Fango tënë ahunda gbungo ngangu
1 Teti angu 30 na ndo ni tongaso, bazengele Paul awara ngia na yâ ti kusala ti lo ti wafango tënë. Na lege ti ngangu kue so lo sara, lo tingbi na akpale na yâ ti kusala ti lo ti fango tënë (2 aCor. 11:23-29). Ye oko, Paul azia pëpe ti fa tënë (2 aCor. 4:1). Lo hinga so Jéhovah la akpengba lo si lo gbu ngangu na yâ ti kusala ti lo (aPhil. 4:13). Na bango tapande ti gbungo ngangu ti lo mveni na yâ ti angu mingi so, Paul alingbi biani ti tene: “[Ala] sara tongana mbi sara, legeoko tongana mbi sara tongana Christ asara.”—1 Cor. 11:1.
2 Gbungo ngangu na gbele atara laso: Lâ oko oko, mingi ti aita ti e ayeke tingbi na hengo ndo, kangango lege, wala azo ti sewa ti ala, amba ti ala ti place ti kua na akamarade ti ala ti ekole asara nzara ti tënë so ala fa pëpe (Mat. 10:35; Jean 15:20). Peut-être a yeke nga ye so asi na mo la. Peut-être mo yeke tiri na mbeni kpale ti seni, wala mo yeke tiri ti kanga lege na angia nga na aye so ayeke tara mabe na gbungo ngangu ti mo. Me e lingbi ti wara ngangu na gbungo li na ndo ti tapande ti awakua be-ta-zo ti giriri nga na ti amba ti e Chrétien ti laso so atingbi na akpale na ala hon ndo ni.—1 Pi. 5:9.
3 E lingbi ti wara ngangu ti gbu ngangu na yâ ti kusala ti e gi tongana e “yü ye ti bira ti Nzapa kue”. (aEph. 6:10-13, 15). A yeke nga kota ye ti sambela si e gbu ngangu. Nzapa amû na e yingo vulu ti lo si e lingbi ti luti na lê ti atara (2 aCor. 6:4-7). Ti tene e sö benda na yâ ti bira ti e ti yingo, a lingbi e bata tënë ti témoin ti yanga ti Nzapa wala atënë ti dango bê ti lo si yingo ti e akiri aga fini (Ps. 119:24, 85-88). Legeoko tongana mbeni molenge ayeke diko fani mingi lettre so babâ ti lo atokua na lo, dikongo Bible lâ oko oko ayeke kiri ti kpengba songo ti e na Jéhovah. E yeke wara ndara ti tiri na akpale na lege ti mandango ye e mveni, na tongaso e zia si bibe ti Nzapa asara ngangu na yâ ti adesizion so e yeke mû na akpengba be-biani ti e.—aProv. 2:10, 11.
4 Gbungo ngangu aga na aye ti nzoni: Tongana ti so asi lani na Paul, ti ngbâ ti gbu ngangu na yâ ti kusala ti e ayeke zia ngia na bê ti Jéhovah na ayeke ga na tënë-nzoni na ndo ti e nga na ndo ti amba ti e (Prov. 27:11). Zia e leke na bê ti e ti ngbâ ti fa tënë, na ye so ayeke fa so mabe ti e akpengba, mabe so “ngere ni ahon ngere ti lor so afuti, kamême a tara lor ni na yâ wâ”.—1 Pi. 1:6, 7.