azo so ye amanke ala (1 aCor. 16:1, 2). Na oko bibe so, e lingbi ti bata kete nginza ti mû na kongregation ti e ndali ti ambeni kusala ti lo nga ndali ti kusala so a yeke sara na ndo ti sese kue. Jéhovah abâ na nene ni ye so e mû na bê ti e, même tongana ayeke gi kete.—Luc 21:1-4.
5 Jéhovah amû aye mingi na e (Jacq. 1:17). E yeke fa singila ti bê ti e na mungo ngoi ti e, ngangu ti e nga mosoro ti e ti sara na lo. Sarango tongaso amû ngia na Jéhovah, “teti Nzapa andoye zo so amû matabisi na ngia.”—2 aCor. 9:7.