Fango tënë na mbeni yanga ti kodoro nde

1. Lege wa azi na e na ngoi so e yeke fa tënë na yâ ti territoire ti e?

¹ Jésus afa kozoni awe so fade a yeke fa nzoni tënë na ndo ti sese kue “tongana mbeni tënë ti témoin ndali ti amara kue.” Azo kue so ayeke fa tënë na ayeke sara adisciple ahinga nene ti tënë so (Mat. 24:14; 28:19, 20). Na ngoi so e yeke fa tënë na e yeke sara adisciple, e lingbi ti wara azo ti mbeni kodoro nde nga na azo ti mbeni mara so ayeke tene mbeni yanga ti kodoro nde na ti e. Azo so nga kue a lingbi ala mä nzoni tënë ti Royaume na ala mû mbage ti tâ tënë ngangu kozoni si lâ ti Jéhovah so amû mbeto mingi asi (Mal. 3:18). Tongana nyen e lingbi ti fa tënë na mbeni yanga ti kodoro nde na yâ ti territoire ti e?

2. Na lege wa e yeke mû tapande ti Jéhovah na ngoi so e yeke sara tënë na azo so atene mbeni yanga ti kodoro nde?

² Duti na bango ndo ti Jéhovah na ndo ti azo so atene mbeni yanga ti kodoro nde: Ti fa mara ti ndoye ti Jéhovah so asara kangbi pëpe na popo ti azo na mbage ti azo kue ti yâ ti territoire ti e, a lingbi e duti na kota nzara ti mû maboko na azo ti hinga tâ Nzapa, Jéhovah, atâa yanga ti kodoro wa ala yeke tene (Gen. 22:14; Kus. 10:34, 35). Atâa so e yeke bi bê ti e kozoni kue na azo so ayeke tene yanga ti kodoro so e yeke sara bungbi na ni, a lingbi e bi bê ti e nga na bezoin ti azo so ayeke tene mbeni yanga ti kodoro nde na e gi alege ti fa tënë ti Royaume ti Nzapa na ala. Ti sara sanka ti azo so ayeke tene mbeni yanga ti kodoro nde ague oko pëpe na ye so Jéhovah aye, so ayeke ti fa tënë na azo ti amara kue. Tongaso, tongana nyen e lingbi ti mû maboko na azo so ayeke tene mbeni yanga ti kodoro nde na ti e?

3. Nzoni gbakuru wa a mû na e? Tongana nyen e lingbi ti leke tere ti e mveni ti sara kusala na ni?

³ Sara kusala na brochure Une bonne nouvelle pour des gens de toutes nations: A sigigi na brochure so ti sara na kusala na ngoi so e tingbi na azo so ayeke tene mbeni yanga ti kodoro nde na ti e. Duti na brochure so na tere ti mo na ngoi kue, gi ti hinga ni nzoni nga leke tere ti mo ti sara kusala na ni. Ti bi lê dä hio, sû kamba na tere ti ayanga ti kodoro so a yeke wara na yâ ti territoire ti mo. Tongana ambeti ayeke dä na ayanga ti kodoro ni so, a yeke peut-être nzoni ti duti na mbeni kete wungo ni na tere ti mo ti mû ni na zo na pekoni so mo sara kusala na brochure ni ti fa tënë na lo.

4. Tongana nyen e lingbi ti sara kusala na brochure Une bonne nouvelle na fango tënë?

⁴ Tongana na fango tënë mo tingbi na mbeni zo so atene mbeni yanga ti kodoro nde na mo hinga mbilimbili pëpe yanga ti kodoro wa la lo yeke tene, fa na lo ndo ti brochure ni. Zi yâ ni na mbage so karte ti sese ayeke dä, fa tere ti mo na fa kodoro so mo yeke dä, nga na lege ti ageste, fa na zo ni so mo ye ti hinga kodoro ti lo nga na yanga ti kodoro so lo yeke tene. Tongana mo hinga yanga ti kodoro ti zo ni awe, bâ li ti atënë ni, zi lembeti so alingbi na ni, gboto lê ti zo ni na ndo ti atënë so a sû gere ni nde na mbage ti nduzu, na fa so mo ye ti tene lo diko tokua ni. Tongana lo hunzi ti diko ni awe, mû na lo mbeni tract na yanga ti kodoro ti lo wala fa na lo atënë so a sû ni na nzoroko na ndo ni, so afa so mo ye ti kiri ti ga ande na lo mbeni mbeti na yanga ti kodoro ti lo. Na pekoni, fa na lo tënë “iri ti mbi” so a sû gere ni nde na fa na lo polele iri ti mo. Fa na lo tënë “iri ti mo” so a sû gere ni nde na ku ti tene lo kiri tënë. Fa lango so mo yeke kiri ti ga ti bâ lo.

