A lingbi e duti lakue nduru ti fa tënë
1. E hinga tongana nyen so akozo Chrétien ayeke lani nduru ti fa tënë?
1 Na mbeto pëpe, akozo Chrétien ‘azia pëpe’ ti fa nzoni tënë na ando kue so ala lingbi ti wara azo dä (Kus. 5:42). Tongaso, e lingbi ti tene so tongana ala yeke gue ti fa tënë da na da, ala yeke fa nga tënë na azo so ala yeke hon ala na lege. Na peko ti fango tënë, tongana ala gue na gara ti vo ye si lege azi na ala ti fa tënë ala yeke kanga yanga ti ala pëpe. Na tapande ti Jésus, ala yeke lani nduru ti fa tënë.—Marc 6:31-34.
2. Ti sara ye alingbi na iri ti e, a hunda ti sara nyen?
2 E duti lakue nduru: Iri ti e ti aTémoin ti Jéhovah afa gi pëpe ye so e yeke sara; me a fa nga e yeke azo wa (És. 43:10-12). Tongaso, lakue e duti nduru ti gbu koko ti beku ti e, même na ngoi so e gue ti fa tënë da na da pëpe (1 Pi. 3:15). Mo gbu li ti mo kozo awe na ambeni ye so alingbi ti si so alingbi ti zi lege na mo ti fa tënë? na mo gbu li ti mo na ndo ti tënë so mo lingbi ti tene awe? Mo yeke na ambeti na tere ti mo ti mû na azo so tënë ni agbu bê ti ala? (aProv. 21:5). Mo yeke fa ka gi tënë da na da awe? Wala mo yeke fa nga nzoni tënë na azo na ambeni ndo nde tongana lege azi na mo?
3. Ngbanga ti nyen ti fa tënë na ndo ti alege, na ando so azo aye ti duti dä mingi nga na ambeni mara ti ando tongaso ayeke mbeni ye so a lingbi e kue e sara ni?
3 Fango tënë na lê ti azo dandara: Fango tënë na lê ti azo dandara andu fango tënë na ndo ti alege, na ando so azo aye ti duti dä mingi, ando ti lutingo ti akutukutu nga na ambeni mara ti ando tongaso. Kozo, e pensé e tene fango tënë na ando tongaso ayeke mbeni ye so tongana zo aye si lo sara. Me, bazengele Paul atene so lo fa tënë “na lê ti azo dandara” nga da na da (Kus. 20:20). Tongaso, ti fa tënë na ndo ti alege, na ando so azo aye ti duti dä mingi nga na ambeni mara ti ando tongaso ayeke mbeni ye so a lingbi e kue e sara ni. A yeke tâ tënë so fango tënë da na da ayeke kozo nga nzoni lege ti fa tënë ti Royaume na azo la. Ye oko, akozo Chrétien azia lê ti ala mingi gi na ndo ti azo, me pëpe na ndo ti ada. Ala yeke gbu alege kue so azi na ala ti fa tâ tënë: na lê ti azo dandara, na alege kue so azi nga da na da. Zia e nga kue e zia lê ti e mingi gi na ndo ti azo tongaso si e fa tënë mingi.—2 Tim. 4:5.