Sara kue ti fa tënë na akoli
1. E yeke na kota bezoin ti nyen ti bâ lege ti aye so andu kua ti Royaume?
1 Teti so kusala ti Royaume angbâ lakue ti gue na li ni na alango ti nda ni so, e yeke na bezoin ti aita-koli so ayeke abiazo na lege ti yingo ti mû li ni (Marc 4:30-32; Kus. 20:28; 1 Tim. 3:1-13). Me na ambeni ndo, wungo ti akoli so ayeda na tâ tënë ayeke mingi pëpe tongana a haka ni na ti awali. Na ambeni kodoro, akoli azia si gi awali ti ala la ayeke fa tënë ti Nzapa na amolenge ti ala. E lingbi ti sara nyen ti pusu akoli mingi ti bâ so ala yeke na bezoin ti aye ti yingo na ti bungbi oko na e ti voro Jéhovah?
2. Teti so Paul na Pierre afa tënë na akoli, aye ti nzoni wa aga na pekoni?
2 Gi ti fa tënë na akoli: Tongana mbeni babâ ti sewa ayeda na tâ tënë, mingi ni lo yeke pusu azo ti sewa ti lo ti mû peko ti lo. Na tapande, lani tongana Paul na Silas ayeke na da ti kanga, ala fa tënë na zo ti batango da ti kanga ni. Koli so na azo ti da ti lo kue awara batême (Kus. 16:25-34). Nga, na peko ti so Paul afa tënë na Corinthe, “Crispus, mokonzi ti synagogue ni, aga mbeni zo so amä na bê na Seigneur, na azo ti da ti lo kue asara tongaso.” (Kus. 18:8). Jéhovah atokua Pierre ti fa tënë na Corneille, mbeni turugu ti kota kamba so Bible asara tënë ti lo tongana “mbeni koli so agbu tënë ti Nzapa ngangu nga so akpe mbeto ti Nzapa.” Corneille na afami ti lo nga na akamarade ti lo awara batême.—Kus. 10:1-48.
3. Na tapande ti Philippe, azo wa so ayeke na “kota ndo” mo lingbi ti fa tënë na ala?
3 Ti fa tënë na akoli so ayeke na “kota ndo” alingbi ti sara ye mingi (1 Tim. 2:1, 2). Na tapande, ange ti Jéhovah awa lani Philippe ti sara tënë na “mbeni zo ti komande” so ayeke na ndo ti amosoro kue ti gbia-wali ti Éthiopie. Philippe amä koli ni, lo “yeke diko na kota go mbeti ti prophète Ésaïe”, na lo fa na koli so nzoni tënë na ndo ti Jésus. Zo ti Éthiopie so aga mbeni disciple, nga peut-être na kiringo ti lo na kodoro lo fa tënë na lege lege. Peut-être lo fa nga lani tënë na gbia-wali ni nga na ambeni kota zo ti yangbo ni, azo so tongana fade lo fa tënë na ala pëpe, ka a yeke ngangu na ala ti mä nzoni tënë.—Kus. 8:26-39.
4. E lingbi ti sara nyen ti tene akoli awara lege mingi ti mä nzoni tënë?
4 Gi ti tingbi na akoli mingi: Teti so mingi ni na kota lâ akoli ague na kua, mo lingbi ti leke yâ ti kapa ti mo si mo wara ngoi ti fa tënë na lakui, na anda-yenga wala na alango ti férié? Ti fa tënë lakue na ando ti dengo buze ayeke mû nga lege na mo ti fa tënë na akoli so a yeke ka ngangu ti wara ala na yanga-da. Aita-koli alingbi nga ti sara kue ti fa tënë na amba ti ala akoli so ala na ala ayeke sara kua place oko. Na fango tënë da na da, mbilimbili na yâ ti aterritoire so a yeke fa ka tënë dä lakue, aita-koli alingbi peut-être ti hunda ti sara tënë na koli ti da ni.
5. Tongana mbeni ita-wali afa tënë na mbeni koli si lo yeda na tënë ni, a lingbi ita-wali ni asara nyen?
5 Ita-wali so afa tënë na mbeni koli si koli ni ayeda na tâ tënë, a lingbi lo kiri gi lo oko pëpe ti gue ti bâ koli ni. Lo na koli ti lo wala na mbeni ita-koli nde alingbi ti gue. Tongana koli ni so ayeke gue na li ni, mingi ni a yeke nzoni ti tene lo mû koli ni so na mbeni ita-koli so akpengba na lege ti yingo.
