Kozo ye so e zia na gbele e
1. Jésus afa tongana nyen so fango tënë ayeke kota na lê ti lo?
1 Fango tënë ayeke kozo ye so Jésus azia na gbele lo. Lo sara lani kua ngangu, lo tambela akilomètre mingi na yâ ti Palestine ti fa tënë na azo mingi. Lo gi ti wara gbâ ti ye pëpe tongaso si lo lingbi ti mû ngoi ti lo nga ti zia lê ti lo kue na ndo ti fango tënë (Mat. 8:20). Tongana lani gbâ ti azo atara ti gbanzi lo ti tene lo sava akobela ti ala, lo tene: “A lingbi mbi fa nga nzoni tënë ti royaume ti Nzapa na ambeni gbata nde, ngbanga ti so a yeke ndali ni si a tokua mbi.”—Luc 4:43.
2. Ngbanga ti nyen fango tënë ayeke lani kota mingi na lê ti Jésus?
2 Ngbanga ti nyen fango tënë ayeke lani kota mingi na lê ti Jésus? Kozo ye so agbu bê ti lo ayeke ti tene iri ti Jéhovah aga nzoni kue (Mat. 6:9). Lo ye Babâ ti lo ti yayu, ndani la lo ye lani ti sara ye so Babâ ti lo aye na ti sara ye alingbi na acommandement ti Lo (Jean 14:31). Na ndo ni, tâ na bê ti lo, lo bâ lege ti azo na lo ye ti mû maboko na ala.—Mat. 9:36, 37.
3. E lingbi ti fa tongana nyen so fango tënë ayeke ye so agbu bê ti e mingi?
3 E mû tapande ti Jésus: Ti ngbâ ti sara si fango tënë aduti kozo ye so agbu bê ti e tongana ti Jésus alingbi ti duti mbeni tara teti e, ndali ti so dunia so ayeke mû ngoi ti e mingi nga lo zia na gbele e angia mingi (Mat. 24:37-39; Luc 21:34). Tongaso, a lingbi e gi ti hinga ye so ayeke kota, e sara mbeni kapa ti leke tere ti e na ti fa tënë lakue (aPhil. 1:10). E sara ngangu ti wara gi aye so alingbi na e, na e sara kusala ahon ndo ni pëpe na aye ti dunia so kue.—1 aCor. 7:31.
4. Ngbanga ti nyen ayeke kota ye laso ti ngbâ ti zia fango tënë na kozo ndo?
4 Tongana ngoi ayeke mingi pëpe, zo ti ndara ayeke sara gi ye so ayeke kota na lê ti lo. Na tapande tongana lo hinga so mbeni sioni ngu-nzapa ayeke ga, lo yeke mû ngoi ti lo nga na ngangu ti lo ti sara mbeni ye ti bata asewa ti lo nga ti sara tene ni na avoizin ti lo. Fade lo yeke dö ambeni senge kua ti zia. Ngoi angbâ mingi pëpe ti tene Harmaguédon, so ayeke tongana kota ngu-nzapa so, aga (Soph. 1:14-16; 1 aCor. 7:29). Ti tene e sö fini ti e na ti azo so ayeke mä e, a lingbi e sara hange lakue na aye so abâ e nga na fango ye ti e, a lingbi ti duti na yâ ti congrégation wala na gigi ni (1 Tim. 4:16). Biani, tongana fango tënë ayeke kozo ye so e zia na gbele e, a yeke sara si e yeke sö fini ti e!