5. Tongana azo ti mbeni yanga ti kodoro nde afa so ala sara nzara ti tâ tënë, ye wa ayeke nzoni ti sara ti bâ lege ti ala?

⁵ Kiri ti bâ zo ni: A lingbi e sara kue ti kiri ti bâ azo so afa so ala sara nzara ti tënë ti Royaume atâa yanga ti kodoro wa ala yeke tene. Na pekoni so e bâ so zo ni abi bê ti lo na Nzapa nga na Mbeti ti lo, Bible, a yeke nzoni ti sû adresse ti lo na lê ti kete mbeti Veuillez suivre l’intérêt (S-43) na ti mû ni hio na secrétaire ti congrégation si lo tokua ni na filiale ti tene mbeni ita so ayeke tene yanga ti kodoro ti zo ni ague asara vizite na zo ni. Na pekoni, filiale ayeke tokua kete mbeti so na mbeni groupe so ayeke tene yanga ti kodoro ni so. Tongana groupe ni awara kete mbeti ni, mbeni ita ayeke gue hio ti bâ zo ni. Secrétaire alingbi ti mû mbeni copie ti mbeti ni na surveillant ti kusala ti tene lo hinga so azo ti mbeni yanga ti kodoro tongaso asara nzara ti tâ tënë. A yeke nzoni a sara kusala na kete mbeti so gi tongana zo ni afa biani so lo sara nzara ti tâ tënë.

6. Tongana e tingbi na mbeni zo so asara nzara ti tâ tënë na so ayeke tene mbeni yanga ti kodoro nde, ye wa a lingbi e sara?

⁶ Ti londo na ngoi so a tokua kete mbeti (S-43) na filiale juska ti tene mbeni wafango tënë so ahinga yanga ti kodoro ti zo ni ague abâ lo, ngoi alingbi ti hon. Ni la, ti sara kue ti kono nzara ti zo ni, wafango tënë so asû kete mbeti (S-43) ni alingbi ti ngbâ ti maï nzara ti zo ni juska ti tene mbeni zo so ayeke tene yanga ti kodoro ti zo ni ague abâ lo. Ti ambeni, wafango tënë ni alingbi ti manda Bible na zo ni so asara nzara ti tâ tënë ni. Ye oko, na yâ ti ngoi ni so juska ti tene mbeni zo so ayeke tene yanga ti kodoro ti zo ni aga, tongana nyen wafango tënë ni alingbi ti wara ambeti na yanga ti kodoro ti zo ni?

7. Ye wa e yeke na ni ti mû lege na e ti wara mbeti na yanga ti kodoro ti azo so e lingbi ti tingbi na ala?

⁷ Ambeti ti mbeni yanga ti kodoro nde: A yeke nzoni congrégation abata pëpe gbâ ti ambeti ti mbeni yanga ti kodoro nde. Ye oko, tongana surveillant ti kusala abâ so azo ti mbeni yanga ti kodoro nde asara nzara ti tâ tënë, lo lingbi ti bâ so a yeke nzoni ti bata mbeni kete wungo ti ambeti na yanga ti kodoro ni so ti tene awafango tënë asara na kusala. Tongana congrégation ni ayeke na ambeti ni pëpe, a lingbi ti sara commande ni. Ti wara ambeti na mbeni yanga ti kodoro nde alingbi ti mû ngoi. Ye oko, lege ayeke dä ti mû ambeti ti e na ndo ti Internet na adresse www.watchtower.org na ti pete ni na ndo ti mbeti. A zia ambeti ti e na ayanga ti kodoro ngbangbo mingi na ndo ti Internet. Awafango tënë wala azo so asara nzara ti tâ tënë alingbi ti wara ni hio. Kite ayeke pëpe so ye so ayeke mû ande maboko ti maï nzara ti azo so asara nzara ti tâ tënë na so ayeke tene mbeni yanga ti kodoro nde.

8. Ye wa congrégation ayeke sara ti maï nzara ti azo so asara nzara ti tâ tënë na so ayeke tene mbeni yanga ti kodoro nde?