6. Tongana nyen e lingbi ti sara ye tongana Paul ti “wara mingi ti azo”?
6 Soro atënë so agbu bê ti akoli: Bazengele Paul abâ yâ ti azo so lo yeke fa tënë na ala, na lo yeke gbian yâ ti atënë ti lo si lo lingbi ti “wara mingi ti azo.” (1 aCor. 9:19-23). E nga kue a lingbi e bâ atënë wa alingbi ti ndu bê ti akoli so e yeke tingbi ande na ala na e leke tere ti e alingbi na ni. Na tapande, tënë ti nginza, tënë ti nzoni ngorogbia nga tënë ti bango lege ti nzoni duti ti sewa ti ala agbu ka bê ti akoli mingi. Peut-être ala gi ka ti hinga ndani so si Nzapa aleke zo na ndo ti sese, ye so ayeke si ande na sese nga ngbanga ti nyen Nzapa azia si azo ayeke bâ pasi. Tongana tënë ti Royaume so e yeke fa alingbi na dutingo ti akoli oko oko, ala yeke duti nduru ti yeda na ni.—aProv. 16:23.
7. Tongana nyen sarango ye ti aita kue ti congrégation alingbi ti sara nzoni na ndo ti koli ti ita-wali so ayeke Témoin pëpe na so ayeke ga ka na bungbi?
7 Mû maboko na akoli ti aita-wali so ayeke aTémoin pëpe: Atâa so nzoni tambela ti aita-wali ayeke sara ka ye mingi na ndo ti akoli ti ala so ayeke aTémoin pëpe, aita ti yâ ti congrégation alingbi ti sara nzoni mingi na ndo ti akoli ni (1 Pi. 3:1-4). Tongana koli ni ayeke ga na bungbi si aita ayamba lo nzoni, ye so ayeke sara ye mingi. So lo ga na bungbi awe so, a fa so lo sara kamême nzara ti tâ tënë, na peut-être lo yeke yeda ti manda Bible.
8. Aita-koli alingbi ti sara nyen ti gue ngbii ti fa tënë na akoli ti aita ti e so asara nzara ti tâ tënë kete?
8 Na mbage, ambeni koli ti aita-wali asara nzara ti aye ti yingo kete na tongo nda ni. Me peut-être yeke na yeke ala yeke yeda ti sara lisoro na ndo ti Bible na mbeni ita-koli so a nzere na ala ti sara lisoro na lo. A yeke ye so aita-koli ti mbeni congrégation agi ti sara la tongana ngoi na ngoi ala yeke sara vizite na mbeni sewa so babâ ni ayeke Témoin pëpe. Na yanga-da ni ala sara lisoro na lo na ndo ti aye so ala hinga anzere na lo. Ye so ague ngbii si lisoro ni atï na ndo ti Bible, na fadeso babâ ni awara batême. Mbeni tapande ni ayeke ti mbeni ita-koli so amû maboko na koli ti mbeni ita ti leke gbagba na tere ti da ti lo. Teti so ita ni abi bê ti lo na ndo ti koli ni, ala to nda ti manda Bible (aGal. 6:10; aPhil. 2:4). Ita-koli, mo lingbi ti sara tongaso na ambeni koli ti aita ti e?
9. Ye wa aita-koli alingbi ti sara tongana a leke ala nzoni?
9 Leke aita-koli ti sara ambeni kusala ande: Akoli so ayeda na tënë ti Royaume na so asara ambeni kusala na yâ ti bungbi ti Jéhovah alingbi nga peut-être ti ga akoli so a mû ala “tongana amatabisi”, so ti tene a-ancien so ayeke mû akode ti ala nga na ngangu ti ala ti sara ye ndali ti acongrégation ti azo ti Jéhovah (aÉph. 4:8; Ps. 68:19). Akoli so ayeke bâ lege ti congrégation na bê ti ala kue (1 Pi. 5:2, 3). So tâ ye ti nzoni si ala yeke sara ndali ti aita ti dunia kue!
10. Tongana nyen ngangu so Ananias asara ti mû maboko na Paul asara ye ti nzoni na azo mingi?
10 Na tapande, Saul aga “mbeni bazengele ti amara nde,” atâa so ândö lo sara ye ti ngangu na aChrétien (aRom. 11:13). Na tongo nda ni, ndali ti sarango ye ti ngangu ti lo ni, disciple Ananias agi bê ti lo lani ti fa tënë na lo. Atâa so kue, Ananias asara ye so Seigneur atene na lo na lo gue lo sara tënë na Saul so aga bazengele Paul na pekoni. Tongana angu ahon, fango tënë ti Paul asara nzoni na ndo ti azo saki mingi so amä lo nga na ndo ti azo kutu mingi so angbâ ti wara ye ti nzoni na lege ti ambeti so lo sara na yâ ti Bible.—Kus. 9:3-19; 2 Tim. 3:16, 17.
11. Ngbanga ti nyen a yeke nzoni e gbian aye so a hunda ti gbian ti sara kue ti fa tënë na akoli?
11 Tongaso, zia si e gbian aye so a hunda ti gbian ti sara kue ti fa tënë na akoli. Tongana e sara tongaso, Jéhovah ayeke sara tufa na ndo ti ngangu so e yeke sara ti sara ye so bê ti lo aye na ti bâ lege ti aye ti Royaume.