Sara ye na hange na ngoi so mo yeke fa tënë

1. Ngbanga ti nyen ti sara ye na hange na ngoi so e yeke fa tënë?

¹ “Tongana angasangbaga so ayeke na popo ti ambo ti ngonda,” awakua ti Nzapa ayeke fa tënë “na popo ti azo ti ngoi so, so sarango ye ti ala aba bango na ayeke kirikiri mingi.” (Mat. 10:16; aPhil. 2:15). Asioni sango na ndo ti bira so azo ti kodoro oko ayeke sara na popo ti ala, sarango ye ti ngangu so azo mingi ayeke sara ni nga na mungo azo na ngangu ti hon na ni amû ndo laso mingi. Ye so afa so azo ayeke “ngbâ gi ti sara sioni ti gue na ni”. (2 Tim. 3:13). Awango wa ti Bible alingbi ti mû maboko na e ti “sara ye na hange” na ngoi so e yeke fa tënë?—Mat. 10:16.

2. Aye wa alingbi ti sara si e sara ye na ndara ti zia mbeni territoire ti gue na yâ ti mbeni nde ti fa tënë?

² Sara ye na ndara: A-Proverbe 22:3 afa so a yeke na lege ti ndara ti tene e bâ ye ti sioni e ‘honde tere ti e’. Zia lê ti mo akpengba! Mbeni vaka so siriri ayeke ka dä alingbi ti changé sân ti tene e ku tere ti e na ni. Mo lingbi ti bâ so aturugu ti lapolice ayeke hon mingi mingi wala gbâ ti azo abungbi na ndo ti lege. Ngoi na ngoi mbeni zo so e yeke fa tënë na lo alingbi ti sara tënë na e na ndo ti mbeni ye so aye ti si. Ahon ti gi ti bâ ye ni si, a yeke na lege ti ndara ti londo na ndo ni so hio ti hon na ti fa tënë na mbeni ndo nde.—aProv. 17:14; Jean 8:59; 1 aThes. 4:11.

3. E lingbi ti sara kua na wango so ayeke na Zo-ti-fa-tene 4:9 na fango tënë tongana nyen?

³ Sara kua na tere ti amba ti mo: Zo-ti-fa-tene 4:9 atene, “Azo use ayeke nzoni ahon zo oko.” Atâa tongana mo yeke fa ka tënë gi mo oko sân ti tene mbeni ye asi na mo, a yeke nzoni ti ngbâ ti sara ni na ngoi so e yeke dä so? Na ambeni ndo mo lingbi ti sara ni. Me na ambeni ndo, a yeke nzoni pëpe ti tene mbeni ita-wali wala mbeni maseka afa tënë gi lo oko da na da, mbilimbili tongana lâ akui. Aye so asi afa so ayeke lakue nzoni mingi ti tene e na mbeni ita si e gue na fango tënë (Zo-ti. 4:10, 12). A yeke nzoni zo oko oko so ayeke na yâ ti mbeni groupe ti fango tënë abâ ndo na tere ti mba ti lo si ye ti sioni asi na lo pëpe. Kozo ti londo na yâ ti territoire ti hon, gi ti fa na amba ti mo so mo hon awe.

4. Tongana nyen e lingbi ti sara si ye ti sioni asi pëpe na aita ti congrégation?

⁴ Teti so a-ancien ayeke tongana azo so ayeke ‘bâ ndo na ndo ti âme ti e,’ a yeke ti ala ti fa ye so alingbi e sara alingbi na dutingo ti ndo so e yeke dä (aHéb. 13:17). Jéhovah ayeke iri tënë nzoni na ndo ti e so e yeke aChrétien tongana e yeke sara ye na hingango katikati ti e na e sara kua maboko na maboko na ala (Mi. 6:8; 1 aCor. 10:12). Zia awakua kue ti Nzapa amû mbage ti ala ti fa tënë nzoni na yâ ti territoire ti e, me na sarango ye lakue na hange.