‘A yeke fa ande nzoni tënë so’!
1. E hinga tongana nyen so ye oko alingbi ti kanga lege pëpe na kusala ti fango tënë?
1 Ye oko alingbi ti kanga lege na Jéhovah ti sara ye so lo ye pëpe (És. 14:24). Atâa so na bango ni a yeke ngangu lani na Juge Gédéon na azo ti lo 300 ti sö benda na ndo ti aturugu ti Madian so ayeke 135 000, Jéhovah atene na lo: “Mo sö azo ti Israël so ayeke na tïtî azo ti Madian, Mbi to mo pëpe?” (aJuge 6:14). Kusala wa Jéhovah ayeke mû maboko na ni laso? Jésus atene: “A yeke fa ande nzoni tënë ti royaume so na ndo ti sese kue.” (Mat. 24:14). Zo oko alingbi ande ti kanga lege na kusala so pëpe!
2. Nyen la afa so Jéhovah ayeke mû maboko na e oko oko kue na yâ ti fango tënë?
2 Jéhovah ayeke mû maboko na zo oko oko: So e hinga e tene Jéhovah ayeke sara si kusala ti awakua ti lo ayeke ga gi nzoni, e lingbi ti ku ti tene lo mû maboko na e oko oko? Na mbeni ngoi so lo yeke na bezoin ti mungo maboko, bazengele Paul abâ so Jéhovah amû maboko na lo na lege ti Molenge ti lo Jésus (2 Tim. 4:17). Legeoko nga, e lingbi ti duti na mabe so fade Jéhovah airi tënë nzoni na ndo ti angangu so e oko oko e yeke sara ti sara ye so lo ye.—1 Jean 5:14.
3. Jéhovah ayeke mû maboko na e na yâ ti aye wa?
3 Agingo bê ti lâ oko oko asara si mo woko na lege ti kusala ti fango tënë? “Lo mû ngangu na zo so anze”. (És. 40:29-31). Mo yeke na gbele sarango ngangu wala kangango lege? “Mo zia kungba ti mo na ndo L’Éternel, na fade Lo bata mo.” (Ps. 55:23). Na mbeni ngoi mo bâ so mo lingbi pëpe? “Mo gue, fade Mbi yeke na yanga ti mo”. (Ex. 4:11, 12). Kobela asara si mo fa tënë mingi pëpe? Jéhovah ayeke bâ na nene ni angangu so mo sara na âme ti mo kue, atâa a yeke kete tongana nyen, lo lingbi ti sara kusala na ni.—1 aCor. 3:6, 9.
4. So e hinga e tene Jéhovah ayeke na e asara nyen na ndo ti e?
4 Jéhovah ‘aye tïtî Lo, na zo nyen alingbi sara si tïtî Lo akiri?’ (És. 14:27). So e hinga na bê ti e kue so Jéhovah ayeke zia tufa na ndo ti kusala ti e, a yeke nzoni e ngbâ lakue ti fa tënë “na mbeto pëpe na lege ti komandema so [e] wara na mbage ti Jéhovah”.—Kus. 14:3.