Ngbanga ti nyen a lingbi mo wara territoire ti mo wani?
1. Ti wara territoire ti mo wani aye ti tene nyen?
1 Ti wara territoire ti mo wani aye ti tene nyen? Tongana mo yeke na yâ ti mbeni congrégation so territoire ni akono mingi, mo lingbi ti hunda ti wara territoire ti mo wani so aduti peut-être nduru na ndo so mo lango dä. Buku Bungbi, lembeti 103, atene: “Dutingo na mbeni territoire ti mo tongaso ayeke mû ande lege na mo ti sara kusala nzoni na ngoi ti mo ti fango tënë. Nga, mo lingbi ti tisa mbeni wafango tënë na tere ti mo ti sara territoire so a mû na mo.”
2. Mo lingbi ti sara kua na territoire ti mo wani tongana nyen nde na fango tënë na groupe?
2 Nde na fango tënë na groupe: Tongana mo wara territoire ti mo wani nduru na place ti kua ti mo, mo lingbi ti fa tënë na ngoi ti wungo tere wala kozo si mo kiri na yanga-da, peut-être na mbeni wafango tënë so asara kua nduru na mo. Tongana territoire ti mo ayeke nduru na da ti mo, mo na sewa ti mo alingbi ti fa tënë na yâ ni na alakui. Biani, tongana mo gue pëpe na bungbi ti fango tënë, a yeke nzoni ti sambela ti wara fango lege ti Jéhovah kozoni si mo to nda ti fa tënë (aPhil. 4:6). Na ndo ni, mo lingbi ti leke ngoi ti fango tënë na territoire ti mo nga ti leke ngoi so mo yeke mû maboko na groupe ti fango tënë ti congrégation. Mbilimbili na anda-yenga, aita ayeke ga ka mingi na bungbi ti fango tënë, a yeke nzoni ti mû maboko na groupe ti fango tënë ti mo.
3. Aye ti nzoni wa mo yeke wara tongana mo yeke na territoire ti mo wani?
3 Aye ti nzoni: Tongana mo yeke na territoire ti mo wani, mo yeke na mbeni ndo ti fa tënë na ngoi kue so alingbi na kapa ti mo. Mo lingbi ti mû ngoi mingi ti fa tënë nga ti futa lege mingi pëpe ti gue na territoire ni. Ti gue na li ni tongaso alingbi ti pusu ambeni zo ti mû kua ti pionnier auxiliaire wala ti pionnier permanent. Tongana ambeni zo so asara nzara ti tënë ni ayeke na yâ ti vaka ti mo, a lingbi ti duti ngangu ape ti kiri ti sara avizite nga ti to nda ti a-étude. Mingi ti aita so afa tënë na yâ ti territoire ti ala wani abâ so lege azi na ala ti hinga tere na azo ti yâ ti territoire ni nga azo ni ayeke zia bê ti ala kue na ala, mbilimbili tongana a sara territoire ni fani mingi kozoni si a kiri na ni na mbeni zo so ahunda ni. Ti sara kua na yâ ti territoire ti mo wani ayeke mû maboko na mo nga na sewa ti mo ti sara kusala ti ala ni kue.—2 Tim. 4:5.