⁸ Kusala ti congrégation: Na ambeni ndo so azo so ayeke tene mbeni yanga ti kodoro nde ayeke mingi, peut-être mbeni congrégation so ayeke sara bungbi na yanga ti kodoro ni so ayeke nduru pëpe. Tongaso, a yeke nzoni ti tisa azo ni so ayeke tene mbeni yanga ti kodoro nde ti sara bungbi na congrégation ti mo. Ti yamba ala na ngia na ti bibê na ala alingbi ti pusu ala ti ga lakue na abungbi. Na tongo nda ni, yanga ti kodoro nga na sarango ye ti tere ti ala alingbi peut-être ti kanga lege. Ye oko, mbeni ye oko ayeke dä pëpe ti kanga lege na ndoye ti atâ Chrétien na yâ ti sewa ti aTémoin ti Jéhovah ti dunia kue (Soph. 3:9; Jean 13:35). Mo yeke tene mbeni yanga ti kodoro nde nzoni mingi? Tongana a yeke tongaso na mo ye ti gue ti sara vizite na azo ti yanga ti kodoro ni so, sara tënë ni na secrétaire ti congrégation ti mo ti tene lo sara tënë ni na filiale. Ye so ayeke mû ande maboko na ngoi so filiale ayeke gi ti wara mbeni wafango tënë ti gue ti maï nzara ti mbeni zo so ayeke tene yanga ti kodoro ni so.

9. Na ngoi wa a lingbi ti zia na sese ekole ti mbeni yanga ti kodoro nde ndali ti awafango tënë? A yeke sara ni tongana nyen?

⁹ Ekole ti yanga ti kodoro: Tongana mo yeke mû maboko na azo so ayeke tene mbeni yanga ti kodoro nde, a yeke nzoni ti wa ala ti to nda ti gue na congrégation ti yanga ti kodoro ti ala ni tongana lege ayeke dä. Tongana lege ayeke dä pëpe, ambeni wafango tënë alingbi ti yeda ti manda mbeni yanga ti kodoro nde na ti mû maboko nzoni na azo so asara nzara ti tâ tënë. Tongana mbeni congrégation ayeke nduru pëpe, filiale alingbi ti bâ so ekole ti mandango yanga ti kodoro ni so alingbi ti mû maboko mingi ndali ti so azo ti yanga ti kodoro ni so ayeke mingi. Tongana a hunda ti sara tongaso, filiale alingbi ti sara tënë ni na acongrégation so ayeke nduru na ndo ni so bezoin ni ayeke dä nga ti sara mbeni tokua ndali ti ekole ti mbeni yanga ti kodoro nde. A yeke nzoni azo so aye ti gue na ekole ni so azia na gbele ti ala ti zia congrégation ti ala na ti gue na groupe wala congrégation so ayeke fa tënë na yanga ti kodoro ni so.

10. Na ngoi wa a lingbi ti zia na sese groupe ti mbeni yanga ti kodoro nde? Ye wa a lingbi a sara na pekoni?

¹⁰ Ziango na sese mbeni groupe: Ti zia na sese groupe ti mbeni yanga ti kodoro nde, a lingbi a sara ye alingbi na aye osio so ge. (1) A yeke nzoni azo mingi so ayeke tene yanga ti kodoro ni asara nzara ti tâ tënë. (2) A yeke nzoni mbeni kete wungo ti awafango tënë ahinga wala amanda yanga ti kodoro ni so. (3) A yeke nzoni mbeni ancien wala mbeni wakua ti mungo maboko so alingbi ayeke dä ti mû li ni na ti sara kamême bungbi oko tongaso na yâ ti yenga na yanga ti kodoro ni so. (4) Mbeni bungbi ti a-ancien ayeke nduru ti mû maboko na groupe ni. Tongana a sara ye kamême alingbi na aye osio so, bungbi ti a-ancien ayeke sû mbeti na filiale na ndo ti groupe ni na ti hunda ti tene a hinga congrégation ti ala tongana congrégation so ayeke bâ ndo na ndo ti groupe ti mbeni yanga ti kodoro nde. (Bâ buku Bungbi, l. 106-107.) A yeke bâ ancien wala wakua ti mungo maboko so ayeke mû li ni na yâ ti groupe ni tongana “surveillant ti groupe” wala “wakua ti groupe”.

11. Ngbanga ti nyen a yeke mbeni kota pasa teti e ti fa tënë na mbeni yanga ti kodoro nde na yâ ti territoire ti e?

¹¹ Fango tënë na mbeni yanga ti kodoro nde na yâ ti territoire so a mû na e ayeke mbeni kota mbage ti kapa ti fango tënë na ndo ti sese kue so Jésus Christ, Tapande ti e, azia na sese. Zia e mû mbage ti e na kusala so na bê ti e kue na ti bâ tongana nyen Jéhovah angbâ ti yengi amara na ti mû aye ti nzoni ti ga na ni na mbage ti lo (Ag. 2:7). A nzere na e ti mû maboko mingi ndali ni! Zia Jéhovah airi tënë nzoni na ndo ti angangu so e kue e yeke sara ti fa tënë na mbeni yanga ti kodoro nde na yâ ti territoire ti e, na oko ngoi ni e dabe ti e lakue so atâa akangango lege so yanga ti kodoro alingbi ti ga na ni, Nzapa alingbi ti sara si a maï!​—1 aCor. 3:6-9.